ខេត្តសៀមរាប ៖ ផ្ទះ និងខ្ទមជាង៧០ខ្នងដែលសាងសង់យ៉ាងអនាធិបតេយ្យនៅតំបន់ព្រៃជាំ ក្នុងភូមិខ្នារង្វះ ឃុំឃុនរាម ស្រុកបន្ទាយស្រីដែលរងការកា.ប់បំផ្លាញដោយខុសច្បាប់ពីសំណាក់បក្សពួកឧត្ដមសេនីយ៍ផ្កាយ៣សេះហោះប៉ើយ ប៉ែល បានត្រូវកម្លាំងសហប្រតិបត្ដិការរដ្ឋបាលព្រៃឈើ ធ្វើការរុះរើ និងធ្វើកិច្ចសន្យាកំណត់ពេលមួយសបា្ដហ៍
ខេត្តសៀមរាប ៖ ផ្ទះ និងខ្ទមជាង៧០ខ្នងដែលសាងសង់យ៉ាងអនាធិបតេយ្យនៅតំបន់ព្រៃជាំ ក្នុងភូមិខ្នារង្វះ ឃុំឃុនរាម ស្រុកបន្ទាយស្រីដែលរងការកាប់បំផ្លាញដោយខុសច្បាប់ពីសំណាក់បក្សពួកឧត្ដមសេនីយ៍ផ្កាយ៣សេះហោះប៉ើយ ប៉ែល បានត្រូវកម្លាំងសហប្រតិបត្ដិការរដ្ឋបាលព្រៃឈើ ធ្វើការរុះរើ និងធ្វើកិច្ចសន្យាកំណត់ពេលមួយសបា្ដហ៍ ឱ្យអ្នកចាប់ដីព្រៃចាកចេញ ទៅតាមសាលក្រមស្ថាពររបស់សាលាដំបូងខេត្ដ ។
ការចុះអនុវត្ដន៍សាលក្រមស្ថាពររបស់សាលាដំបូងខេត្ដសៀមរាបនេះ ធ្វើឡើងកាលពីព្រឹកថ្ងៃទី១១ ខែឧសភា ឆ្នាំ២០១១ ក្រោមការដឹកនាំដោយលោកជួន សុបញ្ញា ជាតំណាងអយ្យការ និងក្រោមការបញ្ជាផ្ទាល់ពីលោកទា គឹមសុទ្ធ នាយខណ្ឌរដ្ឋបាលព្រៃឈើសៀមរាប ដោយប្រើប្រាស់កម្លាំងប្រតិបត្ដិការប្រមាណជិត ៥០នាក់ ។
ព្រះរាជអាជា្ញរងអមសាលាដំបូងខេត្ដសៀមរាប លោកជួន សុបញ្ញា ដែលដឹកនាំកម្លាំងផ្ទាល់បានថ្លែងប្រាប់កាលពីព្រឹកថ្ងៃទី១១ ខែឧសភា ថា ការចុះរុះរើសំណង់ផ្ទះ និងខ្ទមទាំងនោះ គឺជាការអនុវត្ដន៍ទៅតាមអំណាចសាលក្រមស្ថាពររបស់តុលាការខេត្ដសៀមរាប ទៅលើផ្ទៃដីព្រៃទំហំ១.៦០០ហិកតាប្រគល់ទៅឱ្យរដ្ឋបាលព្រៃឈើគ្រប់គ្រងជាសម្បត្ដិរដ្ឋ បន្ទាប់ពីតំបន់នេះបានរងការកាប់បំផ្លាញដោយខុសច្បាប់ពីសំណាក់បក្សពួកឈ្មោះ ប៉ើយ ប៉ែល នាពេលកន្លងមក។
