ភ្នំពេញ៖ សហព័ន្ធ​កីឡា​​បាល់​ទាត់​​កម្ពុជា នៅរសៀលថ្ងៃទី២ ខែសីហា ឆ្នាំ២០២៣ នេះ បានរៀបចំការធ្វើតេស្តជ្រើសរើសកីឡាករយុវជនកម្ពុជា អាយុក្រោម ២៣ឆ្នាំ ដើម្បី​ចូលរួមការប្រកួតពានរង្វាន់ AFF U23 Championship 2023 នៅប្រទេសថៃ ដែលនឹងប្រព្រឹត្តទៅ ពីថ្ងៃទី ១៧ ដល់ថ្ងៃទី២៦ ខែសីហា ឆ្នាំ២០២៣។

កីឡាករជម្រើសជាតិកម្ពុជា អាយុក្រោម ២៣ឆ្នាំ មកពីក្លិបបាល់ទាត់ ជាសមាជិករបស់សហព័ន្ធ​កីឡាបាល់ទាត់កម្ពុជា​។ ក្លិបបាល់ទាត់ក្នុងស្រុករបស់កម្ពុជា បាន​អនុញ្ញាតឲ្យកីឡាកររបស់ខ្លួន មកចូលរួមធ្វើតេស្ត និងចូលរួមជាមួយក្រុមជម្រើសជាតិ សម្រាប់ពានរង្វាន់នេះផងដែរ។

សូមរម្លឹកថា ការប្រកួតពានរង្វាន់ AFF U23 Championship 2023 នៅប្រទេសថៃ ដែលនឹងប្រព្រឹត្តទៅ ពីថ្ងៃទី១៧ ដល់ថ្ងៃទី២៦ ខែសីហា ឆ្នាំ២០២៣ ប្រកួត​នៅរ៉ៃយ៉ង និងឈុនប៊ូរី ដោយមានក្រុមបាល់ទាត់ ១០ប្រទេស ចូលរួម គឺវៀតណាម ហ្វីលីពីន ឡាវ ទីម័រ ម៉ាឡេស៊ី ឥណ្ឌូនេស៊ី ថៃ កម្ពុជា ប៊្រុយណេ និងមីយ៉ាន់ម៉ា។ វៀតណាម គឺជាក្រុមការងារតំណែង​ជើងឯក​។

កម្ពុជាយើង ស្ថិតនៅក្នុងពូល A ដែលមាន ៤ក្រុម គឺម្ចាស់ផ្ទះថៃ កម្ពុជា ប៊្រុយណេ និងមីយ៉ាន់ម៉ា។ កម្ពុជាយើង ត្រូវទាត់បើកឆាកមុនគេ នៅថ្ងៃទី១៧ ខែសីហា វេលាម៉ោង ៤ល្ងាច ដោយជួបជាមួយប៊្រុយណេ។ ថ្ងៃទី១៩សីហា ម៉ោង ៤រសៀល​ កម្ពុជា ជួបមីយ៉ាន់ម៉ា។ ថ្ងៃទី២១សីហា វេលាម៉ោង ៨យប់ កម្ពុជា ជួបម្ចាស់ផ្ទះថៃ។

ចំណែកពូល B មាន ៣ក្រុម រួមមាន៖ ទីម័រ ម៉ាឡេស៊ី និងឥណ្ឌូនេស៊ី។ រីឯពូល C មាន ៣ក្រុមដែរ គឺ វៀតណាម ហ្វីលីពីន និងឡាវ​៕