បុគ្គលណាខ្លះថ្លើមធំ ឃុបឃិតគ្នាលក់ដីរួមភូមិ នៅស្រុកសំរោងទង
- កំពង់ស្ពឺ
នារសៀលថ្ងៃទី២៤ ខែសីហា ឆ្នាំ២០២៣ ពលរដ្ឋមួយរូបនៅភូមិក្រាំងស្នួល ឃុំព្នាយ ស្រុកសំរោងទង ខេត្តកំពង់ស្ពឺ បានរាយការណ៍ឲ្យអ្នកយកព័ត៌មានយើងដឹងថា
ខេត្តកំពង់ស្ពឺ ៖ នារសៀលថ្ងៃទី២៤ ខែសីហា ឆ្នាំ២០២៣ ពលរដ្ឋមួយរូបនៅភូមិក្រាំងស្នួល ឃុំព្នាយ ស្រុកសំរោងទង ខេត្តកំពង់ស្ពឺ បានរាយការណ៍ឲ្យអ្នកយកព័ត៌មានយើងដឹងថា ដីរួមភូមិមួយកន្លែង ទំហំជាង៣០០០ម៉ែត្រការ៉េ ត្រូវបានអាជ្ញាធរមូលដ្ឋាន ដែលមានប្រពន្ធលោកមេភូមិ ហើយក៏ជាមេខ្យល់ បានដើរកៀងគរប្រជាពលរដ្ឋឲ្យគាំទ្រខ្លួនក្នុងការលក់ដីរួមនេះ ហើយប្រជាពលរដ្ឋជាច្រើននាក់ទៀត មិនបានដឹងពីរឿងលក់ដីនេះឡើយ។
បើតាមប្រភពពីពលរដ្ឋបានរាយការណ៍ឱ្យដឹងថា ដីដែលមានទំហំខាងលើ ត្រូវបានប្រពន្ធមេភូមិក្រាំងស្នួល ចេញមុខទទួលលុយកក់ពីឈ្មួញនាល្ងាចថ្ងៃទី២៣ ខែសីហា ឆ្នាំ២០២៣ ចំនួន៨ពាន់ដុល្លារ។ បើនិយាយទៅ ដីនេះក៏ជាដីដែលមានទំនាស់ផងដែរ មិនមែនដីរួមទាំងអស់នោះទេ។ តែដោយអាងអំណាចប្ដីជាមេភូមិ ហើយមានអ្នកចាំជួយពីក្រោយខ្នងផងនោះ ទើបប្រពន្ធលោកមេភូមិ រឹតតែបានដៃខ្លាំងឡើងៗ។ ហើយនៅពេលមានអ្នកសួរថា «ហេតុអ្វីបានជាមេភូមិលក់ដីនេះ?» លោក សំ សន ជាមេភូមិក្រាំងស្នួល បាននិយាយថា «ដីនេះត្រូវបានឈ្មួញទិញយកអស់ហើយក្នុងតម្លៃ១ម៉ែត្រការ៉េ តម្លៃជិត៣០ដុល្លារ»។
មានការលើកឡើងផងដែរថា រឿងលក់ដីនេះ បើគ្មានការបើកភ្លើងខៀវពីជំនាញពាក់ព័ន្ធទេ ម្ល៉េះសមមេភូមិ មេឃុំ មិនហ៊ាននោះទេ ជាពិសេសគឺប្រពន្ធមេភូមិតែម្ដង ដែលជាអ្នកចេញមុខខ្លាំងជាងគេ។
ហើយការលក់ដីរួមភូមិនេះ ត្រូវបានប្រភពខ្លះបានបង្ហើបឱ្យដឹងថា អស់លោកអាជ្ញាធរឃុបឃិតគ្នាជាប្រព័ន្ធ លក់បានលុយរាប់ម៉ឺនដុល្លារ ដោយមានប្រពន្ធមេភូមិ ធ្វើជាអ្នកតំណាងពលរដ្ឋ ដោយសំអាងថា ថ្នាក់លើបានឯកភាពគ្នាអស់ហើយ ព្រោះមានទីប្រឹក្សាក្រសួងរៀបចំដែនដីនគររូបនីយកម្មមួយរូប ជាអ្នករត់ការ និងកាន់ឯកសារធ្វើប្លង់ ស្របពេលដែលអាជ្ញាធរស្រុកបានបដិសេធថា អត់ដឹងរឿងនេះទេ។
គេឆ្ងល់ថា ហេតុអ្វីបានជាមានទីប្រឹក្សាក្រសួង ចុះទៅដើរតួជាអ្នកសម្របសម្រួលក្នុងរឿងលក់ដីរួមភូមិនេះទៅវិញ? ហើយការអះអាងរបស់លោកមេភូមិ ដែលថា ថ្នាក់លើដែលមានទីប្រឹក្សាក្រសួង ជាអ្នករត់ការ និងកាន់ឯកសារធ្វើប្លង់នេះ តើអាចធ្លាក់មកពីលើវិញដោយរបៀបណា? បើឯកសារថ្នាក់ក្រោមមិនទាន់រៀបចំបានគ្រប់ជ្រុងជ្រោយផងនោះ?
