ADផ្ទាំងផ្សព្វផ្សាយពាណិជ្ជកម្ម

ភ្ញាក់ផ្អើល, នាយករដ្ឋមន្ត្រីកាណាដា និងភរិយាប្រកាសចែកផ្លូវគ្នាក្រោយរៀបការរយៈពេល១៨ឆ្នាំ

11 ខែ មុន

០៣ ខែ សីហា ឆ្នាំ ២០២៣ ម៉ោង ០២:៤២

នាយករដ្ឋមន្ត្រីកាណាដា និងភរិយារបស់គាត់ថ្លែងកាលពីថ្ងៃពុធអំពីការសម្រេចចិត្តលែងគ្នា។ នេះជាដំណឹងដ៏គួរឱ្យភ្ញាក់ផ្អើលដែលគេមិននឹកស្មានថាចំណងអាពាហ៍ពិពាហ៍ដែលមើលពីសម្បកក្រៅហាក់ដូចជាផ្អែមល្ហែមនឹងគ្នាសម្បើមណាស់រយៈពេល១៨ឆ្នាំកន្លងទៅនេះ។ ប៉ុន្តែនៅទីបំផុត, ពួកគេបែរជាដើរដល់ផ្លូវបំបែកយ៉ាងដូច្នេះសោះ។

លោកទ្រូដូ (Trudeau) ដែលបច្ចុប្បន្នមានអាយុ៥១ឆ្នាំ និងលោកជំទាវសូហ៊្វី (Sophie) ដែលមានអាយុ៤៨ឆ្នាំ បានចាប់ដៃគ្នាចូលរោងការកាលពីខែឧសភា ឆ្នាំ២០០៥ និងទទួលបានកូនបីនាក់ជាចំណងដៃអាពាហ៍ពិពាហ៍។ កូនច្បងគេអាយុ១៥ឆ្នាំ។ សម្រាប់លោកទ្រូដូ លោកធ្លាប់ភ្លក្សរសជាតិឆាកជីវិតល្វីងជូរចត់។ ប៉ារបស់លោកដែលជាអតីតនាយករដ្ឋមន្ត្រីកាណាដាម្នាក់ដែរនោះ ក៏ធ្លាប់លែងគ្នាជាមួយភរិយាកាលពីឆ្នាំ១៩៧៧។ កាលនោះ លែងគ្នានៅពេលកំពុងកាន់អំណាចដូចលោកទ្រូដូដែរ។

លោកទ្រូដូ កាលឡើងកាន់តំណែងជានាយករដ្ឋមន្ត្រីកាណាដានៅឆ្នាំ២០១៥ លោកមានអាយុ៤៣ឆ្នាំ។ គូស្វាមី-ភរិយាដែលចូលចិត្តស្លៀកពាក់ស្អាតបាតនៅពេលទៅណាមកណាម្ដងៗតែងតែទទួលបានការចាប់អារម្មណ៍ខ្លាំងពីសារព័ត៌មាននៅទូទាំងពិភពលោក។ ទស្សនាវដ្ដីវ៉ូក (Vogue) បានចុះផ្សាយប្រវត្តិស្នេហានៃគូស្វាមី-ភរិយារបស់លោកទ្រូដូនៅក្នុងច្បាប់ចេញផ្សាយរបស់ខ្លួនកាលពីខែមករា ឆ្នាំ២០១៦ ដោយបង្ហាញរូបថតស្អាតៗហាក់ដូចជាស្និទ្ធស្នាលនឹងគ្នាយ៉ាងខ្លាំង។ ខ្លឹមសារអត្ថបទនៅក្នុងទស្សនាវដ្ដីនិយាយពីរឿងរ៉ាវដ៏គួរឱ្យភ្ញាក់ផ្អើលដែលលោកទ្រូដូបង្ហាញមនោសញ្ចេតនាជ្រាលជ្រៅចំពោះភរិយា។

កាលពីពេលដែលលោកទ្រូដូទើបតែឈានជើងកាន់តំណែងនាយករដ្ឋមន្ត្រីកាណាដាដំបូងៗ លោក និងលោកជំទាវសូហ៊្វីទៅណាមកណាម្ដងៗទាំងគូត្រសងនៅក្នុងពិធីផ្សេងៗ ឬនៅក្នុងដំណើរទស្សនកិច្ចនៅក្រៅប្រទេស។ កាលពីខែកុម្ភៈ ឆ្នាំ២០១៨ នៅពេលលោកទ្រូដូបំពេញទស្សនកិច្ចនៅប្រទេសឥណ្ឌា លោក និងលោកជំទាវបានស្លៀកពាក់ឆើតឆាយ រំលេចដោយពណ៌ស្រស់បំព្រង ដែលនាំឱ្យអ្នកនៅក្នុងស្រុកបញ្ចេញពាក្យពេចន៍លែបខាយ និងចំអែចំអន់។

