រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានទទួលស្គាល់ថា ជំងឺដែល បណ្តាលមកពីម្ហូបអាហារ គឺជាបញ្ហាប្រឈមសុខភាពសាធារណៈនៅទូទាំងតំបន់ រួមទាំងកម្ពុជាផងដែរ ។ លោកថា…
រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានទទួលស្គាល់ថា ជំងឺដែល បណ្តាលមកពីម្ហូបអាហារ គឺជាបញ្ហាប្រឈមសុខភាពសាធារណៈនៅទូទាំងតំបន់ រួមទាំងកម្ពុជាផងដែរ ។ លោកថា កម្ពុជាបានប្ដេជ្ញាលើកកម្ពស់របបអាហារសុខភាពសម្រាប់ទាំងអស់គ្នា តាមអភិក្រមពហុវិស័យ (multisector approach) ដើម្បីធ្វើឱ្យមានរបបអាហារសុខភាព និងអាហារសុវត្ថិភាពងាយស្រួលអាចរកបានមានតម្លៃសមរម្យ និងឆ្លើយតបចំពោះបញ្ហាអាហារូបត្ថម្ភគ្រប់ទម្រង់ ។ ប៉ុន្តែកិច្ចនេះក៏ត្រូវការកិច្ចសហការពីអ្នកពាក់ព័ន្ធទាំងឡាយឱ្យចូលរួមដោយស្មោះស្ម័គ្រទើបអាចទទួលបានជោគជ័យក្នុងការអនុវត្តសុវត្ថិភាពម្ហូបអាហារ ។
នៅថ្ងៃទី១៦ ខែសីហា ឆ្នាំ២០២៣ ភាគីពាក់ព័ន្ធចំនួនជិត៣០០នាក់ដែលធ្វើការក្នុងវិស័យកសិកម្ម ស្បៀងអាហារ និងអាហារូបត្ថម្ភបានជួបជុំគ្នាប្រារព្ធទិវាសុវត្ថិភាពម្ហូបអាហារ ពិភពលោកនៅកម្ពុជា ដើម្បីលើកកម្ពស់ការយកចិត្តទុកដាក់ និងជំរុញសកម្មភាពនានា ដើម្បីធានាបាននូវសុវត្ថិភាពម្ហូបអាហារនៅកម្ពុជា ។ នេះជាលើកទី២ ហើយដែលកម្ពុជាបានប្រារព្ធពិធីអបអរទិវាសុវត្ថិភាពម្ហូបអាហារពិភពលោក ។
លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទនិយាយថា អ្នកពាក់ព័ន្ធដែលចូលរួមដោះស្រាយបញ្ហាសុខភាពពលរដ្ឋនេះមានទាំងវិស័យឯកជនអ្នកប្រើប្រាស់ និងស្ថាប័នរាជរដ្ឋាភិបាលទាំងថ្នាក់ជាតិ និងថ្នាក់ក្រោមជាតិ ។ នៅចន្លោះឆ្នាំ២០១០-២០១៥ ជាងពាក់កណ្តាលនៃការផ្ទុះឡើងនៃជំងឺដែលបានរាយការណ៍មក គឺបណ្តាលមកពីការពុលអាហារ ឬរោគរាគរូស ។ លើសពីនេះទៅទៀតនៅចន្លោះឆ្នាំ២០១៤-២០១៩ ការផ្ទុះជំងឺឆ្លងបង្កដោយម្ហូបអាហារចំនួន១៣៤ករណី ត្រូវបានរកឃើញថា កើតឡើងដោយសារកង្វះការប្រតិបត្តិអនាម័យខ្ជាប់ខ្ជួន ជាពិសេសអំឡុងពេលរៀបចំទុកដាក់អាហារ ការគ្រប់គ្រងកម្រិតសីតុណ្ហភាពម្ហូបអាហារមិនបានត្រឹមត្រូវ ការឆ្លងរាលដាលពីមួយទៅមួយ និងការប្រើប្រាស់គ្រឿងផ្សំម្ហូបអាហារ និងប្រភពទឹកមិនស្អាត ។