ពាក់ព័ន្ធនឹងករណីខាងលើនេះដែរ មន្ត្រីឃុំមួយរូប បានលើកឡើងផងដែរថា បើលក់ហើយយកលុយមកកសាងហេដ្ឋារចនាសម្ព័ន្ធក្នុងភូមិជាការល្អ តែបើយកចែកគ្នា ចុះបើចែកមិនស្មើ ហើយមាននរណាម្នាក់ប្ដឹងនោះ ប្រាកដជាវីវរធំហើយ។ ដោយឡែក រឿងធ្វើប្លង់ ត្រូវរៀបចំពីក្រោមទៅលើ ហើយបើស្រុកមិនដឹងផង ចុះបើស្រុកបដិសេធមិនចុះហត្ថលេខា ខាងមន្ទីរក៏មិនហ៊ានដែរ។ រឿងនេះ មិនមែនស្រួលដូចអស់លោកលើកឡើង រឿងធ្វើប្លង់ចេញពីក្រសួងនោះទេ រឿងនេះនិយាយមកខុសពីការពិតទាំងស្រុង។
លោក សំ សន មេភូមិក្រាំងស្នួល បានបញ្ជាក់ប្រាប់តាមទូរស័ព្ទផងដែរថា ប្រពន្ធរបស់លោកពិតជាបានទទួលលុយកក់កាលពីល្ងាចថ្ងៃទី២៣ ខែសីហា ឆ្នាំ២០២៣ ពិតប្រាកដមែន គឺលុយកក់លើកទី១ ដោយសារប្រជាពលរដ្ឋមិនបានទទួល ទើបប្រពន្ធលោកជាអ្នកទទួលតែម្ដងទៅ ក្នុងចំនួន៨ពាន់ដុល្លារ។ ដោយពលរដ្ឋចាំទទួលលុយនៅលើកទី២ លោកមេភូមិបានប្រាប់ថាម្សិលមិញតំណាងចំនួន៧ទៅ៨នាក់ ឃើញមកដែរ ហើយលុយដែលបានពីការលក់ដីរួមភូមិនេះ បើរាប់ចំនួនគ្រួសារក្នុងភូមិ គឺមានច្រើន តែបើរាប់គ្រួសារចាស់ៗជំនាន់ឆ្នាំ១៩៨៦ គឺមានចំនួនជាង១០០គ្រួសារ ត្រូវតែបែងចែក បើមិនដូច្នេះទេ គឺចែកគ្នាមិនស្មើ។
លោកមេភូមិ បានបញ្ជាក់ផងដែរថា នៅពេលទទួលលុយលើកទី២ លោកនឹងហៅឃុំមកជួយមើល និងបែងចែក។ ដីរួមលក់នេះ បើតាមលោកមេភូមិ គឺមានចំនួនជាង៣ពាន់មែត្រការ៉េដោយក្នុងមួយការ៉េជិត៣០ដុល្លារ។ ហើយការលក់ដីនេះ បើសរុបទៅ គឺមានទំហំទឹកលុយជិត១០ម៉ឺនដុល្លារដែរ។
រឿងខាងលើនេះ ពលរដ្ឋបានលើកឡើងថា ហើយបើតាមដឹង គឺគេបែងចែកឲ្យប្រជាពលរដ្ឋប្រាកដមែន តែមិនដឹងថា ក្នុងមនុស្សមួយគ្រួសារ បានទទួលលុយប៉ុន្មាននោះទេ?។ រឿងនេះធ្វើឲ្យប្រជាពលរដ្ឋមួយចំនួន មានការងឿងឆ្ងល់ថា ហេតុអ្វីបានជាប្រពន្ធលោកមេភូមិ ខ្នះខ្នែង រួមទាំងលោកមេភូមិ និងអាជ្ញាធរឃុំផងដែរ ខ្នះខ្នែងលក់ដីនេះខ្លាំងម្ល៉េះ ឬមួយក៏លក់ ដើម្បីប្រយោជន៍ផ្ទាល់ខ្លួន?
