ប៊ូតាន កាត់បន្ថយថ្លៃសេវាទេសចរណ៍ប្រចាំថ្ងៃពាក់កណ្តាល ដើម្បីទាក់ទាញភ្ញៀវកាន់តែច្រើន
ប៊ូតាន ៖ រាជាណាចក្រហិម៉ាឡៃយ៉ាន នៃប្រទេសប៊ូតាន (Bhutan) បានកាត់បន្ថយពាក់កណ្តាល នៃថ្លៃ
ប៊ូតាន ៖ រាជាណាចក្រហិម៉ាឡៃយ៉ាន នៃប្រទេសប៊ូតាន (Bhutan) បានកាត់បន្ថយពាក់កណ្តាល នៃថ្លៃសេវាកម្មប្រចាំថ្ងៃ ដែលខ្លួនគិតពីភ្ញៀវទេសចរ នៅក្នុងកិច្ចខិតខំប្រឹងប្រែង ដើម្បីជំរុញវិស័យទេសចរណ៍ ដែលនៅតែជួបការលំបាកក្នុងការងើបឡើងវិញ ពោលគឺ១ឆ្នាំបន្ទាប់ពីការបិទបញ្ចប់ នៃការរឹតបន្តឹងបង្ការជំងឺកូវីដ-១៩។ នេះបើយោងតាមប្រភពពីទីភ្នាក់ងារសារព័ត៌មាន Reuters ចេញផ្សាយកាលពីថ្ងៃទី២៦ ខែសីហា ឆ្នាំ២០២៣ កន្លងទៅ។
ប៊ូតាន បានដំឡើងថ្លៃសេវាអភិវឌ្ឍន៍ប្រកបដោយនិរន្តរភាពពី ៦៥ដុល្លារដល់ ២០០ដុល្លារសម្រាប់ភ្ញៀវម្នាក់ក្នុងមួយយប់។ ប៉ុន្តែទោះយ៉ាងណាក៏ដោយ រដ្ឋាភិបាលបានប្រកាសនៅក្នុងសេចក្តីថ្លែងការណ៍មួយ កាលពីថ្ងៃ២៥ ខែសីហា កន្លងទៅ ថា ចំនួនថ្លៃសេវាកម្មថ្មី ១០០ដុល្លារក្នុងមួយយប់នឹងចូលជាធរមាន ចាប់ពីខែកញ្ញា ហើយនិងមានរយៈពេល៤ឆ្នាំ។ សេចក្តីថ្លែងការណ៍បញ្ជាក់ថា នេះគឺដើម្បីមើលពីតួនាទីសំខាន់ នៃវិស័យទេសចរណ៍ក្នុងការបង្កើតការងារ ទទួលបានការផ្លាស់ប្តូរពីបរទេស និងការជំរុញកំណើនសេដ្ឋកិច្ចទាំងមូល។
ស្ថិតនៅដាច់ពីគេជាច្រើនជំនាន់ ប្រទេសប៊ូតានបានបើកទទួលភ្ញៀវទេសចរនៅឆ្នាំ ១៩៧៤ នៅពេលដែលមានភ្ញៀវត្រឹម ៣០០នាក់ប៉ុណ្ណោះ។ ទិន្នន័យផ្លូវការបានបង្ហាញថា ចំនួននេះបានកើនឡើងដល់ប្រមាណ ៣១៥,៦០០ នៅក្នុងឆ្នាំ ២០១៩ ដែលកើនឡើង ១៥.១% បើធៀបនឹងឆ្នាំ ២០១៨។
លោក Dorji Dhradhul អគ្គនាយកនៃនាយកដ្ឋានទេសចរណ៍បាននិយាយថា ការកាត់បន្ថយថ្លៃសេវាពាក់កណ្តាល អាចជំរុញការមកដល់នៅក្នុងរយៈពេលទេសចរណ៍ឈានដល់កម្រិតកំពូល នៃខែកញ្ញាដល់ខែធ្នូ ដែលរួមមានព្រឹត្តិការណ៍សាសនា និងវប្បធម៌ជាច្រើន នៅក្នុងប្រទេសមានប្រជាជនសរុបជាង ៧៨៨,០០០នាក់ ដែលភាគច្រើនជាពុទ្ធសាសនិក។
កាលពីខែមិថុនាកន្លងទៅ រដ្ឋាភិបាលបានបន្ធូរបន្ថយច្បាប់លើរយៈពេលស្នាក់នៅ និងថ្លៃសេវាសម្រាប់ភ្ញៀវទេសចរ ប៉ុន្តែចំនួនភ្ញៀវទេសចរ មិនបានកើនឡើងដូចការរំពឹងទុកនោះ។ លោក Dhradhul បានបន្ថែមថា ភ្ញៀវទេសចរជាង ៥៦,០០០នាក់ បានមកលេងប្រទេសប៊ូតាន ចាប់តាំងពីខែមករា ប៉ុន្តែប្រហែល ៤២,០០០នាក់ គឺជាជនជាតិឥណ្ឌា ដែលត្រូវបង់ថ្លៃត្រឹមតែ ១,២០០រូពីឥណ្ឌា ឬ ១៤,៥ដុល្លារក្នុងមួយថ្ងៃ។
ប្រជាជនប៊ូតានប្រហែល ៥០,០០០នាក់ ត្រូវបានជួលនៅក្នុងវិស័យទេសចរណ៍ ដែលរកចំណូលបានប្រហែល ៨៤លានដុល្លារក្នុងមួយឆ្នាំក្នុងរយៈពេល ៣ឆ្នាំ មុនពេលផ្ទុះមានជំងឺរាតត្បាតកូវីដ-១៩ ដែលគិតជារូបិយប័ណ្ណបរទេស៕
ចែករំលែកព័តមាននេះ