ថ្វីដ្បិតឆាកជីវិតពីសម្បកក្រៅហាក់ដូចជាល្អូកល្អឺននឹងគ្នា និងមានសេចក្ដីសុខសម្បើមណាស់ ប៉ុន្តែលោកទ្រូដូក៏មិនលាក់លាមអ្វីទេ។ តាំងពីមុនឡើងកាន់តំណែងជានាយករដ្ឋមន្ត្រី លោកទទួលស្គាល់ថាលោក និងលោកជំទាវក៏ជួបប្រទះនឹងបញ្ហាជាច្រើនផងដែរ។ លោកបានថ្លែងប្រាប់ទូរទស្សន៍កាណាដាកាលពីឆ្នាំ២០១៤ថា «ជីវិតអាពាហ៍ពិពាហ៍របស់យើងមិនមែនល្អឥតខ្ចោះនោះទេ។ ពេលខ្លះមានឡើង មានចុះអីចឹងដែរ»។

ប៉ុន្មានឆ្នាំចុងក្រោយនេះ លោកជំទាវសូហ៊្វីមិនសូវលេចមុខលេចមាត់ជាមួយស្វាមីប៉ុន្មានទេនៅតាមពិធីតូចធំផ្សេងៗ។ គេអាចមើលឃើញពីស្ថានភាពអ័ព្ទអួបណ្ដើរៗតាំងពីពេលនោះមក។ នៅក្នុងពេលរៀបចំពិធីរម្លឹកខួបអាពាហ៍ពិពាហ៍របស់អ្នកទាំង២កាលពីឆ្នាំ២០២២ លោកជំទាវបានថ្លែងតាមបណ្ដាញសង្គមថា «ឆាកជីវិតរបស់ពួកយើងពេលខ្លះជួបប្រទះនឹងបរិយាកាសរីករាយក៏មាន បរិយាកាសអ័ព្ទអួក៏មាន និងមានរឿងរ៉ាវជាច្រើនទៀតដែលមិនអាចបរិយាយឱ្យអស់សេចក្ដី»។

លោកស្រីថ្លែងបន្តទៀតថា «ទំនាក់ទំនងរយៈពេលវែងពោរពេញដោយបញ្ហារាប់មិនអស់»។ អ្នកទាំង២បានធ្វើដំណើរទៅទីក្រុងឡុងកាលពីខែឧសភា ដើម្បីចូលរួមពិធីរាជាភិសេកព្រះមហាក្សត្រឆាល (Charles)។ អ្នកទាំង២នៅជុំគ្នាចាំទទួលដំណើរទស្សនកិច្ចរបស់លោកចូបៃដិនទៅកាណាដាកាលពីខែមីនា។ លោកទ្រូដូបានរៀបចំសន្និសីទសារព័ត៌មានកាលពីថ្ងៃចន្ទ និងជិះរថភ្លើងក្រោមដីនៃទីក្រុងតូរ៉ុនតូ (Toronto) នៅក្នុងរាត្រីនោះ។ ប៉ុន្តែរយៈពេល២ថ្ងៃចុងក្រោយនេះ លោកមិនបានបង្ហាញមុខជាសាធារណៈទេ។ ត្រឹមថ្ងៃចន្ទសប្ដាហ៍នេះ គេឃើញថាលោកនៅពាក់ចិញ្ចៀនអាពាហ៍ពិពាហ៍នៅឡើយទេ។

ស្រាប់តែអ្វីៗប្រែប្រួល១៨០អង្សានៅពេលលោកទ្រូដូប្រកាសនៅលើអ៊ីនស្តាក្រាមថា «សូហ៊្វី និងរូបខ្ញុំសូមជម្រាបជូនការពិតតាមត្រង់ថាបន្ទាប់ពីយើងពិគ្រោះគ្នាប្រកបដោយអត្ថន័យជ្រាលជ្រៅ និងដោយបរិយាកាសពិបាក យើងសម្រេចចិត្តថាត្រូវចែកផ្លូវគ្នាហើយ»។ លោកជំទាវសូហ៊្វីក៏បង្ហោះនូវសារស្រដៀងគ្នានេះដែរនៅលើអ៊ីនស្តាក្រាមផ្ទាល់ខ្លួនរបស់លោកជំទាវ។

ខុទ្ទកាល័យនាយករដ្ឋមន្ត្រីរបស់លោកទ្រូដូឱ្យដឹងថា «លោកទ្រូដូ និងលោកជំទាវសូហ៊្វីបានចុះហត្ថលេខាលើលិខិតលែងលះគ្នាជាផ្លូវការហើយ។ អ្នកទាំង២បានខិតខំបំពេញសំណុំបែបបទពាក់ព័ន្ធនឹងបញ្ហាផ្លូវច្បាប់ឱ្យបានគ្រប់ជ្រុងជ្រោយ។ ពួកគេនៅតែរក្សាភាពជិតស្និទ្ធជាមួយកូនៗក្នុងនាមជាឪពុក និងម្ដាយដែលត្រូវយកចិត្តទុកដាក់ចំពោះជីវិតរស់នៅដោយសុវត្ថិភាព សេចក្ដីស្រឡាញ់ និងការទំនុកបម្រុង។ ពួកគេមានគម្រោងធ្វើដំណើរកម្សាន្តជុំគ្នាជាលក្ខណៈគ្រួសារនាសប្ដាហ៍ក្រោយ»៕

ប្រភព៖ Reuters
https://www.reuters.com/world/americas/canada-pm-trudeau-says-he-his-wife-sophie-are-separating-2023-08-02/#:~:text=OTTAWA%2C%20Aug%202%20(Reuters),married%20in%20late%20May%202005