ខេត្តព្រះសីហនុ ៖ ទីតាំងភ្នាល់បាល់២កន្លែងធំៗ ស្ថិតនៅក្នុងសង្កាត់លេខ២ និងសង្កាត់លេខ៣នៃក្រុងព្រះសីហនុ កំពុងបើកលេងយ៉ាងរលូនដោយមិនឃើញអាជ្ញាធរដែនដី ឬសមត្ថកិច្ចពាក់ព័ន្ធណាធ្វើដឹងធ្វើឮឡើយ ។ តាមប្រជាពលរដ្ឋបានបង្ហាញថា ទីតាំងភ្នាល់បាល់ទាំងនេះ គឺមានក្នុងសង្កាត់លេខ២ មួយកន្លែងទល់មុខធនាគារអេស៊ីលីដា និងនៅក្នុងសង្កាត់៣មួយកន្លែងក្បែរផ្ទះសំណាក់ឌី ឌីម៉ាត
ខេត្តព្រះសីហនុ ៖ ទីតាំងភ្នាល់បាល់២កន្លែងធំៗ ស្ថិតនៅក្នុងសង្កាត់លេខ២ និងសង្កាត់លេខ៣នៃក្រុងព្រះសីហនុ កំពុងបើកលេងយ៉ាងរលូនដោយមិនឃើញអាជ្ញាធរដែនដី ឬសមត្ថកិច្ចពាក់ព័ន្ធណាធ្វើដឹងធ្វើឮឡើយ ។
តាមប្រជាពលរដ្ឋបានបង្ហាញថា ទីតាំងភ្នាល់បាល់ទាំងនេះ គឺមានក្នុងសង្កាត់លេខ២ មួយកន្លែងទល់មុខធនាគារអេស៊ីលីដា និងនៅក្នុងសង្កាត់៣មួយកន្លែងក្បែរផ្ទះសំណាក់ឌី ឌីម៉ាត ដែលស្ទើររៀងរាល់ថ្ងៃ គេឃើញក្រុមអ្នកលេងភ្នាល់បាល់ចូលទៅលេងយ៉ាងលាក់លៀមបំផុត ។ អ្នកខ្លះមុននឹងចូលទៅចាក់ត្រូវបានម្ចាស់ផ្ទះការពារសុវត្ថិភាពម៉ូតូរថយន្ដឱ្យចូលទៅចាក់តាមសម្រួល និងខ្លះទៀតរង់ចាំមើលផ្លូវសមត្ថកិច្ចនគរបាលខ្លាចចូលទៅបង្ក្រាប។
ប្រជាពលរដ្ឋមួយរូបដែលនិយមចាក់ភ្នាល់បាល់និយាយថា ទីតាំង២កន្លែងនេះចេះទាក់ទងជាមួយភ្ញៀវនិងអាជ្ញាធរដែនដីសម្បើមណាស់ហើយថែមទាំងឱ្យអាជ្ញាធរដែនដីរត់ការបង់ខែជូនទៅសមត្ថកិច្ចគ្រប់លំដាប់ថ្នាក់ទៀតផង ទើបធ្វើឱ្យកន្លែងនេះមានសុវត្ថិភាពល្អ ។ ប៉ុន្ដែការលេងភ្នាល់របស់អ្នកទាំងនោះ តែងនាំគ្នានិយាយថា ចាញ់ច្រើនជាងឈ្នះ ហើយអ្នកខ្លះចាញ់រហូតដល់លក់រថយន្ដ ម៉ូតូ និងខ្លះទៀតលែងហ៊ានចូលផ្ទះក៏មាន ។ ទីតាំង២កន្លែងនេះ គឺគេមានលក់កាហ្វេ ដើម្បីបំភាន់ភ្នែកសមត្ថកិច្ច ។
ប្រជាពលរដ្ឋនិយាយទៀតថា នៅពេលដាច់ខែម្ដងៗ គេឃើញមានទាំងមន្ត្រីអាជ្ញាធរសមត្ថកិច្ចទៅយកលុយពីម្ចាស់ទីតាំងផ្ទាល់ភ្នាល់បាល់២កន្លែងនេះមិនដែលខានទេ ។ នេះជាដំណឹងមួយសម្រាប់អ្នកនិយមលេងភ្នាល់បាល់ បើចង់ចាញ់ឈ្នះសូមអញ្ជើញទៅលេងភ្នាល់ល្បែងស៊ីសងនៅទីតាំង២កន្លែងនេះចុះ តែកុំភ្លេចថា រឿងឈ្នះកុំសង្ឃឹមឱ្យសោះ បើរឿងចាញ់ចាំ តែត្រៀមលក់រថយន្ដលក់ម៉ូតូឱ្យហើយទៅ ។
ទាក់ទិននឹងព័ត៌មានខាងលើនេះ កោះសន្តិភាពមិនអាចទាក់ទងសុំការបំភ្លឺពីម្ចាស់ទីតាំងទាំង២ខាងលើបានទេ ឯចំពោះអាជ្ញាធរដែនដី និងសមត្ថកិច្ចពាក់ព័ន្ធឆ្លើយថា ពុំបានដឹងទេ!ហើយសមត្ថកិច្ចក៏មិនដែលបានទទួលលុយពីកន្លែងទាំងនោះមួយរយរៀលណាដែរ ៕
ចែករំលែកព័តមាននេះ