ប្រធានគណៈកម្មាធិការកីឡាអូឡាំពិកអាហ្វ្រិកខាងត្បូង បានបញ្ជាក់សាជាថ្មីអំពីបំណងរបស់ប្រទេសខ្លួនដែលចង់ចូលដេញថ្លៃធ្វើជាម្ចាស់ផ្ទះរៀបចំការប្រកួតកីឡាអូឡាំពិករដូវក្តៅឆ្នាំ២០២០។ មន្រ្តីរូបនេះបាននិយាយថា កិច្ចប្រជុំរបស់ IOCក្នុងពេលខាងមុខនេះ គឺជាឱកាសមួយដែលគួរឲ្យទាក់ទាញអារម្មណ៍ ។
លោកGideon Samបាននិយាយថា កិច្ចប្រជុំរបស់គណៈកម្មាធិការអូឡាំពិកពិភពលោកIOCនៅទីក្រុងDurbanថ្ងៃទី៤-៩ខែកក្កដាខាងមុខនេះ គឺជាឱកាសមួយផ្សេងទៀតដើម្បីបង្ហាញបណ្តាមេដឹកនាំកីឡាពិភពលោក ពីអ្វីដែលយើងអាចធ្វើឲ្យមានការរួបរួមគ្នានៅក្នុងប្រទេសនេះ។
ប្រទេសអាហ្វ្រិកខាងត្បូងបានតាំងចិត្តរួចជាស្រេច ក្នុងការចូលដេញថ្លៃធ្វើជាម្ចាស់ផ្ទះប្រកួតកីឡាអូឡាំពិករដូវក្តៅ ហើយតាមដែលលោកSamថា អូឡាំពិកឆ្នាំ២០២០គឺជាការស័ក្តិសមបំផុត។
លោកSamបានបន្តថា៖«ដោយមានការតាំងចិត្តចូលរួមដេញថ្លៃធ្វើជាម្ចាស់ផ្ទះរៀបចំការប្រកួតអូឡាំពិករដូវក្តៅ ការប្រជុំលើកនេះនឹងផ្តល់ឱកាសឲ្យយើងបង្ហាញពីសមត្ថភាពរបស់ខ្លួនក្នុងការទាក់ទាញចំណាប់អារម្មណ៍បណ្តាមេដឹកនាំកីឡា។ នេះគឺជាការចូលរួមដេញថ្លៃលើកទី១របស់ទ្វីបអាហ្វ្រិក។
សូមបញ្ជាក់ថា ប្រទេសអាហ្វ្រិកខាងត្បូងទទួលបាននូវការសរសើរទូទាំងពិភពលោកចំពោះជោគជ័យដែលខ្លួនសម្រេចបាននៅក្នុងការធ្វើជាម្ចាស់ផ្ទះប្រកួតបាល់ទាត់ពិភពលោក២០១០ (World Cup 2010)។
ដោយឡែកកាលពីឆ្នាំទៅមិញ គណៈកម្មាធិការអូឡាំពិកអាហ្វ្រិកខាងត្បូង ក៏ធ្លាប់បានប្រកាសផងដែរថា ខ្លួននឹងគាំទ្រទីក្រុងDurbanធ្វើជាបេក្ខភាពចូលប្រកួតប្រជែងក្នុងការដេញថ្លៃអូឡាំពិកឆ្នាំ២០២០។
បំណងនៃការចូលដេញថ្លៃខាងលើនេះ នៅមិនទាន់បានប្រកាសឲ្យដឹងជាផ្លូវការនៅឡើយទេ។ គណៈកម្មាធិការអូឡាំពិកអាហ្វ្រិកខាងត្បូង ទំនងជារង់ចាំដល់ការប្រជុំរបស់IOCនៅខែកក្កដាចប់សិន ទើបប្រកាសពីបំណងរបស់ខ្លួនជាផ្លូវការ។
IOCបានទុកពេលឲ្យរហូតដល់ថ្ងៃទី១ខែកញ្ញា សម្រាប់បណ្តាទីក្រុងដែលចង់ចុះឈ្មោះចូលដេញថ្លៃរៀបចំការប្រកួតអូឡាំពិកឆ្នាំ២០២០។ មកដល់ឥឡូវនេះ មានតែទីក្រុងរ៉ូមមួយប៉ុណ្ណោះដែលបានប្រកាសឈ្មោះចូលដេញថ្លៃជាផ្លូវការ ។ ទីក្រុងតូក្យូ អ៊ីស្តង់ប៊ុល ដូហានិងទីក្រុងឌូបៃ សុទ្ធតែជាទីក្រុងដែលមានសក្តានុពលក្នុងការប្រកួតប្រជែងគ្នាដេញថ្លៃ។ ចំណែកលទ្ធផលនឹងត្រូវគេប្រកាសឲ្យដឹងនៅឆ្នាំ២០១៣។
Durbanគឺជាទីក្រុងធំបំផុតលំដាប់ទី៣របស់ប្រទេសអាហ្វ្រិកខាងត្បូង ហើយក៏ធ្លាប់ជាទីកន្លែងទទួលការប្រកួតWorld Cupផងដែរ៕
ចែករំលែកព័តមាននេះ