នៅថ្ងៃដដែលនោះ លោកទា គឹមសុទ្ធ នាយខណ្ឌរដ្ឋបាលព្រៃឈើសៀមរាប ថ្លែងទាក់ទិនទៅនឹងការចុះអនុវត្ដន៍សាលក្រមស្ថាពរនោះថា ខាងរដ្ឋបាលព្រៃឈើបានជូនដំណឹងជាច្រើនលើកច្រើនសារួចមកហើយដល់ប្រជាពលរដ្ឋមកពីបណ្ដាស្រុក-ខេត្ដផ្សេងនានា ដែលបានមកសង់ខ្ទមនៅក្នុងតំបន់ព្រៃជាំ តាមការកៀងគររបស់បក្សពួកឈ្មោះប៉ើយ ប៉ែលនោះ ឱ្យចាកចេញដោយខ្លួនឯង ប៉ុន្ដែពួកគាត់នៅតែក្រាញននៀលរស់នៅលើដីនោះ ដូច្នេះពេលនេះមានតែអនុវត្ដ ទៅតាមច្បាប់ ។
លោកបានបន្ដទៀតថា ទោះជាយ៉ាងនេះក្ដីយើងមិនបានធ្វើអ្វីតឹងតែងជ្រុលទៅលើប្រជាពលរដ្ឋទាំងនោះទេ ដោយដំណាក់កាលដំបូងយើងអនុវត្ដការរុះរើតែទៅលើខ្ទមសង់ចោលដើម្បីកាន់កាប់ដីដែលពុំមានមនុស្សគ្រប់គ្រង ។ ដោយឡែកខ្ទមឬផ្ទះដែលមានប្រជាពលរដ្ឋរស់នៅ យើងគ្រាន់តែធ្វើកិច្ចសន្យាកំណត់ពេលមួយ សបា្ដហ៍ឱ្យចាកចេញ បើពុំដូច្នេះទេយើងនឹងអនុវត្ដការរុះរើតែម្ដង។
លោក ម៉ែន វុទ្ធី មន្ដ្រីខណ្ឌរដ្ឋបាលព្រៃឈើសៀមរាប ដែលបានចុះទៅធ្វើកំណត់ហេតុនៅគ្រាអនុវត្ដសាលក្រមស្ថាពរនោះ បានឱ្យដឹងថា មានខ្ទមចំនួន៣១ ដែលសង់ទុកចោលត្រូវបានរុះរើ និងខ្ទម៤១ផ្សេងទៀតដែលមានមនុស្សនៅចាំ ត្រូវបានធ្វើកិច្ចសន្យាកំណត់ឱ្យរុះរើដោយខ្លួនឯងក្នុងរយៈពេលមួយសបា្ដហ៍ ។ ទោះបីជាយ៉ាងណា នៅគ្រាអនុវត្ដការរុះរើនោះគេសង្កេតឃើញថា ពុំមានអំពើហិង្សាឬផ្ទុះការតវ៉ាពីសំណាក់ប្រជាពលរដ្ឋដែលមករស់នៅទីនោះដោយខុសច្បាប់ទេ ដោយប្រជាពលរដ្ឋខ្លះបានចូលរួមធ្វើកិច្ចសន្យារុះរើខ្ទមដោយខ្លួនឯង ។
តាមព័ត៌មានឱ្យដឹងថា ប្រជាពលរដ្ឋដែលមករស់នៅលើដីតំបន់ព្រៃជាំនោះភាគច្រើនមកពីខេត្ដឆ្ងាយៗ ជាពិសេសខេត្ដស្វាយរៀង ដោយគ្រួសារនីមួយៗសុទ្ធតែត្អូញត្អែរថា មូលហេតុដែលពួកគេបង្ខំចិត្ដមករស់នៅទីនេះ ដោយសារតែនៅឯភូមិកំណើតពុំមានដីបង្កបង្កើនផលគ្រប់គ្រាន់ ។ ប៉ុន្ដែបើតាមការស្រាវជ្រាវ មន្ដ្រីជំនាញរដ្ឋបាលព្រៃឈើបង្ហាញថា ពួកអ្នកភូមិទាំងនោះភាគច្រើនគ្រាន់តែលក់ពលកម្មកាប់ឆ្ការព្រៃឈើ ឬចាប់ដីឱ្យពួកអ្នកផ្សេងដែលទិញដីពីឈ្មោះប៉ើយ ប៉ែល តែប៉ុណ្ណោះ ។
