ខេត្តកំពង់ស្ពឺ ៖ ទីតាំងល្បែងគ្រប់ប្រភេទខុសច្បាប់តាមអនឡាញ ស្ថិតនៅភូមិបុរីកម្មករ សង្កាត់ច្បារមន ក្រុងច្បារមន ខេត្តកំពង់ស្ពឺ កំពុងគៀងគរក្រុមញៀនល្បែងឲ្យចូលលេងយ៉ាងអនាធិបតេយ្យ ខណៈដែលអាជ្ញាធរនិងសមត្ថកិច្ចក្នុងមូលដ្ឋានមិនហ៊ានធ្វើការបង្ក្រាប ធ្វើឲ្យមហាជនដាក់ការសង្ស័យថា…
ខេត្តកំពង់ស្ពឺ ៖ ទីតាំងល្បែងគ្រប់ប្រភេទខុសច្បាប់តាមអនឡាញ ស្ថិតនៅភូមិបុរីកម្មករ សង្កាត់ច្បារមន ក្រុងច្បារមន ខេត្តកំពង់ស្ពឺ កំពុងគៀងគរក្រុមញៀនល្បែងឲ្យចូលលេងយ៉ាងអនាធិបតេយ្យ ខណៈដែលអាជ្ញាធរនិងសមត្ថកិច្ចក្នុងមូលដ្ឋានមិនហ៊ានធ្វើការបង្ក្រាប ធ្វើឲ្យមហាជនដាក់ការសង្ស័យថា អាជ្ញាធរនិងសមត្ថកិច្ចមូលដ្ឋានពាក់ព័ន្ធជាច្រើនអង្គភាពជាអ្នកធ្មេចភ្នែកបើកភ្លើងខៀវមិនខាន ទើបអាចដំណើរការបើកលេងបានដោយរលូនបែបនេះ ។
តាមសេចក្តីរាយការណ៍ប្រាប់មកថា ល្បែងជល់មាន់ខុសច្បាប់តាមអនឡាញល្បែងកន្ទុលលេខ ត្នោតឡូតូនៅក្នុងមូលដ្ឋានខាងលើ គេសង្កេតឃើញដំណើរការបើកលេងយូរមកហើយ ប៉ុន្តែអាជ្ញាធរនិងសមត្ថកិច្ចពាក់ព័ន្ឋក្នុងមូលដ្ឋាន គ្មានឆន្ទះក្នុងការទប់ស្កាត់ និងបង្ក្រាបឡើយ ឬមួយអស់លោក អាជ្ញាធរនិងសមត្ថកិច្ចក្នុងមូលដ្ឋាន ខ្លាចបាត់បង់លាភសក្ការៈ និងផលប្រយោជន៍ ហើយមើលទៅ ។
ប្រភពដដែលពីពលរដ្ឋលើកឡើងថា អាជ្ញាធរនិងសមត្ថកិច្ចក្នុងមូលដ្ឋាន ក្រុងច្បារមន ខេត្តកំពង់ស្ពឺ នាំគ្នាបណ្តោយឲ្យមានល្បែងជល់មាន់ខុសច្បាប់តាមអនឡាញ បើកលេងស្រែកហ៊ោកញ្ជ្រៀវ ទ្រហឹង អឺងកង ធ្វើឲ្យពួកគាត់មានការព្រួយបារម្ភជាខ្លាំង ខ្លាចកើតនូវអំពើចោរកម្ម និងបទល្មើសផ្សេងៗដូចជា លួច ឆក់ ប្លន់ និងអំពើហិង្សា ក្នុងគ្រួសារជាដើម ។ ហេតុនេះហើយបានពួកគាត់និយាយថា ឯណាទៅភូមិ-ឃុំមានសុវត្ថិភាពទាំង៧ចំណុចរបស់ប្រមុខរាជរដ្ឋាភិបាល ដែលបានកំណត់ និងដាក់ចេញឲ្យមន្ត្រីមូលដ្ឋានអនុវត្តកន្លងមកនោះ?
