ជនសង្ស័យជាមុខសញ្ញាលួ.ចយ៉ាងសកម្មប្រចាំខេត្តតាកែវ កាលពីថ្ងៃទី១៤ ខែសីហា ឆ្នាំ២០២៣ ត្រូវបានកម្លាំងសមត្ថកិច្ចជំនាញ នៃអធិការដ្ឋាននគរបាលស្រុកគិរីវង់ ធ្វើការស្រាវជ្រាវ រហូតឃាត់ខ្លួនបានចំនួន
ខេត្តតាកែវ ៖ បើតាមសេចក្តីរាយការណ៍បានឱ្យដឹងថា ជនសង្ស័យជាមុខសញ្ញាលួ.ចយ៉ាងសកម្មប្រចាំខេត្តតាកែវ កាលពីថ្ងៃទី១៤ ខែសីហា ឆ្នាំ២០២៣ ត្រូវបានកម្លាំងសមត្ថកិច្ចជំនាញ នៃអធិការដ្ឋាននគរបាលស្រុកគិរីវង់ ធ្វើការស្រាវជ្រាវ រហូតឃាត់ខ្លួនបានចំនួន៣នាក់ និងដកហូវត្ថុតាងមួយចំនួនផងដែរ។
តាមសេចក្តីរាយការណ៍បានឲ្យដឹងបន្តថា នៅថ្ងៃខែខាងលើនេះ កម្លាំងជំនាញរបស់អធិការដ្ឋាននគរបាលស្រុកគិរីវង់ ចេញល្បាតតាមមូលដ្ឋានក៏ប្រទះឃើញមុខសញ្ញាម្នាក់ឈ្មោះ សឿន ថុនា ភេទប្រុស អាយុ៣៤ឆ្នាំ មានទីលំនៅភូមិត្រពាំងស្រង់ ឃុំព្រះបាទជាន់ជុំ គឺជាមុខសញ្ញាលួ.ចយ៉ាងសកម្មក្នុងមូលដ្ឋាន ដែលសមត្ថកិច្ចកំពុងតាមដានជាយូរមកហើយ។
ប្រភពដដែលបន្តថា ដោយក្តាប់បានថា នៅនឹងផ្ទះជនសង្ស័យរួមមានសម្ភារៈ និងឧបករណ៍មិនប្រក្រតីជាច្រើន ដែលបំរើឲ្យសកម្មភាពបទល្មើស ពេលនោះសមត្ថកិច្ចក៏នាំខ្លួនជនសង្ស័យទៅធ្វើការសាកសួរ ក្រោមការដឹកនាំ និងបញ្ជារផ្ទាល់ពីលោកឧត្តមសេនីយ៍ទោ ស្នងការនគរបាលខេត្ត និងមានសុំការអនុញ្ញាតពីស្ថាប័នអយ្យអមសាលាដំបូងខេត្តផងដែរ ដើម្បីធ្វើការឆែកឆេរលំនៅឋានរបស់ជនសង្ស័យ។
ប្រភពដដែលបន្តទៀតថា នៅពេលចុះទៅឆែកឆេរនោះ ក៏បានរកឃើញសម្ភារៈ និងវត្ថុតាងពាក់ព័ន្ធបទល្មើសជាច្រើន រួមមានដូចជា ៖ ស្លាកលេខម៉ូតូចំនួន០៧, ប្រដាប់កាច់សោ.កម៉ូតូ, ប្រដាប់ឆ្កឹះសោរផ្ទះ, កាំមេរ៉ាសុវត្ថភាពចំនួន៤, សម្ភារៈសម្រាប់កែច្នៃម៉ូតូ ព្រមទាំងសម្បកទូរស័ព្ទមួយចំនួនធំទៀតផង។
