ក្នុងសារជាសំឡេងផ្ញើជូនជាពិសេសដល់កម្មករ កម្មការិនីកាត់ដេរ នៅព្រឹកថ្ងៃទី២៦ ខែកក្កដា ឆ្នាំ២០២៣នេះ សម្តេចតេជោ ហ៊ុន សែន ក្នុងនាមជានាយករដ្ឋមន្ត្រីចាំផ្ទះ បានប្រកាសពីការលើកពេល មិនបានចុះទៅជួបកម្មករកាត់ដេរ តាមការសន្យារបស់សម្តេច ចាប់ពី
រាជធានីភ្នំពេញ ៖ ក្នុងសារជាសំឡេងផ្ញើជូនជាពិសេសដល់កម្មករ កម្មការិនីកាត់ដេរ នៅព្រឹកថ្ងៃទី២៦ ខែកក្កដា ឆ្នាំ២០២៣នេះ សម្តេចតេជោ ហ៊ុន សែន ក្នុងនាមជានាយករដ្ឋមន្ត្រីចាំផ្ទះ បានប្រកាសពីការលើកពេល មិនបានចុះទៅជួបកម្មករកាត់ដេរ តាមការសន្យារបស់សម្តេច ចាប់ពីថ្ងៃទី២៧ ខែកក្កដា ស្អែកនេះទេ។
សម្តេចតេជោ បានបញ្ជាក់នៅក្នុងសារសម្លេងដែលមានរយៈពេលជិត៤នាទីថា មូលហេតុដែលសម្តេចត្រូវលើកពេលជួបកម្មករ ដែលគ្រោងជួបនៅ១០គោលដៅនៅរាជធានីភ្នំពេញ និងបណ្តាខេត្ត ត្រូវលើកពេល គឺដោយសារតែកត្តាពេលវេលា និងដោយសារតែពេលនេះ សម្តេចតេជោ ត្រូវរៀបចំបង្កើតរាជរដ្ឋាភិបាលថ្មី។ សម្តេចបានសុំការអភ័យទោសពីកម្មករ កម្មការិនីដែលខកខានមិនបានចុះជួបតាមការសន្យា ។ ដូច្នេះនៅពេលបង្កើតរាជរដ្ឋាភិបាលថ្មី ដែលមាននាយករដ្ឋមន្ត្រីថ្មីរួចរាល់នោះ នាយករដ្ឋមន្ត្រីថ្មី នឹងចុះជួបកម្មករ កម្មការិនីកាត់ដេរតែម្តង។
ការបង្កើតរាជរដ្ឋាភិបាលថ្មីនេះ ត្រូវបានសម្តេចតេជោ ហ៊ុន សែន បញ្ជាក់ឱ្យដឹងថា នឹងមាននាយករដ្ឋមន្ត្រីថ្មី ពោលគឺឯកឧត្តម ហ៊ុន ម៉ាណែត ដែលជាកូនប្រុសរបស់សម្តេច។ ការបង្កើតរាជរដ្ឋាភិបាលថ្មី ដោយមាននាយករដ្ឋមន្ត្រីថ្មីនេះ នឹងត្រូវសម្តេចតេជោ ប្រកាសលម្អិត នៅថ្ងៃទី៣ ខែសីហា ក្នុងពេលដែលសម្តេច អញ្ជើញទៅសម្ពោធផ្លូវខ្សែក្រវាត់ក្រុងទី៣៕
ចែករំលែកព័តមាននេះ