រាជធានីភ្នំពេញ ៖ រថយន្តកាមរីគូទស្វិតមួយគ្រឿងពណ៌ក្រហម ពាក់ស្លាកលេខភ្នំពេញ 2B 2605 ដែលដឹកឈើគ្រញូងពេញ បានបើកបោះពួយយ៉ាងលឿនទៅបុកម៉ូតូចំនួន៣គ្រឿងបន្តបន្ទាប់គ្នា បណ្តាលឱ្យស្លា.ប់ម្នាក់ និងរបួស៤នាក់ ។ ហេតុការណ៍នេះបានកើតឡើងនៅវេលាម៉ោង៥ និង៣០នាទីភ្លឺ ថ្ងៃទី១២ ឧសភា
រាជធានីភ្នំពេញ ៖ រថយន្តកាមរីគូទស្វិតមួយគ្រឿងពណ៌ក្រហម ពាក់ស្លាកលេខភ្នំពេញ 2B 2605 ដែលដឹកឈើគ្រញូងពេញ បានបើកបោះពួយយ៉ាងលឿនទៅបុកម៉ូតូចំនួន៣គ្រឿងបន្តបន្ទាប់គ្នា បណ្តាលឱ្យស្លាប់ម្នាក់ និងរបួស៤នាក់ ។ ហេតុការណ៍នេះបានកើតឡើងនៅវេលាម៉ោង៥ និង៣០នាទីភ្លឺ ថ្ងៃទី១២ ឧសភា នៅតាមផ្លូវលេខ១០១៩ ហៅវិថីហាណូយ ភូមិបឹងបាយ៉ាប សង្កាត់ភ្នំពេញថ្មី ខណ្ឌសែនសុខ តែ អ្នកបើកបររថយន្តបានរត់គេចខ្លួនបាត់ចោលរថយន្តរបស់ខ្លួនទៅហើយ ។ ទោះបីជាយ៉ាងណា ប៉ូលិសបានស្គាល់អត្តសញ្ញាណច្បាស់លាស់ និងកំពុងកសាងសំណុំរឿងដើម្បីចាត់ការតាមផ្លូវច្បាប់ ។
យោងតាមមន្ត្រីប៉ូលិសចរាចរដែលចុះទៅកាន់កន្លែងកើតហេតុឱ្យដឹងថា រថយន្តកាមរី ដឹកឈើគ្រញូងនេះត្រូវបានគេដឹងថា បើកពីជើងទៅត្បូងក្នុងល្បឿនលឿន ហើយទំនងជាអ្នកបើកបរងងុយដេកផង ក៏ជ្រុលទៅបុកម៉ូតូសង់កូរ៉េមួយគ្រឿងដែលកំពុងធ្វើដំណើរស្របទិសគ្នា ។ ក្រោយពីបុកហើយ ទំនងជាអ្នកបើកបរបម្រុងបើកគេច ក៏ជ្រុលទៅបុកម៉ូតូ២គ្រឿងទៀត ទើបរថយន្តទៅមុខលែងរួច ហើយអ្នកបើកបររត់គេចខ្លួនតែម្តង ។
មន្ត្រីប៉ូលិសបន្តថា នៅពេលកម្លាំងប៉ូលិសទៅត្រួតពិនិត្យរថយន្ត ស្រាប់តែឃើញមានផ្ទុកពេញសុទ្ធតែឈើប្រណីតប្រភេទគ្រញូង។ នៅក្នុងហេតុការណ៍រថយន្តបុកម៉ូតូនេះ អ្នកដែលស្លាប់ឈ្មោះខាត់ ខន អាយុ៥៥ឆ្នាំ មានទីលំនៅស្រុកកោះសូទិន ខេត្តកំពង់ចាម ។ ចំណែកឯអ្នករបួស៤នាក់ផ្សេងទៀត ប៉ូលិសកំពុងតាមសាកសួរពីអត្តសញ្ញាណ ព្រោះបានបញ្ជូនទៅមន្ទីរពេទ្យភ្លាមៗ ដើម្បីជួយសង្គ្រោះ ។
ទាក់ទិននឹងរថយន្តដឹកឈើគ្រញូងបុកមនុស្សស្លាប់ និងរបួសខាងលើនេះដែរ ត្រូវបានសមត្ថកិច្ចខណ្ឌសែនសុខខ្សឹបប្រាប់ឱ្យដឹងថា ជារៀងរាល់យប់ ចាប់ពីម៉ោង៩ទៅ រថយន្តដឹកឈើប្រណីតតែងតែដឹកបន្តកន្ទុយគ្នាពី៥គ្រឿង ទៅ១០គ្រឿង ហើយសមត្ថកិច្ចនៅទីនេះ មិនហ៊ានចាប់ទេ ព្រោះបើហ៊ានចាប់គេនឹងឃើញរថយន្តប្រភេទឡិចស៊ីស៥៧០ ពណ៌ខ្មៅ ដែលអ្នកជិះខ្លះស្លៀកពាក់ទាហាន ខ្លះស្លៀកពាក់ស៊ីវិល មកគំរាមភ្លាម។ គេមិនដឹងថា មន្ត្រីមេព្រៃប្រចាំខណ្ឌសែនសុខដឹងរឿងនេះដែរ ឬក៏មិនដឹង ឬក៏ខ្លាចការគំរាមដូចប៉ូលិសដែរនោះទេ ឬក៏ត្រូវគេរត់ការបុកឱ្យបិទភ្នែក ក៏មិនដឹងដែរ ។
សកម្មភាពរថយន្តដឹកឈើប្រណីតប្រភេទគ្រញូង មិនមែនមានតែនៅតាមខេត្តព្រៃភ្នំទេ ដែលតាមរយៈព័ត៌មានខាងលើបង្ហាញថា ឈើប្រណីតក៏មានការដឹកជញ្ជូនចូលដីក្រុងដែរ ហើយការដឹកចូលមករាជធានីភ្នំពេញនេះគឺពិតជាបានឆ្លងកាត់ច្រើនខេត្ត និងច្រើនទីតាំងសមត្ថកិច្ចថែមទៀត ។ ប៉ុន្តែពួកគេចេះបំបាំងកាយ ទើបដឹកជញ្ជូនយ៉ាងរលូនជារៀងរាល់យប់។ គេបានគិតថា បើសមត្ថកិច្ចនាំគ្នាខ្លាចក្រុមជនប្រព្រឹត្តបទល្មើសទៅហើយនោះ តើរំពឹងទៅលើអ្វីទៀត? បើធ្វើតែរបៀបនេះ ពួកជនល្មើសដែលទំនងជាពួកអាងអំណាច ពិតជាជិះសេះលែងដៃមិនខាន និងទទួលការសុខសាន្តរៀងរហូតមក ៕
ចែករំលែកព័តមាននេះ