អណ្ដាតភ្លើងឆាបឆេះខ្សែភ្លើង និងខ្សែកាបអ៊ុកតិច ព្រមទាំងប្រអប់កុងទ័រភ្លើងយ៉ាងសន្ធោសន្ធៅ ដោយសង្ស័យថា បណ្ដាលមកពីឆ្លងចរន្តអគ្គិសនី បង្កឲ្យមានការភ្ញាក់ផ្អើលដល់ប្រជាពលរដ្ឋ និងសមត្ថកិច្ចចុះមកអន្តរាគមន៍
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា អណ្ដាតភ្លើងឆាបឆេះខ្សែភ្លើង និងខ្សែកាបអ៊ុកតិច ព្រមទាំងប្រអប់កុងទ័រភ្លើងយ៉ាងសន្ធោសន្ធៅ ដោយសង្ស័យថា បណ្ដាលមកពីឆ្លងចរន្តអគ្គិសនី បង្កឲ្យមានការភ្ញាក់ផ្អើលដល់ប្រជាពលរដ្ឋ និងសមត្ថកិច្ចចុះមកអន្តរាគមន៍កាលពីវេលាម៉ោង៧និង១០នាទីយប់ ថ្ងៃទី៣០ ខែកក្កដា ឆ្នាំ២០២៣ នៅចំណុចខាងមុខវត្តកោះ តាមបណ្តោយផ្លូវព្រះមុនីវង្ស ស្ថិតក្នុងសង្កាត់បឹងរាំង ខណ្ឌដូនពេញ។
តាមប្រភពព័ត៌មានពីប្រជាពលរដ្ឋនៅក្បែរកន្លែងកើតហេតុនោះ បានឲ្យដឹងថា កាលពីល្ងាច មុនពេលកើតហេតុ គេបានធំក្លិនឈ្ងៀមចេញពីម្តុំនោះម្តងហើយ ប៉ុន្តែមិនមានអ្នកណាម្នាក់ចាប់អារម្មណ៍ឡើយ លុះដល់វេលាកើតហេតុ ស្រាប់តែមានការផ្ទុះបែកផ្កាភ្លើងចេញពីខាងលើបង្គោលនោះតែម្តង។ រហូតដល់លេចចេញជាអណ្ដាតភ្លើងឆាបឆេះខ្សែភ្លើង និងខ្សែកាបអ៊ុកតិច រួមជាមួយប្រអប់កុងទ័រភ្លើងដែលនៅខាងលើបង្គោលយ៉ាងសន្ធោសន្ធៅ បង្កឲ្យមានការភ្ញាក់ផ្អើលដល់ប្រជាពលរដ្ឋ នាំគ្នារាយការណ៍ជូនសមត្ថកិច្ចមូលដ្ឋាន និងរថយន្តពន្លត់អគ្គិភ័យ។
ពលរដ្ឋបន្តថា បន្ទាប់មក ក៏មានសមត្ថកិច្ចមូលដ្ឋាន និងរថយន្តពន្លត់អគ្គិភ័យនៃការិយាល័យបង្ការ និងពន្លត់អគ្គិភ័យនៃស្នងការដ្ឋាននគរបាលរាជធានីភ្នំពេញ ចំនួន១គ្រឿង បានចុះមកដល់ទីតាំងកើតហេតុ។ ហើយសមត្ថកិច្ចក៏បានយកបំពង់ពន្លត់អគ្គិភ័យប្រមាណ៤ទៅ៥បំពង់ មកធ្វើការបា.ញ់ពន្លត់ផងដែរ រហូតដល់អណ្ដាតភ្លើងបានរលត់ទៅវិញទាំងស្រុង។
ចំពោះហេតុការណ៍ខាងលើនេះដែរ គឺមិនបណ្ដាលឲ្យឆាបឆេះរាលដាលដល់ផ្ទះរបស់ប្រជាពលរដ្ឋនោះទេ ដោយគ្រាន់តែខូចខាតប្រអប់កុងទ័រអគ្គិសនី ខ្សែភ្លើងអគ្គិសនីតែប៉ុណ្ណោះ ចំពោះមូលហេតុ ត្រូវបានសមត្ថកិច្ចសន្និដ្ឋានថា បណ្ដាលមកពីឆ្លងចរន្តអគ្គិសនី៕
ចែករំលែកព័តមាននេះ