សម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ មានប្រសាសន៍ថា ក្រោយការរៀបចំបោះឆ្នោតជ្រើសរើសសភា និងបង្កើតបានរាជរដ្ឋាភិបាលថ្មីអាណត្តិទី៧ រួចរាល់ហើយ យើងមានឱកាសបានប្រារព្ធពិធីបុណ្យផ្កាមហាសាមគ្គី តាមការសន្យានៅមុនពេល
ខេត្តកំពង់ឆ្នាំង ៖ សម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ មានប្រសាសន៍ថា ក្រោយការរៀបចំបោះឆ្នោតជ្រើសរើសសភា និងបង្កើតបានរាជរដ្ឋាភិបាលថ្មីអាណត្តិទី៧ រួចរាល់ហើយ យើងមានឱកាសបានប្រារព្ធពិធីបុណ្យផ្កាមហាសាមគ្គី តាមការសន្យានៅមុនពេលបោះឆ្នោត។ មានប្រសាសបែបនេះ ក្នុងពិធីបុណ្យផ្កាប្រាក់មហាសាមគ្គី និងបញ្ចុះបឋមសិលាកសាងកុដិ ចំណុចវត្តវារីផាសុខារាម ហៅវត្តទឹកជុំ ស្ថិតក្នុងភូមិទឹកជុំ ឃុំអភិវឌ្ឍន៍ ស្រុកទឹកផុស កាលពីរសៀលថ្ងៃទី២៦ ខែសីហា ឆ្នាំ២០២៣។
សម្តេចកិត្តិសង្គហបណ្ឌិត បានបន្តថា ពិធីបុណ្យនេះ អាចប្រព្រឹត្តទៅបានដោយសារប្រទេសជាតិមានសុខសន្តិភាពពេញលេញ ដែលអនុញ្ញាតិឲ្យពុទ្ធសាសនិកទាំងអាចប្រារព្ធពិធីបុណ្យយ៉ាងឱឡារឹកទៅតាមជំនឿរៀងៗខ្លួន។ ជាមួយនឹងសមិទ្ធផលដែលនឹងកើតចេញពីបច្ច័យបានពីបុណ្យផ្កាមហាសាមគ្គីនាពេលនេះ សូមគណៈកម្មការវត្ត ព្រះចៅអធិការវត្ត ព្រះសង្ឃគ្រប់ព្រះអង្គ និងពុទ្ធបរិស័ទ្ធទាំងអស់គ្នា នឹងរួមគ្នាថែរក្សានូវសមិទ្ធផលនៅក្នុងវត្តឲ្យបានស្ថិតស្ថេរគង់វង្ស ដើម្បីជាម្លប់ព្រះពុទ្ធសាសនា និងពុទ្ធសាសនិកគ្រប់រូប។ ចំពោះបច្ច័យដែលបានមកពីបុណ្យផ្កាមហាសាមគ្គីនាពេលនេះ មានចំនួន១៩៩លាន៧០ម៉ឺនរៀល និងប្រាក់ដុល្លារមានចំនួន ៥ម៉ឺន៣១០ដុល្លារ។
សម្តេចកិត្តិសង្គហបណ្ឌិត ក៏បានថ្លែងអំណរគុណដល់ប្រជាពលរដ្ឋនៅខេត្តកំពង់ឆ្នាំង ក៏ដូចជាប្រជាពលរដ្ឋនៅទូទាំងប្រទេស បានគាំទ្រគណបក្សប្រជាជនកម្ពុជា ដែលធ្វើឲ្យគណបក្សប្រជាជនកម្ពុជា ទទួលបាន១២០អាសនៈ ក្នុងចំណោម១២៥អាសនៈ នៅក្នុងរដ្ឋសភា តាមរយៈការបោះឆ្នោតជ្រើសតាំងតំណាងរាស្ត្រ នីតិកាលទី៧ នៃរដ្ឋសភា កាលពីថ្ងៃទី២៣ ខែកក្កដា ឆ្នាំ២០២៣ ដែលប្រព្រឹត្តទៅយ៉ាងទៀងទាត់ និងត្រឹមត្រូវតាមការកំណត់របស់រដ្ឋធម្មនុញ្ញកម្ពុជា ក្នុងបរិយាកាសសេរី មានសន្តិសុខ សណ្តាប់ធ្នាប់សាធារណៈល្អ និងគ្មានអំពើហិ.ង្សា ឬការគំរា.មកំហែ.ងណាមួយឡើយ។
ព្រះមុនីកោសល យ៉ន សេងយៀត មានថេរៈដីកាថ្លែងអំណរគុណយ៉ាងជ្រាលជ្រៅ ដល់សម្តេចកិត្តិសង្គហបណ្ឌិត ម៉ែន សំអន ឯកឧត្តម ស៊ុន សុវណ្ណារិទ្ឋិ អភិបាលខេត្តកំពង់ឆ្នាំង និងពុទ្ធបរិស័ទ្ទជិតឆ្ងាយទាំងអស់ ដែលបានចូលបុណ្យផ្កាមហាសាមគ្គីដើម រួមចំណែកកសាងសមិទ្ធផលក្នុងទីអារាមនេះ។ ជាមួយគ្នានឹងសទ្ធាជ្រះថ្លាយ៉ាងក្រៃលែង ដើម្បីរួមចំណែកក្នុងវិស័យព្រះពុទ្ធសាសនាក្នុងការកសាងកុដិ ព្រះវិហារនៅក្នុងវត្តទឹកជុំនេះ សូមព្រះគ្រូចៅអធិការវត្ត គណៈកម្មាធិការ និងពុទ្ធបរិស័ទចំណុះជើងវត្ត ចូលរួមពិនិត្យមើលការកសាង សូមឱ្យមានគុណភាព សោភណ្ឌភាព និងតម្លាភាព បានប្រើប្រាស់បានយូរអង្វែង។
គួររំលឹកផងដែរថា វត្តវារីផាសុខារាម (ហៅវត្តទឹកជុំ) ក៏ជាកន្លែងតម្កល់ព្រះស.ព ព្រះមហាថេរបញ្ញានន្ទោ សំ បុណ្យសាន្ដ (ជាសិស្សប្អូនលោកឪសួង) ដែលព្រះអង្គបានសុគតកាលពីថ្ងៃសៅរ៍ ទី៣០ ខែឧសភា ឆ្នាំ២០២០ វេលាម៉ោង៤និង៣៨នាទីល្ងាច ដោយជរាពាធ ក្នុងព្រះជន្ម ៩៥ ព្រះវស្សា៕
ចែករំលែកព័តមាននេះ