រាជធានីភ្នំពេញ ៖ កាលពីព្រឹកថ្ងៃទី២៣ ខែសីហា ឆ្នាំ២០២៣ នៅមន្ទីរប្រឆាំងបទល្មើសគ្រឿងញៀន បានធ្វើសន្និសីទសារព័ត៌មានបង្ហាញមុខជនសង្ស័យមួយក្រុម ពាក់ព័ន្ធករណីក្រុមប្រដាប់អាវុធប្លន់ទណ្ឌិតយកចេញពីគ្លីនិកធ្មេញ ជុំ ចិន្តា…
រាជធានីភ្នំពេញ ៖ កាលពីព្រឹកថ្ងៃទី២៣ ខែសីហា ឆ្នាំ២០២៣ នៅមន្ទីរប្រឆាំងបទល្មើសគ្រឿងញៀន បានធ្វើសន្និសីទសារព័ត៌មានបង្ហាញមុខជនសង្ស័យមួយក្រុម ពាក់ព័ន្ធករណីក្រុមប្រដាប់អាវុធប្លន់ទណ្ឌិតយកចេញពីគ្លីនិកធ្មេញ ជុំ ចិន្តា ខេត្តសៀមរាប ដែលត្រូវសមត្ថកិច្ចចាប់ខ្លួនទាំងមេក្លោង និងបក្សពួក១១នាក់ និងនៅសេសសល់៤នាក់ទៀតកំពុងតាមប្រមាញ់ ។ សូមបញ្ជាក់ថា៖ ចាប់មេខ្លោងគ្រឿងញៀ.នបានវិញហើយ ក្រោយក្រុមឧក្រិដ្ឋជនសម្រុកចូលរំដោះពីខេត្តសៀមរាប
សន្និសីទកាសែតធ្វើឡើងដោយឯកឧត្តម នាយឧត្តមសេនីយ៍ ម៉ក់ ជីតូ អគ្គស្នងការរង ទទួលផែនប្រឆាំងបទល្មើសគ្រឿងញៀន លោកឧត្តមសេនីយ៍ឯក ឃឹង សារ៉ាត់ នាយកមន្ទីរប្រឆាំងបទល្មើសគ្រឿងញៀន និងមានការចូលរួមពីតំណាងឲ្យស្ថាប័ន នាយកដ្ឋាននគរបាលព្រហ្មទណ្ឌ នាយកដ្ឋាននគរបាលសន្តិសុខផ្ទៃក្នុងនៃអគ្គស្នងការដ្ឋាននគរបាលជាតិ ។
ជនសង្ស័យដែលត្រូវបង្ហាញមុខមាន១១ នាក់ទាំងមេក្លោង ៖
១-ឈ្មោះ ចិន សិនហាន ជាមេក្លោង ដែលតុលាការផន្ទាទោសដាក់ពន្ធនាគារខេត្តសៀមរាប ចំនួន៥២ ឆ្នាំ ជាជនជាតិចិន ។
២-ឈ្មោះ ស៊ឹម សឿន
៣-ឈ្មោះ ក្លូអេ យេនរ៉ុង ភេទស្រី
៤-ឈ្មោះ ឆេង យូសេង
៥-ឈ្មោះ ផេវ ប្រាសិទ្ធសិទ្ធ
៦-ឈ្មោះ អាលសាំម៉ារី សាបាហាម៉ាដ
៧-ឈ្មោះ សាវី សាវុធ
៨-ឈ្មោះ អិន ចាន់ធី
៩-ឈ្មោះ សំ ដេវីដ
១០-ឈ្មោះ រឹម សុផល
១១-ឈ្មោះ ហ្វ្រូល សារ៉ាត់សៀន ។
ចំណែក ៤នាក់កំពុងគេចខ្លួន ៖
១-ឈ្មោះ TEKIN FIRAT ភេទប្រុស អាយុ៣៣ ឆ្នាំ ជនជាតិទូគី
២-ឈ្មោះ YARDIMCI VOLKAN ភេទប្រុស អាយុ៣២ ឆ្នាំ ជនជាតិ ទូគី
៣-ឈ្មោះ HALIL MUTLU ភេទប្រុស អាយុ៣៣ ឆ្នាំ ជនជាតិ ទូគី
៤-ឈ្មោះ ប្រាក់ ចំរើន ភេទស្រី ។
