ក្រុងប៉ោយប៉ែត ៖ ទីតាំងផលិតទឹកបរិសុទ្ធជាច្រើនកន្លែងនៅក្នុងក្រុងប៉ោយប៉ែត ត្រូវបានមន្ត្រីកាំកុងត្រូលសហការជាមួយស្ថាប័ន និងសមត្ថកិច្ចពាក់ព័ន្ធ ចុះធ្វើការត្រួតពិនិត្យរកអាជ្ញាប័ណ្ណនៅព្រឹកថ្ងៃទី១០ ឧសភា ដោយមានការចូលរួមពីក្រឡាបញ្ជីសាលាដំបូងខេត្តបន្ទាយមានជ័យ ប៉ូលិសសេដ្ឋកិច្ចក្រសួង ប៉ូលិសប្រឆាំងបទល្មើសសេដ្ឋកិច្ចខេត្ត
ក្រុងប៉ោយប៉ែត ៖ ទីតាំងផលិតទឹកបរិសុទ្ធជាច្រើនកន្លែងនៅក្នុងក្រុងប៉ោយប៉ែត ត្រូវបានមន្ត្រីកាំកុងត្រូលសហការជាមួយស្ថាប័ន និងសមត្ថកិច្ចពាក់ព័ន្ធ ចុះធ្វើការត្រួតពិនិត្យរកអាជ្ញាប័ណ្ណនៅព្រឹកថ្ងៃទី១០ ឧសភា ដោយមានការចូលរួមពីក្រឡាបញ្ជីសាលាដំបូងខេត្តបន្ទាយមានជ័យ ប៉ូលិសសេដ្ឋកិច្ចក្រសួង ប៉ូលិសប្រឆាំងបទល្មើសសេដ្ឋកិច្ចខេត្ត និងសមត្ថកិច្ចប៉ូលិស និងប៉េអឹមក្រុងប៉ោយប៉ែតផងដែរ។
ភូមិ២ ដែលមានទីតាំងផលិតទឹកបរិសុទ្ធ គឺភូមិបាលិលេយ្យ និងភូមិក្បាលស្ពាន ហើយនៅត្រឹមម៉ោង១១និង៣០នាទីព្រឹក ថ្ងៃទី១០ ឧសភា សមត្ថកិច្ចចម្រុះបានចុះដល់ទីតាំងផលិតទឹកបរិសុទ្ធចំនួន៥កន្លែង ដែល៣កន្លែងស្ថិតក្នុងភូមិក្បាលស្ពាន និង២កន្លែងស្ថិតក្នុងភូមិបាលិលេយ្យ។ ទីតាំងផលិតទាំង៥កន្លែងខាងលើនេះ បើតាមលោកអ៊ុត សុភាព ប្រធានសាខាកាំកុងត្រូលខេត្តបន្ទាយមានជ័យ បានប្រាប់អ្នកយកព័ត៌មានថា ៤កន្លែងគ្មានច្បាប់ និង១កន្លែងមានច្បាប់ពីក្រសួងឧស្សាហកម្មរ៉ែ និងថាមពល ប៉ុន្តែការផលិតមិនមានកាលបរិច្ឆេទថ្ងៃផលិត និងថ្ងៃផុតកំណត់ ហើយ៤កន្លែងដែលគ្មានច្បាប់នោះ កន្លែងខ្លះគ្មានទាំងអនាម័យទៀតផង។
ទីតាំងផលិតមួយកន្លែងក្នុងចំណោម៤កន្លែងខាងលើជារបស់លោកគឹម យ៉ាឌី មន្ត្រីប៉ូលិសអន្តោប្រវេសន៍ច្រកទ្វារអន្តរជាតិប៉ោយប៉ែត គឺស្ថិតក្នុងភូមិបាលិលេយ្យ បើទោះជាមានលើកស្លាកសញ្ញាទីតាំងផលិត និងគម្របដបប៊ីដុងមានស្លាកសញ្ញាត្រឹមត្រូវក៏ដោយ ក៏ត្រូវបានមន្ត្រីជំនាញប្រាប់ថា អត់មានកាលបរិច្ឆេទត្រឹមត្រូវទេ។
លោកអ៊ុត សុភាព បានបញ្ជាក់ថា ការពិនិត្យមើលអាជ្ញាប័ណ្ណនេះ ក៏ដោយសារការចុះពិនិត្យតាមផ្សារបានរកឃើញថា ទឹកបរិសុទ្ធដែលដាក់លក់គ្មានអាសយដ្ឋាន និងគ្មានកាលបរិច្ឆេទពិតប្រាកដ ទាំងថ្ងៃផលិត ទាំងថ្ងៃផុតកំណត់។ លោកប្រធានសាខាកាំកុងត្រូលខេត្តរូបនេះបានបន្តថា នៅរសៀលថ្ងៃដដែលនោះ ក្រុមការងារចម្រុះក៏ចុះទៅធ្វើការពិនិត្យនៅកន្លែងផលិតផ្សេងៗទៀត។ ចំពោះចំណាត់ការយ៉ាងណានោះ លោកប្រាប់ថា ពុំទាន់លម្អិតឱ្យពិស្តារបានទេ ព្រោះកំពុងធ្វើការបន្ត ប៉ុន្តែលោកប្រាប់ថា ចំពោះទីតាំងផលិតទាំងឡាយណាដែលគ្មានច្បាប់ ឬមិនត្រូវតាមស្តង់ដា ជាគោលការណ៍នឹងត្រូវឱ្យបញ្ឈប់ទាំងអស់ ព្រោះវាអាចប៉ះពាល់ដល់សុខភាពប្រជាពលរដ្ឋជាចម្បង៕
ចែករំលែកព័តមាននេះ