ខេត្តព្រះសីហនុ ៖ យុវជន២នាក់ក្នុងចំណោម៣នាក់ដែលជាប់សង្ស័យពីបទមនុស្សឃាត ត្រូវបានសមត្ថកិច្ចប៉ូលិសនៃស្នងការដ្ឋាននគរបាលខេត្ត ធ្វើការឃាត់ខ្លួនបន្តបន្ទាប់គ្នាកាលពីព្រឹកថ្ងៃទី១០ ឧសភា នៅចំណុចភូមិ៣ សង្កាត់លេខ១ ក្រុងព្រះសីហនុ
ខេត្តព្រះសីហនុ ៖ យុវជន២នាក់ក្នុងចំណោម៣នាក់ដែលជាប់សង្ស័យពីបទមនុស្សឃាត ត្រូវបានសមត្ថកិច្ចប៉ូលិសនៃស្នងការដ្ឋាននគរបាលខេត្ត ធ្វើការឃាត់ខ្លួនបន្តបន្ទាប់គ្នាកាលពីព្រឹកថ្ងៃទី១០ ឧសភា នៅចំណុចភូមិ៣ សង្កាត់លេខ១ ក្រុងព្រះសីហនុ ។
ហេតុការណ៍នេះបានកើតឡើងកាលពីវេលាម៉ោង៩និង១៥នាទីយប់ថ្ងៃទី៩ ឧសភា នៅតាមបណ្តោយតិរវិថីសម្តេចហ៊ុន សែន ស្ថិតក្នុងភូមិ៣ សង្កាត់លេខ១ ក្រុងព្រះសីហនុ ដែលបង្កឡើងដោយជនមិនស្គាល់មុខមួយក្រុមមានគ្នាប្រមាណពី៣ទៅ៥នាក់ បានកាប់យុវជន២នាក់ដែលកំពុងដើរនៅលើថ្នល់ បណ្តាលឱ្យជនរងគ្រោះម្នាក់ស្លាប់បន្ទាប់ពីបញ្ជូនដល់មន្ទីរពេទ្យ និងម្នាក់ទៀតរងរបួសស្រាលដោយសាររត់គេចខ្លួនរួច ។
យោងតាមប្រភពពីស្ត្រីឈ្មោះនឹម ហុន អាយុ៣០ឆ្នាំ ត្រូវជាបងជីដូនមួយជនរងគ្រោះបានឱ្យដឹងថា ជនរងគ្រោះរហូតស្លាប់នេះឈ្មោះនឹម ញក់ ភេទប្រុស អាយុ២៥ឆ្នាំ មានស្រុកកំណើតភូមិស្លា ឃុំលាយបូរ ស្រុកត្រាំកក់ ខេត្តតាកែវ បច្ចុប្បន្នជាកម្មករទូកស្នាក់នៅផែ១៧ ស្ថិតក្នុងភូមិ៣ សង្កាត់លេខ១ ក្រុងព្រះសីហនុ និងម្នាក់ទៀតឈ្មោះខៀវ ម៉ាប់ ភេទប្រុស អាយុ២០ឆ្នាំ ជាកម្មករទូក ស្នាក់នៅជាមួយគ្នា រងរបួសស្រាល ។
យោងតាមប្រភពពីសមត្ថកិច្ចប៉ូលិសបានឱ្យដឹងថា ជនសង្ស័យដែលត្រូវសមត្ថកិច្ចចាប់ខ្លួនម្នាក់ឈ្មោះប្រក់ វណ្ណដា ហៅង៉ូ វណ្ណដា ភេទប្រុស អាយុ២៣ឆ្នាំ មានស្រុកកំណើតភូមិលក ឃុំលក ស្រុកកំពង់ត្រាច ខេត្តកំពត បច្ចុប្បន្នជាកម្មករទូក ស្នាក់នៅក្នុងភូមិកើតហេតុខាងលើ និងម្នាក់ទៀតឈ្មោះចាន់ ទ្រា ហៅតឿ ភេទប្រុស អាយុ២២ឆ្នាំ មានមុខរបរជាកម្មករទូកដូចគ្នា ។
យោងតាមប្រភពនៅកន្លែងកើតហេតុបានធ្វើការសន្និដ្ឋានថា ហេតុការណ៍នេះទំនងជាកើតឡើងដោយសារការយល់ច្រឡំ ព្រោះជនរងគ្រោះជាមនុស្សស្លូតមិនដែលរករឿងអ្នកណា ឡើយ ហើយក៏ពុំដែលមានទំនាស់ជាមួយនរណាដែរ ។ ជាងនេះទៀត នៅចំណុចកើតហេតុនេះកាលពីវេលាម៉ោង៧និង៣០នាទីយប់ថ្ងៃដដែល មានហេតុការណ៍ដេញកាប់ចាក់គ្នាម្តងដែរ ។
ប្រភពដដែលបានបន្តទៀតថា នៅវេលាម៉ោងកើតហេតុគេឃើញយុវជន២នាក់ដើរចេញពីផែ១៧ សំដៅមកថ្នល់ដើម្បីរកហាងផឹកស៊ី តែដើរពុំទាន់ដល់ផង ស្រាប់តែមានយុវជនប្រមាណ៥ម្នាក់ដែលម្នាក់ៗមានកាន់ដាវសាមម៉ូរ៉ៃ និងដំបងបានហក់ទៅវាយ និងកាប់ជនរងគ្រោះទាំង២នាក់ បណ្តាលឱ្យម្នាក់ដេកដួលនៅក្នុងថ្លុកឈាមយ៉ាងអាណោចអាធ័មបំផុត ឯម្នាក់ទៀតរត់គេចខ្លួនរួច ។ បន្ទាប់ពីវាយកាប់ចាក់ជនរងគ្រោះអស់ចិត្តហើយ ក្រុមយុវជនទាំងនោះបានរត់គេចខ្លួនបាត់ស្រមោលបន្សល់តែជនរងគ្រោះដេកស្តូកស្តឹងតែម្នាក់ឯង ហើយត្រូវបានអ្នកជិតខាងដឹកយកទៅសង្គ្រោះនៅមន្ទីរពេទ្យបង្អែកចំការចេកខេត្តព្រះសីហនុ តែជាអកុសលគ្រូពេទ្យមិនអាចសង្គ្រោះបានក៏បានស្លាប់នៅវេលាម៉ោង១រំលងអធ្រាត្រឈានចូលថ្ងៃទី១០ ឧសភា ។
បច្ចុប្បន្នជនសង្ស័យទាំង២នាក់ ត្រូវបានសមត្ថកិច្ចកសាងសំណុំរឿងបញ្ជូនទៅសាលាដំបូងខេត្ត និងបន្តតាមចាប់បក្សពួកដែលរត់គេចខ្លួន។ រីឯសពជនរងគ្រោះត្រូវបានរក្សាទុកឱ្យក្រុមគ្រួសារមកទទួលយកទៅធ្វើបុណ្យតាមប្រពៃណី ៕
ចែករំលែកព័តមាននេះ