ទោះបីជាយ៉ាងណាក្តី មជ្ឈដ្ឋានអ្នកច្បាប់ក៏មហាជនទូទៅបាននាំគ្នាសំណូមពរទៅដល់ ឯកឧត្តម វុី សំណាង អភិបាលនៃគណៈអភិបាលខេត្តកំពង់ស្ពឺ ជាពិសេស លោក សម សាមួន ស្នងការនគរបាលខេត្តកំពង់ស្ពឺ សូមជួយចាត់វិធានការតាមផ្លូវច្បាប់ ចំពោះទីតាំងល្បែងជល់មាន់ខុសច្បាប់ តាមអនឡាញ ស្ថិតនៅក្នុងភូមិសាស្ត្របុរីកម្មករ សង្កាត់ច្បារមន ក្រុងច្បារមន ខាងលើនេះផង ។
បើយោងតាមប្រភពក្រៅផ្លូវការមួយបានបង្ហើបផងដែរថា ល្បែងទាំងនេះអាចបើកដំណើរការបានគឺដោយសារមានលោកប្រធានការិយាល័យនៃស្នងការដ្ឋាននគរបាលខេត្តមួយរូបជាអ្នកកាងនិងប្រាប់ទៅគ្រប់បណ្ដាប៉ុស្តិ៍នានាតាមស្រុកនីមួយៗក្នុងខេត្ត ។ និយាយជារួមគឺទូទាំងខេត្តកំពង់ស្ពឺតែម្ដងដែលលោកស័ក្តិ5 នាយការិយាល័យរូបនោះបានបង្កើតឲ្យមានតាមស្រុកនិងឃុំនានាក្នុងខេត្តកំពង់ស្ពឺ ល្បែងតាមអនឡាញនេះគឺកើតមានជាយូរណាស់មកហើយ ។ ដោយសារតែលោកស័ក្តិប្រាំផ្ដាំផ្ញើទៅគ្រប់អធិការស្រុកនិងមេប៉ុស្តិ៍នានាទូទាំងខេត្តម្យ៉ាងបើជំនាញខាងណាចង់ចុះបង្ក្រាបក៏បង្ក្រាបមិនបានដែរ ព្រោះលោកស័ក្តិប្រាំរូបនោះមានខ្នងបង្អែកធំណាស់ ។
សូមរំលឹកផងដែរថា កាលពីថ្ងៃទី១៧ ខែកញ្ញា ឆ្នាំ២០២២កន្លងទៅ សម្តេចតេជោ ហ៊ុនសែន បានដាក់បទបញ្ជាឲ្យអភិបាលរាជធានី ទាំង២៥ ខេត្ត ក្រុង ត្រូវតែបង្ក្រាបទីតាំងល្បែងស៊ីសងខុសច្បាប់ គ្រប់ប្រភេទ នូវទូទាំងប្រទេស ដោយគ្មានការលើកលែង។
សម្តេចតេជោ ហ៊ុន សែន ក៏បានបញ្ជាក់យ៉ាងដាច់ណាត់ផងទៀតថា បើអាជ្ញាធរនិងសមត្ថកិច្ចក្នុងមូលដ្ឋាន ស្រុក ក្រុង ខេត្ត ណាមិនហ៊ានទប់ស្កាត់ និងបង្ក្រាបទីតាំងល្បែងស៊ីសងខុសច្បាប់ គ្រប់ប្រភេទ នៅក្នុងមូលដ្ឋានរបស់ខ្លួនទេ អាជ្ញាធរនិងសមត្ថកិច្ចមូលដ្ឋាន ទាំងនោះនិងមានបញ្ហាប្រឈមនិងបាត់បង់ពីតំណែងទៀតផង ។
ចែករំលែកព័តមាននេះ