សមត្ថកិច្ចនគរបាលក្រុងកំពង់ឆ្នាំង បានសហការជាមួយនគរបាលការិយាល័យព្រហ្មទណ្ឌកំរិតស្រាល នៃស្នងការដ្ឋាននគរបាលខេត្ត និងសមត្ថកិច្ចនគរបាលមូលដ្ឋាន ចុះស្រាវជ្រាវ និងធ្វើការឃាត់ខ្លួនជនសង្ស័យចំនួន៣នាក់ កាលពី
ខេត្តកំពង់ឆ្នាំង ៖ សមត្ថកិច្ចនគរបាលក្រុងកំពង់ឆ្នាំង បានសហការជាមួយនគរបាលការិយាល័យព្រហ្មទណ្ឌកំរិតស្រាល នៃស្នងការដ្ឋាននគរបាលខេត្ត និងសមត្ថកិច្ចនគរបាលមូលដ្ឋាន ចុះស្រាវជ្រាវ និងធ្វើការឃាត់ខ្លួនជនសង្ស័យចំនួន៣នាក់ កាលពីរសៀលថ្ងៃទី៧ ខែសីហា ឆ្នាំ២០២៣ បន្ទាប់ពីក្រុមជនទាំងនេះ មានគ្នាប្រមាណ១០នាក់បានប្រើអំពើហិ.ង្សា ស្ទាក់កា.ប់ និងវា.យកម្ទេចម៉ូតូរបស់ជនរងគ្រោះ ដែលហេតុការណ៍នេះបង្កឡើងកាលពីវេលាម៉ោង៣និង៣០នាទីទៀបភ្លឺឈានចូលថ្ងៃទី៦ ខែសីហា ឆ្នាំ២០២៣។
ជនសង្ស័យទាំង៣នាក់ខាងលើនេះ បាននាំខ្លួនមកកាន់អធិការនគរបាលក្រុង ដើម្បីសាកសួរ រួមមាន ៖ ១- ឈ្មោះ សំអុន សុវឌ្ឍនា ហៅវត្ត អាយុ១៦ឆ្នាំ មានទីលំនៅភូមិអណ្តូងឬស្សី ឃុំស្រែថ្មី ស្រុករលាប្អៀរ, ២- ឈ្មោះ មាន ជីវ័ន្ត ហៅមាន់ អាយុ១៦ឆ្នាំ ទីលំនៅភូមិម៉ុងបារាំង សង្កាត់ប្អេរ ក្រុងកំពង់ឆ្នាំង និង៣- ឈ្មោះ កែវ រតនា ហៅរ័ត្នតូច អាយុ១៤ឆ្នាំ ទីលំនៅភូមិប្អេរ សង្កាត់ប្អេរ។ ដោយឡែកជនសង្ស័យចំនួន៧នាក់ទៀត នាំគ្នារត់គេចខ្លួនបាត់អស់ ហើយសមត្ថកិច្ចកំពុងតែធ្វើការស្រាវជ្រាវបន្ត ដើម្បីតាមចាប់ខ្លួនហើយ។
គួរបញ្ជាក់ថា ដូចក្នុងរូបភាពដែលបានថត និងបង្ហោះនៅលើបណ្តាញសង្គមអំពីសកម្មភាពហិ.ង្សាដែលកើតឡើងកាលពីរំលងអធ្រាត្រឈានចូលថ្ងៃទី៦ ខែសីហា ឆ្នាំ២០២៣ ដោយមានជនបង្កមួយក្រុមមានគ្នាប្រមាណ១០នាក់ ប្រើប្រាស់ហិ.ង្សាវា.យកម្ទេចម៉ូតូរបស់ជនរងគ្រោះ តាមបណ្តោយផ្លូវជាតិលេខ៥ ចំណុចមុខហាងកាត់កញ្ចក់យីហោ «លី ហុង» ស្ថិតក្នុងភូមិស្រែព្រីង សង្កាត់កំពង់ឆ្នាំង ក្រុងកំពង់ឆ្នាំង។
ក្រោយមានបាតុភាពនេះកើតឡើង សមត្ថកិច្ចក្រុងកំពង់ឆ្នាំង បានសហការគ្នាជាមួយនគរបាលខេត្ត ធ្វើការស្រាវជ្រាវជាបន្ទាន់ និងឃាត់ខ្លួនជនសង្ស័យចំនួន៣នាក់ ក្នុងចំណោយគ្នាជាច្រើននាក់ ។
ជុំវិញករណីខាងលើនេះ សមត្ថកិច្ចឲ្យប្រាប់ដឹងថា កើតឡើងដោយសារតែទំនាស់ពាក្យសម្ដីគ្នា នៅក្នុងក្លិបកម្សាន្តមួយកន្លែង ស្ថិតក្នុងសង្កាត់កំពង់ឆ្នាំង។ លុះក្រោយមក ខណៈពេលជនរងគ្រោះឈ្មោះ ឡុង ឌីណា អាយុ៣០ឆ្នាំ មានទីលំនៅក្នុងភូមិអណ្តូងដូងឬស្សី ឃុំស្រែថ្មី ស្រុករលាប្អៀរ បានចេញពីក្លិបត្រឡប់ទៅផ្ទះវិញ ក៏ត្រូវជនសង្ស័យដែលមានគ្នាប្រមាណ១០នាក់ នាំគ្នាស្ទាក់ព្រួតវា.យជនរងគ្រោះតែម្ដង។ ប៉ុន្តែគ្រានោះជនរងគ្រោះក៏រត់គេចខ្លួនបាត់ បន្សល់ទុកសល់តែម៉ូតូម៉ាកហុងដា សេ១២៥ ពាក់ស្លាកលេខ កំពង់ឆ្នាំង1C.6511 ហើយក៏ត្រូវជនដៃដល់កា.ប់ និងវា.យបំផ្លាញ បណ្តាលឱ្យខ្ទេចតែម្តង។
ក្រោយការសាកសួរ សមត្ថកិច្ចនគរបាលក្រុងកំពង់ឆ្នាំង បានបញ្ជូនជនសង្ស័យទាំង៣នាក់ រួមទាំងវត្ថុតាង ទៅកាន់ស្នងការដ្ឋាននគរបាលខេត្ត ដើម្បីកសាងសំណុំរឿងបញ្ជូនទៅតុលាការបន្តទៀត៕
ចែករំលែកព័តមាននេះ