សូមបញ្ជាក់ផងដែរថា តំបន់ព្រៃជាំជាតំបន់ព្រៃស្រោងមានដើមឈើតូចធំយ៉ាងក្រាស់ឃ្មឹក ស្ថិតនៅក្នុងភូមិខ្នារង្វះ ឃុំឃុនរាម ស្រុកបន្ទាយស្រី ប៉ែកខាងជើងឆៀងខាងលិចជួរភ្នំគូលែន ត្រូវរងការកាប់បំផ្លាញដើម្បីកាន់កាប់ដី និងបែងចែកលក់ទៅឱ្យអ្នកដទៃជាច្រើននាក់ទៀត ពីសំណាក់ឈ្មោះប៉ើយ ប៉ែល នៅអំឡុងឆ្នាំ២០០៦ ដែលគ្រានោះគាត់ជាទាហានពាក់ស័ក្តិ២ខ្មែរក្រហមផ្ដាច់ខ្លួន ។ នេះបើតាមការអះអាងប្រាប់ដោយនាយសង្កាត់រដ្ឋបាលព្រៃឈើកន្ទួតខ្នាក្រៅ លោក ម៉ុង ប៊ុនលីម ដែលគ្រប់គ្រងតំបន់ព្រៃជាំនោះ ។
ដោយសារតែមើលឃើញទង្វើកាប់បំផ្លាញព្រៃឈើដែលជាសម្បត្ដិធម្មជាតិពីសំណាក់បក្សពួកឈ្មោះប៉ើយ ប៉ែល នៅឆ្នាំ២០០៦ ជំនាញរដ្ឋបាលព្រៃឈើសៀមរាបបានប្ដឹងឈ្មោះប៉ើយ ប៉ែល ទៅតុលាការដើម្បីធ្វើការផ្ដន្ទាទោសទៅតាមច្បាប់ស្ដីពីព្រៃឈើរបស់ប្រទេសកម្ពុជា ។ ប៉ុន្ដែនៅក្នុងអំឡុងពេលនោះ ឈ្មោះប៉ើយ ប៉ែល បានប្រឹងត្បុលរកអ្នកធំអ្នកតូចដើម្បីធ្វើខ្នងបង្អែករហូតដល់ឡើងឋានៈពីស័ក្ដិ២ទៅផ្កាយ២ និងផ្កាយ៣ ហើយបន្ដរិះរកគ្រប់មធ្យោបាយដើម្បីវាតទីកាន់កាប់ដីតំបន់ព្រៃជាំនោះបន្ដទៀត។
នាយសង្កាត់រដ្ឋបាលព្រៃឈើដដែលបាន បញ្ជាក់ថា ការកាប់បំផ្លាញព្រៃឈើសម្បត្ដិ រដ្ឋនៅតំបន់ខាងលើនោះ មានសកម្មភាពពុះកញ្ជ្រោលនៅដំណាក់កាលយុទ្ធនាការបោះឆ្នោតឆ្នាំ២០០៨ ដែលពេលនោះហើយដើមឈើតូចធំរាប់លានដើមនៅលើផ្ទៃដី៤គីឡូម៉ែត្រការ៉េ ត្រូវបានកាប់រំលំនិងដុតកម្ទេចចោលដោយគ្មានអាសូរដើម្បីរំលោភកាន់កាប់ដីឱ្យខាងតែបាន។ បន្ថែមពីលើនោះ ឈ្មោះប៉ើយ ប៉ែលក៏បាន កៀងគរប្រជាពលរដ្ឋរាប់រយគ្រួសារមកពីតាមបណ្ដាខេត្ដផ្សេងៗ ឱ្យមករស់នៅលើតំបន់នោះតាមរយៈការផ្ដល់ដីឱ្យនិងបង្កើតវត្ដឥតច្បាប់មួយនៅក្នុងតំបន់នោះ សម្រាប់ធ្វើជាខែលការពារមហិច្ឆតារបស់ពួកខ្លួន។
