ខេត្តពោធិ៍សាត់ ៖ អតីតព្រះរាជអាជ្ញាខេត្តពោធិ៍សាត់ លោកតុប ចន្ទសិរីវុធ ត្រូវបានសាលាដំបូងខេត្តពោធិ៍សាត់ប្រកាសសាលក្រមផ្តន្ទាទោសដាក់ពន្ធនាគារចំនួន១៩ឆ្នាំ ពីបទចាប់ជម្រិត បង្ខាំងមនុស្សខុសច្បាប់ និងស៊ីសំណូក។ ការប្រកាសសាលក្រមផ្តន្ទាទោសលោកតុប ចន្ទសិរីវុធ នេះធ្វើឡើងកាលពីវេលាម៉ោង៨ព្រឹកថ្ងៃទី១២ ឧសភា ២០១១
ខេត្តពោធិ៍សាត់ ៖ អតីតព្រះរាជអាជ្ញាខេត្តពោធិ៍សាត់ លោកតុប ចន្ទសិរីវុធ ត្រូវបានសាលាដំបូងខេត្តពោធិ៍សាត់ប្រកាសសាលក្រមផ្តន្ទាទោសដាក់ពន្ធនាគារចំនួន១៩ឆ្នាំ ពីបទចាប់ជម្រិត បង្ខាំងមនុស្សខុសច្បាប់ និងស៊ីសំណូក។ ការប្រកាសសាលក្រមផ្តន្ទាទោសលោកតុប ចន្ទសិរីវុធ នេះធ្វើឡើងកាលពីវេលាម៉ោង៨ព្រឹកថ្ងៃទី១២ ឧសភា ២០១១ បន្ទាប់ពីត្រូវបានមតិមហាជន ប្រជាពលរដ្ឋជាច្រើនទន្ទឹងរង់ចាំជាយូរមកហើយ ។
បើតាមអ្នកឆ្លើយឆ្លងព័ត៌មានកោះសន្តិភាពប្រចាំខេត្តពោធិ៍សាត់បានបញ្ជាក់ថា ក្រៅពីលោកអតីតព្រះរាជអាជ្ញាខេត្តពោធិ៍សាត់តុប ចន្ទសិរីវុធ ប្រធានក្រុមប្រឹក្សាជំនុំជម្រះ លោកឌុច ចន្ថា ក៏បានសម្រេចផ្តន្ទាទោសលោកពេជ្រ ពង់យូ ជាម្ចាស់ហាងរាត្រីរីករាយពោធិ៍សាត់ និងត្រូវជាប្អូនថ្លៃលោកតុប ចន្ទសិរីវុធ ដែលបានរត់គេចខ្លួននោះ ឱ្យជាប់ពន្ធនាគារចំនួន១៨ឆ្នាំ,លោកឈិត វុទ្ធី ជាអ្នកបើកបររថយន្តឱ្យលោកតុប ចន្ទសេរីវុធជាប់ពន្ធនាគារចំនួន១៦ឆ្នាំ និងលោករស់ សំណាង ត្រូវជាអង្គរក្ស និងជាប្អូនថ្លៃលោកតុប ចន្ទសិរីវុធ ឱ្យជាប់ពន្ធនាគារចំនួន១៥ឆ្នាំ អ្នកទាំង៣ជាប់ចោទពីបទចាប់ជម្រិត និងបង្ខាំងមនុស្សខុសច្បាប់ ។ ការប្រកាសសាលក្រមនៅព្រឹកមិញនេះ មានអ្នកសារព័ត៌មាន និងសាច់ញាតិលោកតុប ចន្ទសិរីវុធ ព្រមទាំងមន្ត្រីមួយចំនួនចូលរួមស្តាប់ប្រមាណ២០នាក់ប៉ុណ្ណោះ ។
គួររំឭកថា កាលពីថ្ងៃទី២៩ វិច្ឆិកា ២០១០លោកតុប ចន្ទសិរីវុធ ត្រូវបានចាប់ខ្លួនភ្លាមៗដោយអង្គភាពប្រឆាំងអំពើពុករលួយ ខណៈពេលដែលរូបលោកជាមួយអ្នកបើកបរ និងអង្គរក្សម្នាក់ កំពុងបើករថយន្តឆ្ពោះទៅការិយាល័យធ្វើការងាររបស់លោកនៅសាលាដំបូងខេត្តពោធិ៍សាត់ ។ ការចាប់ខ្លួនលោកតុប ចន្ទសិរីវុធទាំងព្រឹកព្រលឹមនាពេលនោះបង្កឱ្យមានការភ្ញាក់ផ្អើលដល់ប្រជាពលរដ្ឋយ៉ាងខ្លាំង ពីព្រោះលោកតុប ចន្ទសិរីវុធ ជាមនុស្សដែលគេស្គាល់ថា មានឥទ្ធិពល និងអំណាចគួរសមនៅក្នុងខេត្ត៕
ចែករំលែកព័តមាននេះ