មហាសេដ្ឋីថៃ១រូប ត្រូវកាត់ទោសដាក់ពន្ធនាគារពាក់ព័ន្ធរឿងរំលោ.ភច្បាប់ដីធ្លី
ថៃ ៖ យោងតាមគណៈកម្មាធិការជាតិប្រឆាំងអំពើពុករលួយរបស់ថៃ ដែលហៅកាត់ថា NACC
ថៃ ៖ យោងតាមគណៈកម្មាធិការជាតិប្រឆាំងអំពើពុករលួយរបស់ថៃ ដែលហៅកាត់ថា NACC បានឱ្យដឹងថា តុលាការព្រហ្មទណ្ឌ នៃសំណុំរឿងពុករលួយ និងប្រព្រឹត្តិខុសភូមិភាគទី ៨ បានកាត់ទោសមហាសេដ្ឋីថៃ លោក Prayudh Mahagitsiri ឱ្យជាប់ពន្ធនាគាររយៈពេល ២ឆ្នាំ និង ៨ខែ ជុំវិញរឿងអាស្រូ.វដីធ្លី។ នេះបើយោងតាមប្រភពពី បាងកកប៉ុស្តិ៍ ចេញផ្សាយនៅថ្ងៃទី១១ ខែសីហា ឆ្នាំ ២០២៣។
លោក Niwatchai Kasemongkol អគ្គលេខាធិការ NACC បានថ្លែងថា តុលាការបានរកឃើញអតីតមន្ត្រីដីធ្លីចំនួន ១០នាក់ នៅក្នុងខេត្តក្រាបី (Krabi) មានពិរុទ្ធពីបទចេញប័ណ្ណកម្មសិទ្ធិខុសច្បាប់សម្រាប់ដីរដ្ឋ ដែលគ្របដណ្តប់លើផ្ទៃដីប្រហែល ៣.០៤ហិកតា នៅក្នុងស្រុកមឿង (Muang) ។ លោក Niwatchai បានបន្តថា មហាសេដ្ឋី Prayudh Mahagitsiri ត្រូវបានរកឃើញថា មានកំហុសក្នុងការជួយមន្ត្រីរដ្ឋទាំងនោះ ដើម្បីចេញប័ណ្ណកម្មសិទ្ធិខុសច្បាប់។
លោក Niwatchai បន្តថា ជនជាប់ចោទម្នាក់ ត្រូវបានកាត់ទោសជាប់ពន្ធនាគាររយៈពេល៦ឆ្នាំ ខណៈដែលអ្នកផ្សេងទៀត រួមទាំងលោក Prayudh ត្រូវកាត់ទោសម្នាក់ៗ ៤ឆ្នាំដូចគ្នា។ ប៉ុន្តែទោះជាយ៉ាងណា ដោយសារតែចម្លើយសារភាព ជនជាប់ចោទទី១ត្រូវបានបន្ធូរបន្ថយទោសមកត្រឹម៤ឆ្នាំ ចំណែកអ្នកផ្សេងទៀត រួមទាំងលោក Prayudh ត្រូវបន្ធូរបន្ថយមកនៅត្រឹម ២ឆ្នាំ និង ៨ខែ ស្របពេលដែលតុលាការក៏បានបញ្ជាឱ្យដកហូតប័ណ្ណកម្មសិទ្ធិដីធ្លីផងដែរ។
យ៉ាងណាមិញ ប្រភពពីបាងកកប៉ុស្ត៍បានឱ្យដឹងថា លោក Prayudh បានលក់ដីទៅឱ្យអ្នកផ្សេងទៀតរួចទៅហើយ នៅក្នុងតម្លៃ ៤០០លានបាត ដែលស្មើនឹង ១១.៤លានដុល្លារអាមេរិក កាលពីឆ្នាំ ២០១៧ ។
លោក Niwatchai បាននិយាយថា អ្នកដែលត្រូវបានរកឃើញថាមានកំហុស នៅតែមានសិទ្ធិប្តឹងឧទ្ធរណ៍ ខណៈដែលលោកបន្ថែមចុងក្រោយថា ករណីមួយផ្សេងទៀត NACC បានចោទប្រកាន់អ្នកនយោបាយ១០រូប រួមទាំងសមាជិកសភា និងសមាជិកព្រឹទ្ធសភា ជុំវិញការកាន់កាប់ដីខុសច្បាប់ ឬជួយមន្ត្រីរដ្ឋក្នុងការចេញប័ណ្ណកម្មសិទ្ធិខុសច្បាប់។
យោងតាមទិន្នន័យពីទស្សនាវដ្តីពាណិជ្ជកម្មអាមេរិក Forbes បានបង្ហាញថា មហាសេដ្ឋីថៃ Prayudh Mahagitsiri មានទ្រព្យសុទ្ធចំនួន ២.២ពាន់លានដុល្លារអាមេរិក ឈរនៅចំណាត់ទី១៤២៨ ពិភពលោក។
ជំនួញធំរបស់មហាសេដ្ឋីវ័យ៧៧ឆ្នាំរូបនេះ គឺផលិតផលកាហ្វេគុណភាព ដែលជាក្រុមហ៊ុនបណ្តាក់ទុនរួមគ្នាជាមួយនឹងក្រុមហ៊ុន Nestle អស់រយៈពេលជាយូរមកហើយ ជាមួយនឹងចំណែកទីផ្សារ ៩០% កាហ្វេគុណភាពរបស់លោក បាននិងកំពុងរកប្រាក់ចំណូលលើវប្បធម៌កាហ្វេ ដែលកំពុងកើនឡើងរបស់ប្រទេសថៃ។ លោកក៏មានភាគហ៊ុននៅក្នុងក្រុមហ៊ុនដែកថែប ទង់ដែង ការដឹកជញ្ជូន ការខួងយករ៉ែ និងការអភិវឌ្ឍន៍អចលនទ្រព្យផងដែរ៕
ចែករំលែកព័តមាននេះ