១ខែនេះ! កាណូតឈ្មួញសម្រុកចូលមកទិញស្រូវខ្មែរ រួចដឹកឆ្លងដែនទៅវៀតណាម(វីដេអូ)
- ស្វាយរៀង
រយៈពេល១ខែនេះ ឈ្មួញវៀតណាមសម្រុកចូលមកទិញស្រូវខ្មែរដល់ផែស្រូវប្រឡាយទាហាន នៃស្លាបច្រកទ្វារព្រំដែនអន្តរជាតិព្រៃវ័ល្ល៍
រយៈពេល១ខែនេះ ឈ្មួញវៀតណាមសម្រុកចូលមកទិញស្រូវខ្មែរដល់ផែស្រូវប្រឡាយទាហាន នៃស្លាបច្រកទ្វារព្រំដែនអន្តរជាតិព្រៃវ័ល្ល៍
ខេត្តស្វាយរៀង ៖ រយៈពេល១ខែនេះ ឈ្មួញវៀតណាមសម្រុកចូលមកទិញស្រូវខ្មែរដល់ផែស្រូវប្រឡាយទាហាន នៃស្លាបច្រកទ្វារព្រំដែនអន្តរជាតិព្រៃវ័ល្ល៍ ស្ថិតនៅក្នុងភូមិព្រៃវ័ល្ល៍ ឃុំថ្មី ស្រុកកំពង់រោទិ៍ ដោយក្នុង១ថ្ងៃៗ គឺមានកាណូតប៉ុកចៃធំៗចាប់ពី២០ទៅ៣០គ្រឿង ចូលមកនាំស្រូវចេញទៅប្រទេសវៀតណាម ចាប់ពី៦០តោនទៅ៧០០តោនក្នុង១ថ្ងៃ។
បើតាមអាជីវករខ្មែរ បានប្រាប់ឲ្យដឹងថា ឈ្មួញវៀតណាមចូលមកទិញស្រូវខ្មែរយើងដល់ផែកាណូតប្រឡាយទាហានតែម្តង។ ហើយស្រូវមានតម្លៃគួរសម ដោយស្រូវអ៊ីអ៊ែរ័ K56 វៀតណាមទិញក្នុង១គីឡូក្រាមតម្លៃ៧,០០០ដុង (គិតជាលុយខ្មែរស្មើនឹង១,៣៤០រៀល ក្នុង១គីឡូក្រាម)។
បើតាមសមត្ថកិច្ច ក៏បានឲ្យដឹងដែរថា រយៈពេល១ខែមកនេះ គឺចាប់ពីពាក់កណ្តាលខែកក្កដា ឆ្នាំ២០២៣ មកដល់ថ្ងៃទី១៣ ខែសីហានេះ តម្លៃស្រូវ អ៊ីអ៊ែ័រ K៥៦ គឺមានតម្លៃល្អគួរសម គឺក្នុង១គីឡូក្រាមស្រូវស្ងួតវៀតណាម ទិញពីចន្លោះ៧,០០០ដុង (ប្រាក់វៀតណាម) បើគិជាប្រាក់រៀលខ្មែរស្មើនឹង១,៣៤០រៀល ក៏ប៉ុន្តែមកដល់ថ្ងៃទី១៤ ខែសីហា ឆ្នាំ២០២៣នេះ ស្រូវ K៥៦ វៀតណាមទម្លាក់តម្លៃបន្តិច នៅចន្លោះត្រឹម១,៣០០រៀលក្នុង១គីឡូក្រាម។
ប្រភពដដែលបន្តថា ជាមធ្យមឈ្មួញនាំស្រូវចេញទៅប្រទេសវៀតណាមក្នុង១ថ្ងៃ ចាប់ពី៦០០តោនទៅ៧០០តោន។ ចំណែកស្រូវប្រាំង ក្នុងខេត្តស្វាយរៀង បានច្រូតកាត់ប្រមូលផលអស់បណ្តើរៗហើយ ចំពោះស្រូវដែលកំពុងនាំចេញ គឺនាំមកពីបណ្តាខេត្តនានា គឺខេត្តព្រៃវែង ខេត្តកំពង់ចាម ខេត្តកំពង់ធំ និងខេត្តពោធិ៍សាត់។
បើតាមបុរសម្នាក់ ដែលជាអាជីវករដឹកស្រូវមកពីខេត្តកំពង់ធំ បានប្រាប់ឲ្យដឹងថា ពួកគាត់ដើរប្រមូលទិញស្រូវពីកសិករផ្ទាល់នៅខេត្តកំពង់ធំ ដោយស្រូវអ៊ីអ៊ែរ័ K៥៦ (ស្រូវស្ងួត) ក្នុង១គីឡូក្រាមតម្លៃ១,២៧០រៀល រួចយកមកដល់ផែកាណូតប្រឡាយទាហាន វៀតណាមទិញក្នុង១គីឡូក្រាមចន្លោះពី៧,០០០ដុង ស្មើនឹង១,៣០០រៀលទៅ១,៣៤០រៀល។ ហើយក្នុងរថយន្តយីឌុប១គ្រឿង ដឹកបានត្រឹមតែ២៣តោនទៅ២៥តោនប៉ុណ្ណោះ បើគិតពីថ្លៃដឹក ថ្លៃកម្មករ និងថ្លៃផែថ្លឹង ស្ទើរតែគ្មានចំណេញនោះទេ គឺចំណេញតិចតួចណាស់។
ទោះបីជាយ៉ាងណា លោក សុខ សុទ្ធាវុធ ក៏បានមានប្រសាសន៍ដែរថា គិតចាប់ពីថ្ងៃ១ ខែសីហា រហូតដល់ថ្ងៃទី១៣ ខែសីហា ឆ្នាំ២០២៣នេះ អាជីវករនាំស្រូវចេញទៅប្រទេសវៀតណាម តាមច្រកនៃផែប្រឡាយទាហាន បានចំនួន១០,៨២០តោន ហើយជាមធ្យមស្រូវក្នុង១គីឡូក្រាម គឺតម្លៃ១១០០រៀល៕
ចែករំលែកព័តមាននេះ