រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា ជនសង្ស័យប្រុសស្រីចំនួន៥នាក់ដែលមានជំនាញខាងគាស់ផ្ទះរបស់បងប្អូនប្រជាពលរដ្ឋលួ.ចយកម៉ូតូ និងសង្ឃក្លែងក្លាយ២នាក់ ព្រមទាំងតៃកុងម្នាក់ផងនោះ ពេលនេះត្រូវបានកម្លាំងសមត្ថកិច្ចខណ្ឌសែនសុខ សហការជាមួយកម្លាំងសមត្ថកិច្ចប៉ុស្តិ៍ និងខណ្ឌពោធិ៍សែនជ័យ ចុះទៅបង្ក្រាបបានភ្លាមៗ កាលពីវេលាម៉ោង១១និង១៥យប់ ថ្ងៃទី០១ ខែសីហា ឆ្នាំ២០២៣ ស្ថិតនៅក្នុងភូមិជម្ពូវ័ន សង្កាត់ចោមចៅទី៣ ខណ្ឌពោធិ៍សែនជ័យ។
សេចក្តីរាយការណ៍បន្តថា រថយន្តដែលសហការរកស៊ីជាមួយព្រះសង្ឃក្លែងក្លាយខាងលើនេះម៉ាកហាយឡែនឌ័រ ពណ៌ទឹកប្រាក់ ពាក់ស្លាក ភ្នំពេញ2A-6184 បានចតឈប់ទុកនៅមុខផ្ទះជួលមួយកន្លែង។
បើតាមប្រភពព័ត៌មានបញ្ជាក់ពីលោក គូច សុភា អធិការរងទទួលផែនផ្នែកព្រហ្មទណ្ឌ ព្រះនាម «មេ០៥» ប្រចាំការនៅខណ្ឌសែនសុខ បានអោយដឹងថា ដោយមានការប្ដឹងពីប្រជាពលរដ្ឋរងគ្រោះនៅក្នុងមូលដ្ឋានពីករណីចូលលួ.ចគាស់ផ្ទះយកម៉ូតូបានសម្រេចចំនួន២គ្រឿង។ ឮ
លោកអធិការរងទទួលផែនផ្នែកព្រហ្មទណ្ឌ ព្រះនាម «មេ០៥» ប្រចាំការនៅខណ្ឌសែនសុខ បានឱ្យដឹងបន្តថា បន្ទាប់ពីទទួលពាក្យបណ្ដឹងរួចមក ក៏ធ្វើការស្រាវជ្រាវអស់រយៈពេលជាង១០ថ្ងៃ ទើបឃាត់ខ្លួនជនសង្ស័យបាននៅចំណុចកើតហេតុខាងលើ ដោយដឹកនាំកម្លាំងចុះអន្តរាគមន៍ហ៊ុមព័ទ្ធទីតាំងផ្ទះជួល ដែលជនសង្ស័យនាំគ្នាសង្ងំលាក់ខ្លួន និងប្រើរយៈពេលជាង២ម៉ោង ទំរាំឃាត់ខ្លួនបានចំនួន៥នាក់ (ស្រីម្នាក់ និងប្រុសចំនួន៤នាក់) ក្នុងនោះខ្លះរត់ឡើងទៅលើដំបូលផ្ទះ និងខ្លះទៀតសម្ងំនៅក្នុងបន្ទប់ជួល ។
លោកអធិការរង បន្តទៀតថា ដោយមានការចង្អុលបង្ហាញតាមទៅយកមុខសញ្ញាបន្ត នៅភូមិព្រៃព្រីងជើង២ ស្ថិតក្នុងខណ្ឌពោធិ៍សែនជ័យដដែល បែរជារកមិនឃើញ ស្រាប់តែទៅប្រទះឃើញព្រះសង្ឃក្លែងក្លាយ២នាក់ និងតៃកុងរថយន្តម្នាក់ដែលសហការគ្នារកស៊ី ហើយកំពុងតែនាំគ្នាដេកនៅក្នុងបន្ទប់ជួល ដោយដោះស្បង់ចីពរទុកនៅក្នុងរថយន្ត ហើយស្លៀកពាក់ខោអាវធម្មតា។ បន្ទាប់ពីឆែកឆេរក្នុងរថយន្តទៅឃើញមានបាត និងឆ័ត្រ ព្រមទាំងស្បង់ចីពរ ថង់យមជាច្រើន បន្ទាប់មកសមត្ថកិច្ចក៏ធ្វើការឃាត់ខ្លួននាំទៅប៉ុ ស្តិ៍ដើម្បីសួរនាំបន្ថែម។
ក្រោយពេលកើតហេតុ ជនសង្ស័យប្រុសស្រីទាំង៥នាក់ខាងលើនេះ ត្រូវបានផ្នែកជំនាញព្រហ្មទណ្ឌ បញ្ជូនខ្លួនទៅកាន់អធិការដ្ឋាននគរបាលខណ្ឌសែនសុខ និងចាត់ការទៅតាមនីតិវិធីបន្ត ចំណែកព្រះសង្ឃក្លែងក្លាយទាំង២នាក់ រួមនឹងតៃកុង ព្រមទាំងរថយន្ត ត្រូវបានបញ្ជូនខ្លួនទៅឱ្យផ្នែកជំនាញអធិការដ្ឋាននគរបាលខណ្ឌពោធិ៍សែនជ័យ ចាត់ការទៅតាមនីតិវិធីបន្តផងដែរ ៕
ចែករំលែកព័តមាននេះ