បុរសជាអ្នករើសអេតចាយម្នាក់ស្រវឹងស្រា ចូលទៅសុំសន្តិសុខ ដើម្បីសាកថ្មទូរស័ព្ទ ហើយក៏និយាយដៀលសន្តិសុខថា «ខោមិនចំខោ អាវមិនចំអាវ ចេះតែធ្វើសន្តិសុខដែរ» ធ្វើឱ្យសន្តិសុខមានការខឹងសម្បារក៏បានប៉ះពាសម្ដីគ្នា រហូត
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា បុរសជាអ្នករើសអេតចាយម្នាក់ស្រវឹងស្រា ចូលទៅសុំសន្តិសុខ ដើម្បីសាកថ្មទូរស័ព្ទ ហើយក៏និយាយដៀលសន្តិសុខថា «ខោមិនចំខោ អាវមិនចំអាវ ចេះតែធ្វើសន្តិសុខដែរ» ធ្វើឱ្យសន្តិសុខមានការខឹងសម្បារក៏បានប៉ះពាសម្ដីគ្នា រហូតវា.យគ្នាទៅវិញទៅមក បណ្ដាលឱ្យរងរបួសបែកក្បាលទាំងសង្ខាង បង្កឲ្យមានការភ្ញាក់ផ្អើលកាលពីវេលាម៉ោង៩និង៤០នាទីយប់ ថ្ងៃទី២៧ ខែកក្កដា ឆ្នាំ២០២៣ នៅតាមបណ្ដោយផ្លូវសហព័ន្ធរុស្ស៊ីទល់មុខព្រលានយន្តហោះអន្តរជាតិភ្នំពេញ ស្ថិតក្នុងភូមិក្បាលដំរីទី២ សង្កាត់កាកាបទី២ ខណ្ឌពោធិ៍សែនជ័យ ។
សេចក្តីរាយការណ៍បន្តថា សន្តិសុខយាមខាងលើនេះមានឈ្មោះសាយ សុគន្ធ ភេទប្រុស អាយុ២៧ឆ្នាំ មុខរបរសន្តិសុខយាមនៅផ្ទះលក់គ្រឿងសំណង់ចិនយីហោ «ម៉ាស៊ីនខ្យល់ខាយសាន-ម៉ាស៊ីនខួង» រស់នៅភូមិចុងថ្នល់ខាងកើត សង្កាត់ទឹកថ្លា ខណ្ឌសែនសុខ។ ចំណែកអ្នករើសអេតចាយវិញមានឈ្មោះ មិន សំបូ ភេទប្រុស អាយុ៣៨ឆ្នាំ មុខរបររើសអេតចាយ ស្នាក់នៅមិនពិតប្រាកដ នឹងមានស្រុកកំណើតនៅខេត្តកំពង់ចាម។
បើតាមប្រភពព័ត៌មានពីបុរសសន្តិសុខយាមផ្ទះលក់គ្រឿងសំណង់ បានប្រាប់ឱ្យដឹងថា នៅមុនពេលកើតហេតុ គាត់កំពុងតែយាមនៅខាងមុខផ្ទះលក់គ្រឿងសំណង់ ស្រាប់តែឃើញបុរសម្នាក់ដើរមកសុំសាកថ្មទូរស័ព្ទ ហើយគាត់ក៏បានអោយសាកថ្មទៅ។ ខណៈពេលយកទូរស័ព្ទទៅសាកថ្មនោះ បុរសរើសអេតចាយបាននិយាយទៅកាន់គាត់ (បុរសសន្តិសុខ) ថា «សន្តិសុខស្អី ខោមិនខោ អាវមិនអាវចឹង ចេះតែធ្វើសន្តិសុខទៅកើតដែរ»។
បុរសសន្តិសុខខាងលើបន្តថា នៅពេលនោះ រូបគាត់ (សន្តិសុខ) ខឹងក៏គ្រវៀសទូរស័ព្ទចេញ ចំណែកបុរសជាអ្នករើសអេតចាយរូបនោះក៏ខឹងដែរ ហើយក៏មានការទាស់ពាក្យសម្ដីប្រកែកគ្នារហូតបង្កឱ្យក្លាយទៅជាហិ.ង្សាវា.យចាប់បោ.កគ្នាទៅវិញទៅមក បណ្តាលឲ្យបុរសរើសអេតចាយរអិលដួលបែកក្បាលទាំងខ្លួនស្រវឹងស្រាផង បន្ទាប់មកបុរសរើសអេតចាយរូបនើក៏បានយកដុំថ្មគប់ទៅលើរូបគាត់ (បុរសសន្តិសុខ) បណ្តាលឲ្យរបួសបែកក្បាលរៀងៗខ្លួនតែម្តង។
បន្ទាប់ពីកើតហេតុ បុរសជាអ្នករើសអេតចាយ ត្រូវបានរថយន្តសង្គ្រោះឯកជន ដឹកយកទៅ ព្យាបាល បន្ទាប់មកកម្លាំងសមត្ថកិច្ចនគរបាលប៉ុស្តិ៍ ក៏បាននាំបុរសទាំងពីរនាក់ខាងលើនេះយកទៅសួរនាំនៅប៉ុស្តិ៍នគរបាលសង្កាត់កាកាបទី២ ភ្លាមៗផងដែរ ។
ក្រោយកើតហេតុ កម្លាំងនគរបាលប៉ុស្តិ៍ក៏បានសួរនាំទាំងសង្ខាង ប៉ុន្តែដោយសារភាគីទាំង២នាក់មិនប្តឹងផ្តល់រៀងៗខ្លួន ទើបនគរបាលប៉ុស្តិ៍ធ្វើបដិសេធបណ្តឹង ដើម្បីបញ្ចប់រឿងនៅប៉ុស្តិ៍នគរបាលភ្លាមៗតែម្តង ហើយក៏បានអោយត្រឡប់ផ្ទះទៅវិញភ្លាមៗដែរ៕
ចែករំលែកព័តមាននេះ