បើតាមលោក ឃិន តារា មេឃុំភ្នាយ បានបញ្ជាក់ប្រាប់ដែរថា រឿងលក់ដីនេះ មិនមែនឃុំទេ គឺប្រជាពលរដ្ឋឯកភាពគ្នាលក់ ដោយម្នាក់ៗថា ជាដីកម្មសិទ្ធិ ឯម្ខាងទៀតថា ជាដីរួមភូមិ ប៉ុន្តែឥឡូវនេះ ពួកគាត់ព្រមព្រៀងគ្នាលក់ហើយ។
លោកមេឃុំបានបញ្ជាក់ទៀតថា ខាងក្រសួងដែនដី បានចុះមកដោះស្រាយគ្នាកាលពី៣ទៅ៤ថ្ងៃមុន ដោយសម្រេចថា ភាគីខាងណាទទួលយកប៉ុន្មាន ហើយភាគីម្ខាងទៀតទទួលបានប៉ុន្មាន ក្នុងនោះពលរដ្ឋបានផ្តិតមេដៃស្នើសុំឲ្យក្រសួងចេញប័ណ្ណ ដោយពួកគាត់ព្រមព្រៀងលក់ ហើយខាងក្រសួងរៀបចំដែនដីនគររូបនីយកម្ម មានលោក ជួប វណ្ណៈ ទីប្រឹក្សាក្រសួង ជាអ្នកសម្របសម្រួលរឿងនេះ និងជាអ្នកកាន់ឯកសាររត់ធ្វើប្លង់។
លោក ឃិន តារា មេឃុំព្នាយ បានបញ្ជាក់ទៀតថា រឿងនេះ បើចង់ដឹងច្បាស់ សូមទាក់ទងទៅក្រសួងរៀបចំដែនដី។ ដោយលោកបានបញ្ជាក់ប្រាប់ថា ឯកសារអ្វីៗ លោក ជួប វណ្ណៈ អតីតប្រធានការិយាល័យភូមិបាល ស្រុកសំរោងទង ដែលបច្ចុប្បន្នជាទីប្រឹក្សាក្រសួងរៀបចំដែនដីនគររូបនីយកម្ម និងសំណង់ ជាអ្នកកាន់ឯកសារទៅរត់ការនៅក្រសួងអស់ហើយ។
ដោយឡែកពាក់ព័ន្ធនឹងការលក់ដីរួមភូមិនេះដែរ អភិបាលស្រុកសំរោងទង បានបញ្ជាក់ប្រាប់ផងដែរថា ខាងស្រុកមិនបានដឹងរឿងនេះទេ។ លោកបន្ថែមថា ដីរួមភូមិ ពួកគាត់មិនអាចលក់បានទេ ព្រោះជាដីសម្រាប់ប្រយោជន៍សាធារណៈ។ លោកអភិបាលស្រុកបន្តថា តើរឿងនេះ អ្នកណាឯកភាព គឺជារឿងរបស់គេ?ដោយឡែក ខាងស្រុកអត់ដឹងទេ។
សូមរំលឹកថា កាលពីពេលថ្មីៗកន្លងទៅនេះ ព្រះករុណាជាអង្គម្ចាស់ជីវិតតម្កល់លើត្បូង បានចេញព្រះរាជក្រឹត្យបញ្ចប់មុខងារទីប្រឹក្សាក្រសួងអស់ហើយ តើមានទីប្រឹក្សាក្រសួងមកពីណាទៀត? ហើយហេតុអ្វីបានជាលក់ លោក ជួប វណ្ណៈ យកងារជាទីប្រឹក្សាក្រសួងចុះទៅដោះស្រាយ និងរត់ការឯកសាររឿងលក់ដីរួមភូមិនេះទៅវិញ?។
អ្នកយកព័ត៌មានយើង មិនទាន់អាចសុំការពន្យល់បកស្រាយពីលោក ជួប វណ្ណៈ បានទេ នាល្ងាចថ្ងៃទី២៤ ខែសីហា ឆ្នាំ២០២៣នេះ។ ពេលណាបានព័ត៌មានបន្ថែមនឹងមានផ្សាយជូនបន្តទៀត។
ព័ត៌មានពិស្ដារនឹងមានផ្សាយជូននៅលើកាសែតកោះសន្តិភាព៕
ចែករំលែកព័តមាននេះ