ឯកឧត្តម នាយឧត្តមសេនីយ៍ ម៉ក់ ជីតូ បានមានប្រសាសន៍ថា ពីថ្ងៃមុនដូចបានជម្រាមជូនហើយថា បើសិនជាមានព័ត៌មានថ្មី និងជម្រាបជូនបន្ថែមទៀត ជាបឋមនេះ ក្នុងនាមកងកម្លាំងអគ្គស្នង ការដ្ឋាននគរបាលជាតិ ក្រសួងមហាផ្ទៃ សម្តែងនូវការគាំទ្រ អបអរសាទរចំពោះការសម្រេចបាននូវគណៈរដ្ឋមន្ត្រីថ្មី សម្រាប់អាណត្តិទី៧នេះ ។
កន្លងមកនេះ គឺថា ព្រះរាជណាចក្រកម្ពុជាយើងទទួលបានគណៈរដ្ឋមន្តីថ្មីមួយ ក្រោមការដឹកនាំរបស់ឯកឧត្តមគតិទេសាភិបាលបណ្ឌិត ហ៊ុន ម៉ាណែត ក្រៅពីនោះក៏យើងអបអរសាទរដែរ ចំពោះឯកឧត្តម នាយឧត្តមសេនីយ៍ សន្តិបណ្ឌិត អគ្គស្នងការនគរបាលជាតិបានឡើងជាឧបនាយករដ្ឋមន្ត្រី ។ ដោយឡែក ឯកឧត្តម បណ្ឌិត ស សុខា លោកឡើងជាឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ក្នុងពេលសម្តេចក្រឡាហោម ស ខេង ឧបនាយករដ្ឋមន្ត្រីបានទៅជាក្រុមឧត្តមក្រុមប្រឹក្សាផ្ទាល់ព្រះមហាក្សត្យ អញ្ចឹងរីករាយណាស់ ដោយកងកម្លាំងប្រដាប់អាវុធ ពិសេស កងកម្លាំងនគរបាលយើងក៏បានគាំទ្រទាំងស្រុង និងអបអរសាទរ ។
ដោយឡែកថ្ងៃនេះ ចង់ជម្រាបជូនព័ត៌មានដល់បងប្អូនអ្នកសារព័ត៌មានទាំងអស់ឲ្យជ្រាបថា មកដល់ថ្ងៃនេះ គឺកិច្ចប្រតិបត្តិការស្រាវជ្រាវបង្ក្រាបបទល្មើសពាក់ព័ន្ធ និងករណីដែលក្រុមប្រដាប់អាវុធ១ក្រុមបានធ្វើសកម្មភាពរំដោះក៏ថាបាន ប្លន់ជាថា បានទណ្ឌិតដែលជាប់ពន្ធនាគារនៅខេត្តសៀមរាប ត្រូវអនុរក្សពន្ធនាគារដឹកចេញមកព្យាបាលជំងឺធ្មេញ ។
រីករាយថ្ងៃនេះ គឺថា ទណ្ឌិតឈ្មោះ ចិន សិនហាន គឺយើងចាប់បានហើយ និយាយឲ្យខ្លីទៅក្រោមការដឹកនាំបញ្ជាដ៏ខ្ពង់ខ្ពស់ម៉ឺងម៉ាត់របស់សម្តេចក្រឡាហោម ស ខេង ក៏ដូចជាឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន ឯកឧត្តម ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដោយយើងបានប្រឹងប្រែងស្រាវជ្រាវ រួមគ្នា ដូចដែលយើងខ្ញុំបានជម្រាបជូនពេលនេះមិនមែនជាជោគជ័យតែមួយរបស់អង្គភាពណាមួយនោះទេ ព្រោះថាករណីនេះ យើងបានប្រឹងប្រែងធ្វើទាំងអស់គ្នា តាមបទបញ្ជាយ៉ាងម៉ឺងម៉ាត់ រាល់កងកម្លាំងទាំងអស់ដែលស្ថិតនៅក្រោមការអគ្គស្នងការដ្ឋាននគរបាលជាតិ ក្រសួងមហាផ្ទៃគឺប្រឹងប្រែងធ្វើទាំងអស់គ្នា ។
