រាជធានីភ្នំពេញ ៖ មុខសញ្ញាចាស់ម្នាក់ ដែលទើបចេញពីពន្ធនាគារ ហើយបានធ្វើសកម្មភាពឆក់ចំនួន០២ដង (ឆក់ខ្សែក និងឆក់កាបូប) ត្រូវកម្លាំងជំនាញ នៃនាយកដ្ឋាននគរបាលព្រហ្មទណ្ឌ ធ្វើការឃាត់ខ្លួនបានកាលពីថ្ងៃទី២៩ ខែកក្កដា ឆ្នាំ២០២៣ ។
ជនសង្ស័យឈ្មោះ សុវណ្ណ ឧត្តមរង្សី ហៅតួ ភេទប្រុស អាយុ២៨ឆ្នាំ ធ្លាប់ធ្វើសកម្មភាព២ករណីរួមមាន ៖
ករណីទី០១-នៅថ្ងៃទី២៥ ខែកក្កដា ឆ្នាំ២០២៣ វេលាម៉ោង១០៖០០នាទី បានធ្វើសកម្មភាពឆក់ខ្សែកពីបុរសម្នាក់កំពុងឈប់ម៉ូតូខ្ចប់គុយទាវ បានសម្រេច នៅចំណុចមុខហាងគុយទាវអង្គរជុំ ដែលស្ថិតនៅផ្លូវលេខ៥៩២ សង្កាត់បឹងកក់ទី២ ខណ្ឌទួលគោក រាជធានីភ្នំពេញ។ បន្ទាប់ពីជនសង្ស័យ បានធ្វើសកម្មភាពរួច ក៏បានយកខ្សែក ទៅលក់នៅតូប០១កន្លែង ក្នុងផ្សារឈូកមាស បានប្រាក់ចំនួន ៧៥០ដុល្លារអាមេរិក ។
ករណីទី០២-នៅថ្ងៃទី២៧ ខែកក្កដា ឆ្នាំ២០២៣ វេលាម៉ោង២២:៣០នាទី បានធ្វើសកម្មភាពឆក់កាបូបស្ពាយពីនារីរងគ្រោះ កំពុងជិះម៉ូតូបានសម្រេចនៅចំណុចផ្លូវលេខ២៦៥ កែងផ្លូវលេខ១៥០ ក្នុងសង្កាត់ទឹកល្អក់ទី២ ខណ្ឌទួលគោក រាជធានីភ្នំពេញ។
ចំពោះ សម្ភារៈ ក្នុងកាបូបមាន ទូរសព្ទម៉ាក អាយហ្វូន ១៣ ពណ៌ផ្កាឈូក និងបានយកទៅលក់បុរសម្នាក់ បានប្រាក់ចំនួន ៤៨០ដុល្លារអាមេរិក។
ក្រោយពីទទួលបានបណ្តឹងពីជនរងគ្រោះ លោកឧត្តមសេនីយ៍ត្រី ប៊ុត វណ្ណារដ្ឋ អនុប្រធាននាយកដ្ឋានទទួលផែន បានដឹកនាំកម្លាំងជំនាញការិយាល័យព្រហ្មទណ្ឌកម្រិតធ្ងន់ ដែលមានលោកវរសេនីយ៍ឯក ញ៉ែម វ៉ន ជានាយការិយាល័យ និងមានការចូលរួមសហការពីលោក វរសេនីយ៍ទោ ប៊ុត ស៊ីម៉េង បានធ្វើការស្រាវជ្រាវតាមរយៈកាមេរ៉ាសុវត្ថិភាព ទើបកំណត់មុខសញ្ញាបានរហូតឈានដល់ថ្ងៃទី២៩ ខែកក្កដា ឆ្នាំ២០២៣ វេលាម៉ោង២៣និង៤០នាទីត្រង់ចំណុចផ្លូវលេខ១៧២ សង្កាត់ផ្សារថ្មីទី២ ខណ្ឌដូនពេញ រាជធានីភ្នំពេញ ក៏បានប្រទះឃើញជនសង្ស័យខាងលើ និងបានធ្វើការឃាត់ខ្លួនជនសង្ស័យរូបនេះ ។
សំភារដកហូត ម៉ូតូម៉ាក ហុងដាឃ្លីក ពណ៌ខ្មៅ ពាក់ស្លាកលេខ ភ្នំពេញ 1KA-2583 (មិនប្រក្រតី) ។
បន្ទាប់ពីកម្លាំងជំនាញបានធ្វើការសាកសួរ ជនសង្ស័យរួចមក ជនសង្ស័យក៏បានសារភាពថា រូបគេពិតជាបានធ្វើសកម្មភាពឆក់ខ្សែក និងកាបូបពីជនរងគ្រោះទាំងពីរនាក់ ពិតប្រាកដមែន ។
កម្លាំងជំនាញបាននាំជនសង្ស័យ ទៅចង្អុលបង្ហាញតូប ០១កន្លែង ក្នុងផ្សារឈូកមាស ដែលខ្លួនបានយកខ្សែក ទៅលក់ ដើម្បីកម្លាំងជំនាញទៅដកហូតខ្សែក យកមកប្រគល់ជូនជនរងគ្រោះវិញ ប៉ុន្តែខ្សែរក ត្រូវបានម្ចាស់តូបរំលាយជាដុំលោហៈធាតុ ពណ៌លឿងបាត់ទៅហើយ ប៉ុន្តែម្ចាស់តូបសូមប្រគល់ដុំលោហៈធាតុ ពណ៌លឿង ទម្ងន់ចំនួន០១តម្លឹង មកអោយសមត្ថកិច្ច ដើម្បីចាត់ការតាមនីតិវិធីច្បាប់។
បន្ទាប់ពីធ្វើការដកហូតរួចមក កម្លាំងជំនាញនាយកដ្ឋាននគរបាលព្រហ្មទណ្ឌ បានធ្វើការប្រគល់ជូនដុំលោហៈធាតុ ពណ៌លឿង ទម្ងន់០១តំឡឹង ទៅអោយជនរងគ្រោះវិញ ។
បច្ចុប្បន្នជនសង្ស័យ និងវត្ថុតាង ត្រូវបានមន្ត្រីការិយាល័យ កំពុងកសាងសំណុំរឿងបញ្ជូនទៅអយ្យការអមសាលាដំបូងរាជធានីភ្នំពេញ ដើម្បីចាត់ការតាមនីតិវិធី ៕
ចែករំលែកព័តមាននេះ