ខេត្តស្វាយរៀង ៖ មានក្រុមហ៊ុននាំផ្លែម្ទេសស្រស់ ពីប្រទេសវៀតណាម ឆ្លងតាមច្រកទ្វារតំបន់ព្រំដែនដូង ឃុំដូង ស្រុករមាសហែកតាមរថយន្តកុងតឺន័រ ក្នុង១ថ្ងៃៗ រាប់សិបតោន ឆ្ពោះទៅច្រកទ្វាព្រំដែនឡែម ចូលទៅប្រទេសថៃ ។
បើតាមសមត្ថកិច្ចម្នាក់ ប្រចាំការនៅច្រកទ្វាតំបន់ព្រំដែនដូង បានប្រាប់កោះសន្តិភាពនៅវេលាម៉ោង០១និង៤៥នាទីព្រឹកថ្ងៃទី២៥ ខែសីហា ឆ្នាំ២០២៣នេះថា មានក្រុមហ៊ុននាំផ្លែម្ទេសស្រស់ ពីប្រទេសវៀតណាម ចូលមកតាមច្រកទ្វារតំបន់ព្រំដែនដូង ក្នុងស្រុករមាសហែក ឆ្ពោះទៅច្រកទ្វារព្រំដែនឡែម ចូលទៅប្រទេសថៃ ។
ប្រភព បន្តទៀតថា គេនៅមិនទាន់ដឹងថា ក្រុមហ៊ុននេះ ជាក្រុមហ៊ុនខ្មែរ ឬក្រុមហ៊ុនវៀតណាមនោះទេ ដោយម្ចាស់ក្រុមហ៊ុននាំពីប្រទេសវៀតណាម ឆ្លងកាត់ទៅប្រទេសថៃ ដោយដឹកតាមរថយន្តកុងតឺន័រ ដែលមានស្លាកលេខវៀតណាម ពេលចូលមកដល់ផែដូង ឃុំដូង គឺម្ចាស់ក្រុមហ៊ុន បានផ្ទេរ និងប្តូរក្បាលរថយន្ត ដាក់ក្បាលរថយន្ត ដែលមានស្លាកលេខខ្មែរ ប៉ុន្តែសណ្តោងទូកុងតឺន័រ គឺនៅដដែល ស្លាកលេខវៀតណាម ដោយសារទ្រុងកុងតឺន័រនោះ មានបំពាក់ម៉ាស៊ីនត្រជាក់ សម្រាប់រក្សាគុណភាពផ្លែម្ទេសស្រស់ ឲ្យនៅស្រស់ល្អ ។
ប្រភពបន្តទៀតថា ក្រុមហ៊ុនគេមានច្បាប់នាំឆ្លងកាត់ ហើយគេបង់ពន្ធឲ្យមន្ត្រីគយ ដូច្នេះបើចង់ដឹងព័ត៌មានច្បាស់ សូមឲ្យសួរទៅមន្ត្រីគយ ប្រចាំការនៅឃុំដូងទៅ ទើបដឹងថា ម្ចាស់ម្ទេសនោះឈ្មោះអី ហើយក្រុមហ៊ុនឈ្មោះអី ។
ប្រភពដដែល ក៏បានបង្ហើបឲ្យដឹងទៀតថា រថយន្តកុងតឺន័រ សណ្តោងរ៉ឺម៉ក ក្នុងមួយលើក គឺមានរថយន្តកុងតឺន័រ ចាប់ពី៧គ្រឿង ទៅ៨គ្រឿង គេរត់ការបង់ពន្ធ រួចបើកឆ្លងកាត់ឆ្ពោះទៅច្រកទ្វារព្រំដែនឡែម រួចផ្ទេរដឹកទៅប្រទេសថៃ ។
ទាក់ទិនករណីក្រុមហ៊ុននាំផ្លែម្ទេសស្រស់ ទៅប្រទេសថៃនេះដែរ មិនអាចទំនាក់ទំនងសុំការបំភ្លឺពីមន្ត្រីគយ ប្រចាំការនៅប៉ុស្តិ៍ច្រកទ្វារតំបន់ព្រំដែនដូង បានទេ រហូតមកដល់វេលាម៉ោង៤រសៀល ថ្ងៃដដែលនេះ ៕
ចែករំលែកព័តមាននេះ