ភ្នំពេញ៖ លោក ឃួង ស្រេង ប្រធានគណៈបញ្ជាការឯកភាព រាជធានីភ្នំពេញ បានណែនាំដល់កងកម្លាំង និងអាជ្ញាធរខណ្ឌទាំង១៤ ត្រូវពង្រឹងការងារការពារសន្តិសុខសណ្ដាប់ធ្នាប់ អនាម័យបរិស្ថាន អោយកាន់តែល្អប្រសើរ ពិសេសនៅទីតាំងរដ្ឋសភា និងនៅ មុខបរមរាជវាំង នៅថ្ងៃទី២១ និង ២២សីហាខាងមុខនេះ ដែលជាថ្ងៃប្រជុំសភា និងការស្បថ ចូលកាន់តំណែង សម្រាប់រាជរដ្ឋាភិបាលអាណត្តិថ្មី។
ការជំរុញបែបនេះ បានធ្វើឡើង នារសៀលថ្ងៃទី១៤ សីហា ឆ្នាំ២០២៣ ក្នុងកិច្ចប្រជុំគណៈបញ្ជាការឯកភាពរាជធានីភ្នំពេញ នៅសាលារាជធានីភ្នំពេញ ដោយមានការចូលរួមពីកងកម្លាំងចំណុះអោយរដ្ឋបាលរាជធានីភ្នំពេញ និងអភិបាលខណ្ឌទាំង១៤។
ក្នុងកិច្ចប្រជុំនោះ លោក ឃួង ស្រេង បានថ្លែងនូវការអរគុណយ៉ាងជ្រាលជ្រៅបំផុតចំពោះ កងកម្លាំងនិងអាជ្ញាធរដែនដីទាំង ១៤ខណ្ឌ ដែលបានយកអស់កម្លាំងកាយចិត្តក្នុងកិច្ចការពារសន្តិសុខ សណ្ដាប់ធ្នាប់ នៅក្នុងពេលបោះឆ្នោតកន្លងមកនេះ បានយ៉ាងល្អ ហើយកិច្ចការនេះ លោក សុំឲ្យកងកម្លាំង ក៏ដូចជាអាជ្ញាធរ បន្តការយកចិត្តទុកដាក់បន្ថែមទៀត។
លោក ឃួង ស្រេង បានបន្តទៀតថា៖ នៅថ្ងៃទី២១និង២២សីហាខាងមុខនេះ យើងនឹងមានព្រឹត្តិការណ៍ធំៗ២ នោះ គឺការប្រជុំសភា និងការស្បថ ចូលកាន់តំណែង សម្រាប់រាជរដ្ឋាភិបាលថ្មី។ ដូច្នេះទេ លោកស្នើ អោយសមត្ថកិច្ចប៉ូលិស រៀបចំផែនការការពារសន្តិសុខឲ្យបានល្អប្រសើរបំផុត។
លោកបញ្ជាក់បន្តថា ក្នុងនាមកងកម្លាំង និងអាជ្ញាធរ ត្រូវជំរុញកិច្ចការពារសន្តិសុខ សណ្តាប់ជាមួយនឹងការរឹតបន្តឹង ការពិនិត្យជាតិអាកុល នៅក្នុងមូលដ្ឋាន អោយបានជាប់ជាប្រចាំ។
ជាមួយគ្នានោះ ការបង្ការគ្រោះអគ្គិភ័យ ក៏ជារឿងមួយ ដែលលោក ឃួង ស្រេង ជំរុញអោយកម្លាំង មានសមត្ថកិច្ច និងអាជ្ញាធរយកចិត្តទុកដាក់ខ្ពស់ផងដែរ។
លោក ឃួង ស្រេង បានបញ្ជាក់ថា សម្រាប់ថ្ងៃទី២១ និង២២ សីហាខាងមុខនេះ អាជ្ញាធរខណ្ឌដែលមានរដ្ឋសភា និងបរមរាជវាំង នៅក្នុងមូលដ្ឋានរបស់ខ្លួន ត្រូវតែរៀបចំសណ្ដាប់ធ្នាប់ អនាម័យបរិស្ថាន អោយបានល្អ ជាមួយនឹងការរក្សាអោយបាននូវសន្តិសុខខ្ពស់បំផុត នៅទីតាំងទាំង២នេះ៕
ចែករំលែកព័តមាននេះ