រាជធានីភ្នំពេញ ៖ នគរបាលផ្នែកព្រហ្មទណ្ឌនៃអធិការដ្ឋានខណ្ឌដូនពេញបានឃាត់ខ្លួនជនសង្ស័យជួញដូរថ្នាំញៀនម្នាក់ កាលពីថ្ងៃទី៩ ឧសភា ២០១១ វេលាម៉ោង១៧និង៣០នាទី នៅចំណុចផ្ទះលេខ១៦១ ខាងត្បូងសាលាគរុកោសល្យ ភូមិទី៤ សង្កាត់ចតុមុខ ខណ្ឌដូនពេញ បន្ទាប់ពីសមត្ថកិច្ចឆែកឆេររកឃើញថ្នាំញៀនប្រភេទម៉ាទឹកកក
រាជធានីភ្នំពេញ ៖ នគរបាលផ្នែកព្រហ្មទណ្ឌនៃអធិការដ្ឋានខណ្ឌដូនពេញបានឃាត់ខ្លួនជនសង្ស័យជួញដូរថ្នាំញៀនម្នាក់ កាលពីថ្ងៃទី៩ ឧសភា ២០១១ វេលាម៉ោង១៧និង៣០នាទី នៅចំណុចផ្ទះលេខ១៦១ ខាងត្បូងសាលាគរុកោសល្យ ភូមិទី៤ សង្កាត់ចតុមុខ ខណ្ឌដូនពេញ បន្ទាប់ពីសមត្ថកិច្ចឆែកឆេររកឃើញថ្នាំញៀនប្រភេទម៉ាទឹកកកមួយចំនួន។ មន្ត្រីនគរបាលផ្នែកព្រហ្មទណ្ឌខណ្ឌដូនពេញបានឱ្យដឹងថា កាលពីវេលាម៉ោងជាង៥ល្ងាចថ្ងៃទី៩ ឧសភា កម្លាំងនគរបាលផ្នែកព្រហ្មទណ្ឌខណ្ឌដូនពេញបានជិះម៉ូតូល្បាតក្នុងភូមិសាស្ត្ររបស់ខ្លួន លុះមកដល់ចំណុចមុខសាលាគរុកោសល្យវិថីព្រះសុរាម្រឹត ស្ថិតក្នុងភូមិទី៤ សង្កាត់ចតុមុខ ខណ្ឌដូនពេញ ប្រទះឃើញបុរសម្នាក់កំពុងឈររេរាក្បែរម៉ូតូក៏មានការសង្ស័យ និងហៅជននោះដើម្បីសាកសួរ និងឆែកឆេរ ។
សមត្ថកិច្ចបានរកឃើញម្សៅពណ៌សថ្លាចំនួន៣កញ្ចប់តូច ដែលជននេះលាក់ទុកក្នុងហោប៉ៅខោ ទើបឃាត់ខ្លួនបញ្ជូនមកអធិការដ្ឋាននគរបាលខណ្ឌដូនពេញ ដើម្បីសាកសួរ ។ ជនសង្ស័យចែកចាយគ្រឿងញៀនដែលនគរបាលឃាត់ខ្លួនមានឈ្មោះពាក្យ សុភ័ក្រ ភេទប្រុស អាយុ២០ឆ្នាំ ស្នាក់នៅផ្ទះជួលក្រោយមន្ទីរពេទ្យចិន សង្កាត់បឹងកេងកងទី២ ខណ្ឌចំការមន។ សមត្ថកិច្ចដកហូតបានថ្នាំញៀនប្រភេទម៉ាទឹកកកចំនួន២កញ្ចប់តូច កញ្ចប់ធំមួយ និងម៉ូតូមួយគ្រឿងម៉ាកស្តេប ពាក់ស្លាកលេខ ភ្នំពេញ 1C-5706 ។ ជនសង្ស័យខាងលើ បច្ចុប្បន្នកំពុងឃាត់ខ្លួនបណ្តោះអាសន្ននៅអធិការដ្ឋានខណ្ឌដូនពេញ និងត្រូវបញ្ជូនទៅសាលាដំបូងរាជធានីភ្នំពេញ ក្រោយពីសាកសួររួច៕
ចែករំលែកព័តមាននេះ