ប្រជាពលរដ្ឋរាប់រយនាក់នាំគ្នាសម្រុកទៅដងប្រេង នៅចំណុចក្បែរផ្លូវដែករថភ្លើង ខណៈពេលដែលខ្សែរថភ្លើងដឹកប្រេងចេញពីខេត្តព្រះសីហនុ ឆ្ពោះមកក្រុងភ្នំពេញ លុះធ្វើដំណើរមកដល់ចំណុច
ខេត្តកែប ៖ បើតាមសេចក្តីរាយការណ៍បានឱ្យដឹងថា ប្រជាពលរដ្ឋរាប់រយនាក់នាំគ្នាសម្រុកទៅដងប្រេង នៅចំណុចក្បែរផ្លូវដែករថភ្លើង ខណៈពេលដែលខ្សែរថភ្លើងដឹកប្រេងចេញពីខេត្តព្រះសីហនុ ឆ្ពោះមកក្រុងភ្នំពេញ លុះធ្វើដំណើរមកដល់ចំណុចចន្លោះគីឡូលេខ១៤៩-១៤៨ នៅវេលាម៉ោង៥ព្រឹក ថ្ងៃទី១៤ ខែសីហា ឆ្នាំ២០២៣ ត្រង់ចំណុចភូមិដំណាក់ចង្អើរ សង្កាត់ព្រៃធំ ក្រុងកែប រថភ្លើងនោះក៏ដាច់ទូស៊ីទែនប្រេង បណ្ដាលឱ្យទង្គិចគ្នា ហើយធ្លាយស៊ីទែនប្រេងចំនួន២ទូ និងធ្លាក់កង់រថភ្លើងមួយផ្ទាំង បណ្ដាលឱ្យខ្ទាតចេញពីផ្លូវដែក និងបំណែករថភ្លើងជ្រុះរាយប៉ាយទៀតផង។ ដោយឡែកប្រេងដែលហូរចេញពីស៊ីទែនប្រេងនោះ មានចម្ងាយ២០០ម៉ែត្រ ធ្វើឱ្យរថភ្លើងរត់ទៅមុខលែងរួចតែម្ដង។
បើតាមក្រុមអ្នកមើលការខុសត្រូវខាងរថភ្លើង ក៏បាននិយាយឱ្យដឹងថា រថភ្លើងមិនមែនធ្លាក់ពីលើផ្លូវដូចបណ្ដាញសង្គមគេបង្ហោះនោះទេ គឺទូដឹកប្រេងវាដាច់ ហើយទូ និងទូ វាបុ.កគ្នា ទើបបណ្ដាលឱ្យធ្លាយប្រែងហូរពេញវាលស្រែតែម្ដង។
អ្នកមើលការខុសត្រូវ នៅទីនោះក៏និយាយទៀតថា ទូរថភ្លើងចំនួន៤៧ទូ ត្រូវបានកាត់យកទៅរក្សាទុកនៅស្ថានីយកំពត និងយកទៅភ្នំពេញវិញហើយ។
ចំណែកលោក ផូយ ប៊ុនធី ប្រធានការិយាល័យនគរបាលចរាចរណ៍ផ្លូវគោកខេត្តកែប ក៏បាននិយាយដែរថា គ្រោះថ្នាក់រថភ្លើងដឹកប្រេងនេះ មិនបណ្ដាលអោយអ្នកណាម្នាក់រងរបួសធ្ងន់ធ្ងរនោះទេ ប៉ុន្តែអ្វីដែលបាត់បង់នោះ គឺប្រេងរបស់រដ្ឋ។
ចែករំលែកព័តមាននេះ