ខេត្តកណ្ដាល ៖ ព្រះអគ្គិបានឆាបឆេះភោជនីយដ្ឋានយីហោ «ដើមឫស្សី» សន្ធោសន្ធៅ និងមានផ្សែងហុយឡើងលើអាកាសយ៉ាងឃ្មួលខ្មាញ់ ដោយពុំដឹងមូលហេតុបណ្ដាលមកពីឆ្លងចរន្តអគ្គិសនី ឬក៏ការធ្វេសប្រហែសក្នុងចម្អិនម្ហូបអាហារនោះឡើយ។ ករណីអគ្គិភ័យនេះ នៅពុំទាន់ដឹងថា…
ខេត្តកណ្ដាល ៖ ព្រះអគ្គិបានឆាបឆេះភោជនីយដ្ឋានយីហោ «ដើមឫស្សី» សន្ធោសន្ធៅ និងមានផ្សែងហុយឡើងលើអាកាសយ៉ាងឃ្មួលខ្មាញ់ ដោយពុំដឹងមូលហេតុបណ្ដាលមកពីឆ្លងចរន្តអគ្គិសនី ឬក៏ការធ្វេសប្រហែសក្នុងចម្អិនម្ហូបអាហារនោះឡើយ។
ករណីអគ្គិភ័យនេះ នៅពុំទាន់ដឹងថា តើមានមនុស្សរងគ្រោះដែរ ឬអត់នោះទេ ប៉ុន្តែនៅពេលកើតហេតុភ្លាមៗនោះ បុគ្គលិកហាង ភាគច្រើនជាស្ត្រី បាននាំគ្នារត់ចេញទាំងស្ថានភាពភ័យស្លន់ស្លោ ។
ហេតុការណ៍បានកើតឡើងកាលពីវេលាម៉ោង០៥និង៣០នាទីល្ងាចថ្ងៃទី២១ ខែសីហា ឆ្នាំ២០២៣ នៅក្នុងភោជនីយដ្ឋាន«ដើមឫស្សី»នេះមានទីតាំងស្ថិតនៅតាមផ្លូវជាតិលេខ៤ ខាងកើតភ្លើងស្តុបផ្សារថ្នល់ទទឹង ឃុំដំណាក់អំពិល ស្រុកអង្គស្នួល ខេត្តកណ្ដាល ។
តាមប្រភពព័ត៌មាន បានឲ្យដឹងថា នៅមុនពេលកើតហេតុ ខណៈដែលបុគ្គលិក កំពុងធ្វើការងារ ស្រាប់តែមានអគ្គិភ័យកើតឡើង ហើយពេលនោះ ពុំមានសេចក្ដីរាយការណ៍ណាមួយបញ្ជាក់ថា មានភ្ញៀវចូលទៅក្នុងហាងនោះនៅឡើយទេ។ បន្ទាប់ពីមានហេតុការណ៍បែបនេះកើតឡើង ក្រុមបុគ្គលិកហាង បាននាំគ្នាយកបំពង់ពន្លត់អគ្គិភ័យ បាញ់អស់ជាច្រើនបំពង់ ប៉ុន្តែពុំរលត់ឡើយ ភ្លើងបានឆាបឆេះកាន់តែខ្លាំងឡើងៗ ថែមទៀត បង្កឲ្យមានអណ្ដាតភ្លើងសន្ធោសន្ធៅ និងផ្សែងឃ្មួលខ្មាញ់ ។
ប្រភពដដែល បានប្រាប់ឲ្យដឹងទៀតថា ខណៈអគ្កិភ័យឆាបឆេះនោះ អាជ្ញាធរបានហៅរថយន្តពន្លត់អគ្គិភ័យជាច្រើនគ្រឿង ពីបណ្ដាអង្គភាពនានា ចេញទៅអន្តរាគមន៍បាញ់ពន្លត់ ទើបរលត់ទៅវិញទាំងស្រុងនៅវេលាយប់ថ្ងៃដដែលនោះ។
ដោយឡែកទំហំ នៃការខូចខាត គិតជាទឹកប្រាក់នៅពុំទាន់ដឹងអស់ចំនួនប៉ុន្មាននៅឡើយ ហើយនារីៗដែលបម្រើការងារនៅទីនោះ បាននាំគ្នារត់ចេញក្រៅយ៉ាងប្រសេចប្រសាច ទាំងស្ថានភាពភិតភ័យបំផុត ៕
ចែករំលែកព័តមាននេះ