ការលើកឡើងខាងលើ មិនរាប់បញ្ចូលពីក្តីបារម្ភរបស់ពលរដ្ឋពីសុវត្ថិភាពចំណីអាហារដែលបណ្តាឱ្យកើតជំងឺមិនឆ្លងធ្ងន់ធ្ងរមួយចំនួននោះទេ ។ អាហារដែលសង្ស័យថា គ្មានអនាម័យ ចម្អិតពីបន្លែ ត្រី សាច់ មានសារធាតុគីមីបានកំពុង ក្លាយជាឃា.តករលាក់មុខបង្កគ្រោះមហន្តរាយដល់សុភាពពលរដ្ឋក្នុងរយៈពេលវែង តាមរយៈការកកើតទៅជាជំងឺមិនឆ្លងមួយចំនួនដូចជា មហារីក លើសសំពាធឈា.ម និងទឹកនោមផ្អែមជាដើម ។ ជំងឺទាំងអស់នេះ ជាក្តីកង្វល់របស់ពលរដ្ឋ ហើយគេបានរកឃើញថា ពលរដ្ឋជាច្រើនបានកើតជំងឺទាំងនោះដែលមួយផ្នែកធំត្រូវគេសង្ស័យថា បណ្តាលមកពីចំណីអាហារនេះ ។
វេជ្ជបណ្ឌិត ណាហ្គីស្សា ខូជេវ៉ា តំណាងស្តីទីអង្គការសុខភាពពិភពលោកប្រចាំនៅកម្ពុជាមានប្រសាន៍ថា ៖«សុវត្ថិភាពម្ហូបអាហារចាំបាច់ណាស់ ដើម្បីធានាបាននូវសន្តិសុខស្បៀង និងអាហារូបត្ថម្ភ ។ លុះត្រាតែអាហារមានសុវត្ថិភាព ទើបអាចបំពេញតម្រូវការអាហារូបត្ថម្ភបាន និងជួយមនុស្សពេញវ័យរស់នៅប្រកបដោយសុខុមាលភាព និងជីវិតកាន់តែប្រសើរ ព្រមទាំងជួយកុមារលូតលាស់ និងអភិវឌ្ឍរាង្គកាយ» ។
វេជ្ជបណ្ឌិតបន្តថា «ប្រៀបធៀបទៅនឹងកម្រិតសាកលនៅតំបន់អាស៊ីអាគ្នេយ៍ មានកំណើនជំងឺប្រភេទនេះ និងមានអត្រាអ្នកបាត់បង់ជីវិតដោយសារជំងឺបង្ក ដោយម្ហូបអាហារនេះយ៉ាងច្រើន ។ ការបោះជំហានទៅមុខប្រកបដោយភាពវិជ្ជមានរបស់រាជរដ្ឋាភិបាលកម្ពុជាបានជួយពង្រឹងសុវត្ថិភាពម្ហូបអាហារ និងជួយការពារសុខភាពប្រជាជនកម្ពុជាគ្រប់គ្នារហូតមកដល់ពេលបច្ចុប្បន្ននេះ» ។
លោក អ៊ំ កុសល ឧបការីតំណាងអង្គការស្បៀង និងកសិកម្មនៃសហប្រជាជាតិ (FAO) ប្រចាំប្រទេសកម្ពុជា បានគូសបញ្ជាក់ថា សុវត្ថិភាពម្ហូបអាហារ គឺជាទំនួលខុសត្រូវចម្បងរបស់ភាគីទាំងអស់ ដែលធ្វើការក្នុងខ្សែច្រវាក់អាហារ គិតចាប់ពីអ្នកផលិតអ្នកកែច្នៃ ស្ថាប័ន គ្រប់គ្រងម្ហូបអាហារ ម្ចាស់អាជីវកម្មរហូតដល់អ្នកប្រើប្រាស់ ។
លោកបន្តថា ការជួបជុំនាថ្ងៃនេះ គឺជាសញ្ញានៃការទទួលស្គាល់ចំពោះអត្ថប្រយោជន៍ ភាពជាដៃគូ និងស្មារតីនៃកិច្ចសហប្រតិបត្តិការកាន់តែស្អិតរមួតក្នុងចំណោមភាគីពាក់ព័ន្ធទាំងអស់តាមខ្សែច្រវាក់តម្លៃ ចាប់តាំងពីការផលិតនៅកសិដ្ឋានរហូតដល់អាហារនៅលើតុ ហើយនៅពេលនិយាយពីសុវត្ថិភាពម្ហូបអាហារ គឺត្រូវគិតពីបរិយាកាសម្ហូបអាហារ ព្រមទាំង ជម្រើសរបស់អ្នកប្រើប្រាស់៕
ចែករំលែកព័តមាននេះ