ខេត្តស្វាយរៀង ៖ ប្រជាពលរដ្ឋឃុំម្រាម បានអំពាវសុំឲ្យអាជ្ញាធរមេត្តាជួសជុលផ្លូវលំប្រវែងជាង០៧គីឡូម៉ែត្រ ចាប់ពីភូមិម្រាម ឃុំម្រាម ដល់ភូមិក្រញូងមុខដា ឃុំមុខដា ស្រុករមាសហែក កំពុងរងការស្រុតខូចជារណ្តៅ…
ខេត្តស្វាយរៀង ៖ ប្រជាពលរដ្ឋឃុំម្រាម បានអំពាវសុំឲ្យអាជ្ញាធរមេត្តាជួសជុលផ្លូវលំប្រវែងជាង០៧គីឡូម៉ែត្រ ចាប់ពីភូមិម្រាម ឃុំម្រាម ដល់ភូមិក្រញូងមុខដា ឃុំមុខដា ស្រុករមាសហែក កំពុងរងការស្រុតខូចជារណ្តៅ ទឹកដក់ជាប្រឡាយ មានភក់ល្បប់ ពិបាកធ្វើដំណើរជាខ្លាំង ជាពិសេស សិស្សានុស្សិស ធ្វើដំណើរទៅសាលារៀន និងពេលមានសមាជិកគ្រួសារ មានជំងឺត្រូវទៅមន្ទីរពេទ្យនៅពេលយប់ ។
ប្រជាពលរដ្ឋបានលើកឡើងទៀតថា ផ្លូវលំមួយខ្សែនេះជួសជុលកាលពីឆ្នាំ២០២០ ផ្លូវដីក្រាលក្រួសក្រហម ពេលខែប្រាំងហុយ ដោយមានរថយន្តធុនធំ ធុនយក្សយីឌុបបើកបរចរាចរណ៍ច្រើនបង្កឲ្យហុយដីចូលផ្ទះប្រជាពលរដ្ឋប៉ះពាល់ដល់សុខភាពប្រជាពលរដ្ឋដែលរស់នៅតាមបណ្តោយផ្លូវ ពេលរដូវវស្សា ស្រុតខូចក្លាយជារណ្តៅ ក្រហេងក្រហូង ។
ហើយដល់ឆ្នាំ២០២៣នេះ គឺស្រុតខូចដក់ទឹកលើថ្នល់ក្លាយជាប្រឡាយ ភក់ល្បប់ បង្កឲ្យរអឹល ពិបាកធ្វើដំណើរជាខ្លាំង សូមឲ្យអាជ្ញាធរមេត្តាជួយដោះស្រាយ។ ប្រជាពលរដ្ឋបានធ្វើការអំពាវនាវនេះកើតឡើងនៅព្រឹកថ្ងៃទី០៨ សីហា ២០២៣ ស្ថិតនៅភូមិម្រាម ឃុំម្រាម ស្រុករមាសហែក ។
បើតាមរដ្ឋបាលស្រុករមាសហែកបានឲ្យដឹងថា ផ្លូវលំ១ខ្សែនេះ មានទទឹង១៣ម៉ែត្រ ប្រវែងជាង០៧គីឡូម៉ែត្រ ចាប់ពីផ្លូវជាតិលេខ១៣ ត្រង់ចំណុចភូមិក្រញូងមុខដាឃុំមុខដា តភ្ជាប់ទៅដល់ភូមិម្រាមឃុំម្រាមស្រុករមាសហែកឆ្ពោះទៅដល់ភូមិព្រះវិហារឃុំច្រេសស្រុកមេសាងខេត្តព្រៃវែង ជាផ្លូវរបស់មន្ទីរអភិវឌ្ឍន៍ជនបទខេត្តស្វាយរៀងជាអ្នកជួសជុលថែទាំ។
ទាក់ទិនករណីនេះដែរ លោកសំ លីតូ ប្រធានមន្ទីរអភិវឌ្ឍន៍ជនបទខេត្តស្វាយរៀងបានប្រាប់កោះសន្តិភាពថា ផ្លូវ១ខ្សែ ប្រវែងជា០៧គីឡូម៉ែត្រនេះ គឺចាប់ពីកែងវត្តគ្រញូងរហូតទៅដល់ភូមិព្រះវិហារ ឃុំច្រេសស្រុកមេសាង គឺបែងចែកជាពីមន្ទីរអភិវឌ្ឍន៍ជនបទខេត្តជួសជុលពាក់កណ្តាល ក្រសួងសាធារណៈការ និងដឹកជញ្ជូនជួសជុលពាក់កណ្តាល ហើយគម្រោងជួសជុលផ្លូវគឺការជួសជុលបន្ទាន់ នៅក្នុងឆ្នាំ២០២០ដើម្បីឲ្យប្រជាពលរដ្ឋបានធ្វើដំណើរសិន។
លោកសំ លីតូ បន្តទៀតថា ឆ្នាំកន្លងមក ការថែទាំ របស់ក្រសួងសាធារណៈការនិងដឹកជញ្ជូនពាក់
កណ្តាល មន្ទីរអភិវឌ្ឍជនបទខេត្តស្វាយរៀងពាក់កណ្តាល ដោយមានរថយន្តធុនធំដឹកទំនិញធ្ងន់ធ្វើចរាចរណ៍នៅលើផ្លូវនេះច្រើនបង្កឲ្យស្រុតខូចបែបនេះ។
លោកសំ លីតូ បន្តទៀតថា មន្ទីរអភិវឌ្ឍជនបទខេត្តស្វាយរៀងបានចុះពិនិត្យរួចលើកគម្រោងដាក់សំណើចូលទៅក្រសួងអភិវឌ្ឍជនបទរួចហើយ ក្រសួងកំពុងទំនាក់ទំនងរកអង្គការដៃគូ ដើម្បីជួសជុលផ្លូវឡើងវិញ ហើយខាងថ្នាក់ជាតិនឹងចុះមកសិក្សាគម្រោងឡើងវិញ ក៏ប៉ុន្តែមិនដឹងថារ ក្រសួងរកអង្គការដៃគូ មកអនុវត្តគម្រោង នៅពេលណានោះទេ ។
ទឹកដល់ច្រមុះហើយប្រជាពលរដ្ឋមិនអាចរង់ចាំតទៅទៀតបានទេ ទើបពួកគាត់សូមអំពាវនាវដល់ក្រសួងអភិវឌ្ឍជនបទ ជាពិសេស សូមរាជរដ្ឋាភិបាលមត្តា ជួយអន្តរាគមន៍ដោះស្រាយ ប្រជាពលរដ្ឋពិបាកធ្វើដំណើរខ្លាំងណាស់ ។
ចែករំលែកព័តមាននេះ