រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា អណ្ដាតភ្លើងបានឆាបឆេះអគារហាងលក់គ្រឿងអលង្ការ គុជខ្យង និងត្បូង «ហ្គលឌែនភើល – GOLDEN PEARL» នៅជាន់ទី៣ បណ្ដាលឱ្យហុយផ្សែងឡើងទ្រលោម បង្កឱ្យមានការភ្ញាក់ផ្អើលដល់កម្លាំងសមត្ថកិច្ចចេញរថយន្តពន្លត់អគ្គិភ័យជាច្រើនគ្រឿង ដើម្បីជួយអន្តរាគមន៍។ ហេតុការណ៍នេះបានកើតឡើងកាលពីវេលាម៉ោង៦ព្រឹកព្រលឹម ថ្ងៃទី២៦ ខែកក្កដា ឆ្នាំ២០២៣នេះ នៅចំណុចផ្ទះលេខ135DE0 E1,E2 តាមបណ្ដោយផ្លូវលេខ៣៦០ ស្ថិតក្នុងសង្កាត់បឹងកេងកងទី៣ ខណ្ឌបឹងកេងកង រាជធានីភ្នំពេញ។
បើតាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុ គេឃើញមានផ្សែងហុយយ៉ាងទ្រលោមចេញពីជាន់ទី៣ នៃអគារហាងលក់គ្រឿងអលង្ការ គុជខ្យង និងត្បូង «ហ្គលឌែនភើល – GOLDEN PEARL»។
ប្រភពដដែលបន្តថា ភ្លាមៗនោះ កម្លាំងសមត្ថកិច្ចនៃខណ្ឌបឹងកេងកង ក៏បានសម្រួលចរាចរណ៍ជុំវិញទីតាំងកើតហេតុ ដើម្បីទុកផ្លូវឲ្យរថយន្តពន្លត់អគ្គិភ័យធ្វើការអន្តរាគមន៍ ដោយមានរថយន្តពន្លត់អគ្គិភ័យជាច្រើនគ្រឿងបានទៅដល់កន្លែងកើតហេតុ និងមានរថយន្តពន្លត់អគ្គិភ័យរបស់ការិយាល័យបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ និងរថយន្តជំនួយពីរថយន្តពន្លត់អគ្គិភ័យក្រុមហ៊ុន OCIC ទីក្រុងអូរឡាំព្យាផងដែរ កំពុងតែសហការគ្នាអន្តរាគមន៍បា.ញ់ទឹកពន្លត់ភ្លើងនៅកន្លែងកើតហេតុ ចៀសវាងបង្កឱ្យមានការឆេះរាលដាលទៅដល់ផ្ទះអ្នកជិតខាង។ តែសំណាងល្អ នៅក្នុងហេតុការណ៍ខាងលើនេះ មិនបណ្ដាលឲ្យមានមនុស្សណាម្នាក់រងរបួសឡើយ។
ពាក់ព័ន្ធក្នុងគ្រោះអគ្គិភ័យខាងលើនេះ បានបណ្ដាលឲ្យមានការខូចខាតសម្ភារៈមួយចំនួនផងដែរ។ ហើយចំពោះមូលហេតុនោះ សមត្ថកិច្ចធ្វើការសន្និដ្ឋានជាជំនាញដំបូងថា អាចបណ្ដាលមកពីឆ្លងចរន្តអគ្គិសនី៕ ដោយ ៖ រដ្ឋា
ចែករំលែកព័តមាននេះ