ឆ្លើយតបទៅនឹងបណ្ដឹងរបស់រដ្ឋបាលព្រៃឈើជុំវិញការកាប់បំផ្លាញធនធានធម្មជាតិដ៏ច្រើនសន្ធឹកសន្ធាប់ នៅថ្ងៃទី២១ ខែមិថុនា ឆ្នាំ២០១០ ឈ្មោះប៉ើយ ប៉ែល ដែលកាលនោះគាត់នៅតាំងខ្លួនជាឧត្ដមសេនីយ៍នៅឡើយ ត្រូវបានតុលាការខេត្ដសៀមរាបកោះហៅឱ្យចូលខ្លួនបំភ្លឺ និងត្រូវបានតំណាងអយ្យការចោទប្រកាន់ពីបទកាប់ទន្ទ្រានដីព្រៃសម្បត្ដិរដ្ឋខុសច្បាប់ ដោយយោងទៅតាមមាត្រា៣៣ និង៩៧នៃច្បាប់ស្ដីពីព្រៃឈើ។ ជាបន្ដបន្ទាប់ តុលាការបានបើកសវនាការជម្រះក្ដី និងសម្រេចចេញសាលក្រមដកហូតដីតំបន់ព្រៃជាំទំហំ១.៦០០ហិកតា ដែលកាន់កាប់ដោយខុសច្បាប់នោះ ទៅឱ្យជំនាញរដ្ឋបាលព្រៃឈើគ្រប់គ្រងតាមផ្លូវច្បាប់។ នៅថ្ងៃទី១១ ខែមករា ឧត្ដមសេនីយ៍ផ្កាយ៣សេះហោះ ប៉ើយ ប៉ែល ត្រូវបានចាប់ខ្លួនតាមដីកាតុលាការយោធាក្រោមបទសង្ស័យជាប់ពាក់ព័ន្ធជាខ្សែរយៈជាមួយលោកឧត្ដមសេនីយ៍ត្រី សាមិត្ដ វិរៈ ដែលបន្លំធ្វើជាឧត្ដមសេនីយ៍ឯក ហើយត្រូវបានចាប់ខ្លួនកាលពីថ្ងៃទី១០ ខែមករា ឆ្នាំ២០១១ តាមអំណាចដីកាអយ្យការតុលាការយោធាដូចគ្នា ដោយចោទប្រកាន់ពីបទក្លែងបន្លំឯកសារ និងក្រុមចលនា «ស៊ីអេហ្វអេហ្វ» ដែលមានគម្រោងផ្ដួលរំលំរដ្ឋាភិបាលនៅអំឡុងឆ្នាំ២០០០កន្លងទៅ ។
អភិបាលស្រុកបន្ទាយស្រី លោក ម៉ឹង វិទ្ធី កាលពីព្រឹកថ្ងៃទី៣ ខែឧសភា ឆ្នាំ២០១១កន្លងទៅនេះបានប្រាប់ឱ្យដឹងថា ភូមិនិងវត្ដនៅក្នុងបរិវេណព្រៃជាំដែលរដ្ឋបាលព្រៃឈើគ្រោងនឹងដាំកូនឈើឡើងវិញនោះ ពុំមានច្បាប់ទម្លាប់ពីអាជ្ញាធរមូលដ្ឋានទេ គឺមករស់នៅដោយអនាធិបតេយ្យតាមរយៈការទិញ-លក់ និងបែងចែកពីឈ្មោះប៉ើយ ប៉ែល ។ ដូច្នេះក្នុងករណីមានការតម្រូវឱ្យពួកគាត់ចេញ គាត់ត្រូវតែចេញ ព្រោះ ដីនោះជាដីព្រៃសម្បត្ដិរដ្ឋ អាជា្ញធរស្រុកមិនមានអ្វីដើម្បីដោះស្រាយគោលនយោបាយជូនឡើយ ៕
ចែករំលែកព័តមាននេះ