ប្រជាពលរដ្ឋ ព្រួយបារម្ភ ផ្លូវមួយចំនួន ក្នុងស្រុករមាសហែក គ្មានគុណភាព
ខេត្តស្វាយរៀង ៖ មានការដាក់ដេញថ្លៃគម្រោងកែលម្អ ផ្លូវចំនួន០២ខ្សែ នៅព្រឹកថ្ងៃទី២៥ សីហា ២០២៣ នៅឃុំក្រសាំង និងឃុំអណ្តូងត្របែក ស្រុករមាសហែក…
ខេត្តស្វាយរៀង ៖ មានការដាក់ដេញថ្លៃគម្រោងកែលម្អ ផ្លូវចំនួន០២ខ្សែ នៅព្រឹកថ្ងៃទី២៥ សីហា ២០២៣ នៅឃុំក្រសាំង និងឃុំអណ្តូងត្របែក ស្រុករមាសហែក ដោយមាន ក្រុមហ៊ុនច្រើនចូលដាក់សំណើរដេញថ្លៃ ដែលគេហៅថា ជាការដេញថ្លៃប្រកាប់ប្រចាក់គ្នា ទម្លាក់តម្លៃទាបបំផុត មិនធ្លាប់មាន គឺតម្លៃទាបរហូតដល់ក្រោម ៤០ភាគរយ ធ្វើឲ្យប្រជាពលរដ្ឋ ក៏ដូចអ្នកជំនាញ ព្រួយបារម្ភថា ផ្លូវគ្មានគុណភាព សូមឲ្យម្ចាស់គម្រោង និងមន្ត្រីលទ្ធកម្ម មេត្តាចុះពិនិត្យគ្រប់ដំណើរការអនុវត្តគម្រោងផង ។
គម្រោងទី១ ៖ ឃុំអណ្តូងត្របែក ដាក់ដេញថ្លៃគម្រោងកិច្ចសន្យា កែលម្អផ្លូវដីក្រាលថ្មបំបែក ប្រវែង១,៩០៣ម៉ែត្រ ទទឹង៦ម៉ែត្រ និងសាងសង់លូមូលភ្លោះ មុខកាត់១ម៉ែត្រ ប្រវែង១០ម៉ែត្រ ១កន្លែង និងសាងសង់លូមូលទោល មុខកាត់១ម៉ែត្រ ប្រវែង០៦ម៉ែត្រ មួយកន្លែង និងសាងសង់លូមូលទោល មុខកាត់០,៨០ម៉ែត្រ ចំនួន០២កន្លែង ប្រវែង៦ម៉ែត្រ និងស្លាកសញ្ញាគម្រោងចំនួន០១ ។
តម្លៃទឹកប្រាក់គម្រោងទី១នេះ តម្លៃប៉ាន់ស្មាន ១៧៥,៣៨៥,០០០រៀល។ ហើយមានក្រុមហ៊ុនចូលដាក់សំណើរដេញថ្លៃ ចំនួន០៧ក្រុមហ៊ុន។ លទ្ធផល បានទៅលើក្រុមហ៊ុន កែវ សុភក្ត័ ដែលអ្នកចូលដេញថ្លៃ ឈ្មោះ កែវ សុភក្ត័ ប្រធានក្រុមហ៊ុន ដាក់តម្លៃទាបត្រឹម ៣៣,៧៤៣,១៩០រៀល (គឺតម្លៃទាបបំផុត ក្រោម៤០ភាគរយ) ។
ចំណែកក្រុមប្រឹក្សាឃុំអណ្តូងត្របែក ម្ចាស់គម្រោង បានលើកឡើងថា តម្លៃទាបអាចទទួលយកបាន ក្រុមហ៊ុនដេញថ្លៃទាប៣៣,៧៤៣,១៩០រៀល សាងសង់ផ្លូវដីក្រាលថ្មបំបែក ប្រវែង១,៩០៣ម៉ែត្រ ដូច្នេះគឺនៅសល់ប្រាក់ចំនួន ១៤១,៦៤១,៨១០រៀល អាចចុះកិច្ចសន្យាបន្ថែម សាងសង់បន្ត បានផ្លូវដីក្រាលថ្មបំបែក ប្រមាណ០៤ខ្សែទៀត ស្មើ៧,៦១២ម៉ែត្រ ចំណេញផ្លូវ ជូនប្រជាពលរដ្ឋ ។
គម្រោងទី២ ៖ ឃុំក្រសាំង គម្រោងកែលម្អផ្លូវដីក្រាលបេតុងអាមេ ១ខ្សែ ប្រវែង ៣៨៣ម៉ែត្រ ទទឹង៥ម៉ែត្រ កម្រាស់០,១៥ម៉ែត្រនិងចាក់បំពេញដី តាមផ្លូវបេតុង សងខាងកម្រាស់ ០,១៥ម៉ែត្រ និងសាងសង់លូមូលទោល មុខកាត់០,៦០ម៉ែត្រ ចំនួន០២កន្លែង និងធ្វើស្លាកសញ្ញា១ កន្លែង។
តម្លៃទឹកប្រាក់គម្រោងទី២នេះ តម្លៃប៉ាន់ស្មាន ២៣៨,៣៧១,០០០រៀល ។ មានក្រុមហ៊ុនដាក់សំណើរដេញថ្លៃ០៩ក្រុមហ៊ុន។ លទ្ធផល ៖ បានទៅលើក្រុមហ៊ុន វ៉ាន វី ដាក់តម្លៃ ៨៣,៩៧៧,០០០រៀល តម្លៃទាបអាចទទួលយកបាន (តម្លៃទាបក្រោម៤០ភាគរយ) ។
អ្នកជំនាញលើកឡើងថា ការដាក់តម្លៃទាបរហូតក្រោម៤០ភាគរយខាងលើនេះ មានហានីភ័យខ្ពស់ណាស់ គឺព្រួយបារម្ភ ផ្លូវគ្មានគុណភាព ធ្វើខាងមុខ ខូចខាងក្រោយ ធ្វើខាងក្រោយ ខូចខាងមុខ ។
ប្រភពមហាជន ក៏បានលើកឡើងថា កន្លងមកពិនិត្យឃើញថា ក្រុមហ៊ុន ដែលដាក់ដេញថ្លៃទាបក្រោម៤០ភាគរយ ទាំងអស់នេះ ពួកគេគឺកេង ដែកទំហំ ១០លី នៅត្រឹមទំហំ ០៨លី មុននឹងចាក់ក្រាលបេតុង គម្រោងតម្រូវឲ្យក្រាលថ្ម ទ្រាប់បាត តែក្រុមហ៊ុនចាក់បេតុងផ្ទាល់ដីជាដើម និងមិនគ្រប់ម៉ែត្រទៀតផង កម្រាស់ក៏មិនគ្រប់តាមស្តង់ដា នៃកិច្ចសន្យា ផងដែរ ។
ប្រជាពលរដ្ឋ ក៏សូមសំណូមពរ ដល់ម្ចាស់គម្រោង និងមន្ត្រីលទ្ធកម្ម អ្នកជំនាញបច្ចេកទេសមេត្តា ចុះពិនិត្យគ្រប់ដំណើរការអនុវត្តគម្រោងជាប្រចាំផង ដើម្បីធានានូវការអនុវត្តកិច្ចសន្យា គម្រោងឲ្យបានត្រឹមត្រូវ តាមស្តង់ដាបច្ចេកទេស ទើបផ្លូវមានគុណភាពយូរអង្វែង ៕
ចែករំលែកព័តមាននេះ