ក្នុងនេះ គឺយើងមានមន្ទីរប្រឆាំងបទល្មើសគ្រឿងញៀន នាយកដ្ឋាននគរបាលព្រហ្មទណ្ឌ នាយកដ្ឋានកណ្តាលនគរបាលសន្តិសុខ ដោយយើងបានប្រឹងប្រែង រួមជាមួយខេត្ត៣ រាជធានីភ្នំពេញ ខេត្តបាត់ដំបង និងខេត្តសៀមរាប អញ្ចឹងយើងប្រឹងប្រែងទាំងអស់គ្នាទើបសម្រេចបានជោគជ័យ។
រហូតមកដល់ពេលនេះ គឺយើងគិតថា ការស្រាវជ្រាវបង្ក្រាបសឹងថា មួយរយភាគរយហើយ មានន័យថា យើងស្ទើបញ្ចប់ករណីបាន ដោយហេតុថាទី១មេក្លោងធំ ទណ្ឌិតដែលត្រូវរត់រួចចេញពីពន្ធនាគារ យើងចាប់បានមកវិញ ទីពីរ អ្នកចំណាយលុយកាក់ដើម្បីធ្វសកម្មភាពឈ្មោះ ឆេង យូសេង ក៏យើងយកបាន ហើយឈ្មោះ ស៊ឹម សឿន នេះ អ្នកដែលរៀបចំត្រួសត្រាយផ្លូវធ្វើសកម្មភាពក្រោមបញ្ជារបស់មេក្លោងនេះ ក៏យើងយកបាន រួមជាមួយអ្នកចាត់ចែងស្រាវជ្រាវទាក់ទងទៅពួកកម្លាំងប្រដាប់អាវុធនេះ ក្លូអេ យេនរ៉ុង ក៏យើងចាប់បាន រួមជាមួយក្រុមប្រដាប់អាវុធទាំង៦នាក់ ។
ឥឡូវនេះ យើងចាប់បន្ថែមបានម្នាក់ទៀតពីម្សិលមិញនេះ គឺជនជាតិ រ៉ាមីសាអូឌីត ដែលជាអ្នកបញ្ជាមើលផ្លូវ ដែលចង្អុលបង្ហាញថា តើដឹកមកដល់ណាហើយ ត្រូវឲ្យកម្លាំងរបស់ប្រដាប់អាវុធចូលទៅរំដោះឬទៅយកទណ្ឌិត ហ្នឹងគឺយើងយកបានទៀត អញ្ចឹងយើងជោគជ័យមួយធំណាស់ ចំពោះកម្ពុជាយើយហើយ ។
ឯកឧត្តមនាយឧត្តមសេនីយ៍ ម៉ក់ ជីតូ មានប្រសាសន៍បន្តថា ហើយក៏សូមថ្លែងអំណរគុណសារជាថ្មី កោតសសើរដល់បងប្អូនកងកម្លាំងនគរបាលជាតិទាំងអស់ ដែលបានប្រឹងប្រែង បើទោះបីកន្លែងខ្លះ ទោះមិនឃើញក៏ប៉ុន្តែយើងបានធ្វើសកម្មភាពគ្រប់អង្គភាពទាំងអស់ ។ ទាំងអគ្គនាយកដ្ឋានអន្តោប្រវេសន៍ ទាំងអគ្គនាយកដ្ឋានអត្តសញ្ញាណកម្ម ទាំងព្រំដែន គឺប្រឹងប្រែងទាំងអស់គ្នា មានន័យថា យើងប្រើប្រាស់កម្លាំងសរុប មធ្យោបាយសរុប និងបញ្ញាញាណសរុប ដើម្បីធ្វើសកម្មភាព បង្ក្រាបករណីនេះ ទើបយើងសម្រេចលទ្ធផលជាទីគាប់ចិត្ត ។