ក្រោយពេលឆែកឆេររួច ជនសង្ស័យក៏បានឆ្លើយសារភាពថា «ខ្លួនពិតជាធ្លាប់បានធ្វើសកម្មភាពល្មើសដូចជា ៖ លួ.ចម៉ូតូនៅភ្នំពេញចំនួន២លើក (ដោយមិនចាំថ្ងៃខែ) ជាមួយឈ្មោះ អាដា ហៅ អ៊ុយក្រែន។ នៅថ្ងៃទី៤ ខែសីហា ឆ្នាំ២០២៣ វេលាម៉ោង៣កន្លះទៀបភ្លឺ លួ.ចម៉ូតូ១គ្រឿងនៅភូមិប្រជ្រាយ ឃុំអង្គប្រាសាទ ស្រុកគិរីវង់ ជាមួយឈ្មោះ អាដា ហៅ អ៊ុយក្រែន។ ចំណែកនៅថ្ងៃទី៨ ខែសីហា ឆ្នាំ២០២៣ វេលាម៉ោង២ពាក់កណ្តាលអធ្រាត្រ ខ្លួនគាស់ហាងលក់ទូរស័ព្ទដៃ រួចលួ.ចបានម៉ូតូ១គ្រឿង នៅភូមិព្រៃធំ ឃុំព្រះបាទជាន់ជុំ ស្រុកគិរីវង់ ខេត្តតាកែវ ដោយលួ.ចជាមួយឈ្មោះ ដា ហៅអ៊ុយក្រែន ។ រីឯបញ្ហាស្លាកលេខម៉ូតូ គឺឈ្មោះ ចិត្រ និងឈ្មោះ ដួង លួ.ចម៉ូតូពីភ្នំពេញបានដោះមកផ្ញើទុកនៅផ្ទះរបស់ខ្លួន ចំណែកទីលំនៅរបស់ឈ្មោះ ចិត្រ និងឈ្មោះដួង ខ្លួនមិនស្គាល់ពួកគេនោះទេ»។
ក្រោយពីបានស្តាប់ចម្លើយរបស់ជនសង្ស័យខាងលើរួចមក សមត្ថកិច្ចក៏បានស្រាវជ្រាវ និងស្វែងរកមុខសញ្ញាដែលពាក់ព័ន្ធ ទើបឈានដល់ការឃាត់ខ្លួនជនសង្ស័យចំនួន២នាក់បន្ថែមទៀត គឺម្នាក់ឈ្មោះ គួន លីដា (ហៅ អ៊ុយក្រែន) ភេទប្រុស អាយុ២៦ឆ្នាំ មានទីលំនៅភូមិទួលពង្រ ឃុំសោម ស្រុកគិរីវង់ ខេត្តតាកែវ។ និងម្នាក់ឈ្មោះ អ៊ុ គីមហ័ង ភេទស្រី អាយុ១៤ឆ្នាំ មានទីលំនៅសង្កាត់បឹងសាឡាង ខណ្ឌទួលគោក រាជធានីភ្នំពេញ។ នៅចំពោះមុខសមត្ថកិច្ចជនសង្ស័យទាំង២នាក់បានឆ្លើយសារភាពថា «ខ្លួនពិតជាជាប់ពាក់ព័ន្ធ និងចូលរួមធ្វើសកម្មភាពលួ.ចយ៉ាងសកម្មប្រចាំខេត្តតាកែវ ជាមួយឈ្មោះ សឿន ថុនា កន្លងមក ពិតប្រាកដមែន»។
ដោយយោងទៅលើចម្លើយសារភាពរបស់ជនសង្ស័យ និងផ្នែកលើវត្ថុតាងដែលដកហូតបានជាក់ស្តែង ពាក់ព័ន្ធបទល្មើសព្រហ្មទណ្ឌ សមត្ថកិច្ចក៏បានរៀបចំកសាងសំណុំរឿង រួចបញ្ជូនទៅកាន់សាលាដំបូង ដើម្បីចាត់ការតាមនីតិវិធីនៃច្បាប់៕
ចែករំលែកព័តមាននេះ