មកដល់ពេលនេះយើងនៅបន្តថែមទៀត ស្រាវជ្រាវមុខសញ្ញាសេសសល់ និងមុខសញ្ញាពាក់ព័ន្ធត្រូវធ្វើឲ្យបានច្បាស់លាស់រឿងនេះ មិនទាន់ចប់ទេ គ្រាន់តែថា ករណីនេះយើងសម្រេចបានស្ទើរតែទាំងស្រុងហើយ នៅសល់តែក្រុមសេសសល់ និងអ្នកពាក់ព័ន្ធតែប៉ុណ្ណោះ ។ ខ្ញុំគិតថា យើងដូចជាមិនមានអីសង្ស័យទៀតទេ មុនមកយើងចេះតែសង្ស័យ មតិខ្លះមើលឃើញតែខ្មៅងងឹតតែម្តង មិនដែលអ្នកណាធ្វើព្រឹកល្ងាចចាប់បាន ដូចជាការរៀបចំមួយជាឆាកល្ខោន សម្តែងអញ្ចឹង ប៉ុន្តែចំពោះយើងមិនមែនជាការសម្តែងទេ នគរបាលយើងប្រឹងប្រែងណាស់ ហើយមានអ្នកខ្លះថា ចាប់បានតែកំប៉ិចកំប៉ុក អាមេក្លោងចាប់អត់បាន ឥឡូវពេលនេះ យើងចាប់បានហើយ ចាប់បានប្រហែលជានៅថាយើងខុសទៀតក៏មិនដឹង ប៉ុន្តែចំពោះនគរបាលយើង ចំពោះមហាជនយើង ប្រជាពលរដ្ឋយើងរីករាយណាស់ ព្រោះថា ក្រុមនេះជាក្រុមម៉ាសព្យាមួយដែលធ្វើសកម្មភាពប្រដាប់អាវុធ ដែលមិនដែលមានសោះនៅកម្ពុជាយើង ។
ពេលនេះយើងបង្ក្រាបបាន ចុះបើយើងបង្ក្រាបមិនបានតើវាទៅជាយ៉ាងម៉េច អាហ្នឹងយើងមិនហ៊ានសន្និដ្ឋានទេ ស្រេចតែបងប្អូនយើងគិតពិចារណាទៅចុះ ប៉ុន្តែអ្វីក៏ដោយសំខាន់បំផុតនោះគឺយើងរីករាយ ដោយយើងបានរក្សាសន្តិសុខ សុវត្តិភាពសង្គម ជូនប្រជាពលរដ្ឋយើង និងប្រទេសជាតិយើង ថ្នាក់ដឹកនាំក៏មានការរីករាយសប្បាយចិត្ត ។ អញ្ចឹងទេ ក៏សូមអស់លោកទាំងអស់ បងប្អូនទាំងអស់ដែលជាអ្នកសារព័ត៌មានខិតខំបន្ថែមទៀត បើសិនជាមានបញ្ហាអីពាក់ព័ន្ធកិច្ចប្រតិបត្តិការរបស់សមត្តកិច្ចនគរបាល គិតទាំងវិជ្ជាជីវ សីលធម៍ សូមជួយរិះគន់ស្ថាបនា ដោយផ្តល់ព័ត៌មាន បើសិនជាមានអ្វីពាក់ពន្ធដល់បទល្មើសទាំងអស់នេះ ។
សន្និសីទកាសែតនោះ ត្រូវបានអ្នកសារព័ត៌មានសួរ ទៅឯកឧត្តម នាយឧត្តមសេនីយ៍ អគ្គស្នងការរង ជាច្រើនទៀតពាក់ពន្ធករណីបង្ក្រាបក្រុមប្រដាប់អាវុធប្លន់ទណ្ឌិតជាមេក្លោងជួញដូរគ្រឿងញៀន ត្រូវបានតុលាការផ្តន្ទាទោសដាក់ពន្ធនាគារចំនួន៥២ឆ្នាំ ដែលក្រុមឧក្រិដ្ឋជនបានទៅរំដោះកាលពីថ្ងៃទី១៦ ខែសីហា ឆ្នាំ២០២៣ នៅគ្លីនិកធ្មេញ ជុំ ចិន្តា ខេត្តសៀមរាប ថែមទៀតផង ៕
ព័ត៌មានបន្ថែមកោះសន្តិភាពនឹងមានផ្សាយជូនបន្ត ។
ចែករំលែកព័តមាននេះ