ខេត្តបន្ទាយមានជ័យ ៖ ជនសង្ស័យ២នាក់ ត្រូវបានមន្ត្រីយោធាការពារព្រំដែនគោក ឈរជើងក្នុងភូមិសាស្ត្រភូមិចំការគ ឃុំស្វាយចេក ស្រុកកស្វាយចេក សហការជាមួយមេភូមិចំការគ ចាប់ខ្លួននៅវេលាម៉ោង១០និង៥០នាទីព្រឹកថ្ងៃទី៨ ខែឧសភា ឆ្នាំ២០១១ រួចនាំយកមកប្រគល់ឱ្យកម្លាំងនគរបាលប៉ុស្តិ៍រដ្ឋបាលឃុំស្វាយចេក ដើម្បីបំពេញសំណុំរឿង
ខេត្តបន្ទាយមានជ័យ ៖ ជនសង្ស័យ២នាក់ ត្រូវបានមន្ត្រីយោធាការពារព្រំដែនគោក ឈរជើងក្នុងភូមិសាស្ត្រភូមិចំការគ ឃុំស្វាយចេក ស្រុកកស្វាយចេក សហការជាមួយមេភូមិចំការគ ចាប់ខ្លួននៅវេលាម៉ោង១០និង៥០នាទីព្រឹកថ្ងៃទី៨ ខែឧសភា ឆ្នាំ២០១១ រួចនាំយកមកប្រគល់ឱ្យកម្លាំងនគរបាលប៉ុស្តិ៍រដ្ឋបាលឃុំស្វាយចេក ដើម្បីបំពេញសំណុំរឿងបញ្ជូនបន្តទៅកាន់អធិការដ្ឋាននគរបាលស្រុកស្វាយចេក ។
លោកវរសេនីយ៍ត្រីស៊ី ឌី អធិការនគរបាលស្រុកស្វាយចេក បានឱ្យដឹងថា ជនសង្ស័យទាំង២នាក់នេះ ម្នាក់ឈ្មោះឆឿន ថៃ ភេទប្រុស អាយុ១៨ឆ្នាំ និងម្នាក់ទៀតឈ្មោះសៅ ថ្លើម ភេទប្រុស អាយុ១៨ឆ្នាំដូចគ្នា ពួកគេរស់នៅភូមិចំការគ ឃុំស្វាយចេក ស្រុកស្វាយចេក ។ ជនទាំង២នាក់បានធ្វើសកម្មភាពលួចយកកាបូបលុយដែលក្នុងនោះមានលុយចំនួន៣.០៦០បាត ទូរស័ព្ទដៃ១គ្រឿង និងនាឡិកាដៃ១គ្រឿង របស់មន្ត្រីយោធាការពារព្រំដែនគោក ដែលឈរជើងក្នុងភូមិសាស្ត្រភូមិចំការគ ។
លោកអធិការនគរបាលស្រុកបានឱ្យដឹងទៀតថា បើតាមលោកឡោ គង់ អាយុ៣២ឆ្នាំ ជាមន្ត្រីយោធានិងជាម្ចាស់កាបូបនិយាយថា នៅវេលាម៉ោង៧និង៣០នាទីយប់ថ្ងៃទី៥ ខែឧសភា ឆ្នាំ២០១១ គាត់បានចុះងូតទឹកអាងចំការគ ដោយដោះសម្លៀកបំពាក់ទុកលើគោក ដែលពេលចុះងូតទឹកក៏បានឃើញជនសង្ស័យទាំង២នាក់ដើរកាត់ទីនោះដែរ ប៉ុន្តែពុំបានចាប់អារម្មណ៍ទេ ។ លុះពេលងូតទឹករួចឡើងយកសម្លៀកបំពាក់មកស្លៀកពាក់ត្រួតពិនិត្យមើលទើបដឹងថា បាត់កាបូបលុយដែលក្នុងនោះមានលុយ៣.០៦០បាត ទូរស័ព្ទដៃ១គ្រឿង និងនាឡិកាដៃ១គ្រឿង ព្រមទាំងអត្តសញ្ញាណប័ណ្ណ១សន្លឹកផងដែរ ។
លុះនៅវេលាម៉ោង១០និង៥០នាទីព្រឹកថ្ងៃទី៨ ខែឧសភា ទើបចាប់ខ្លួនជនទាំង២នាក់ដោយសហការជាមួយលោកមេភូមិចំការគរួចហើយ ប្រគល់ឱ្យសមត្ថកិច្ចនគរបាលចាត់ការបន្ត រួមទាំងវត្ថុតាងផង ។ លោកវរេសនីយ៍ត្រីស៊ី ឌី បានបញ្ជាក់ថា វត្ថុតាងដែលដកហូតបានពីជនសង្ស័យរួមមានទូរស័ព្ទដៃ១គ្រឿង នាឡិកាដៃ១គ្រឿង និងអត្តសញ្ញាណ១សន្លឹក ។ នៅចំពោះមុខសមត្ថកិច្ចពួកគេទាំង២នាក់បានសារភាពថា ពួកគេពិតជាបានលួចយកកាបូបលុយ ទូរស័ព្ទដៃ និងនាឡិកាដៃមែន តែចំពោះលុយទាំង ៣.០៦០បាត ក្រោយពីលួចបានគឺយកទៅទិញថ្នាំញៀនជក់អស់ហើយ នៅយប់នោះតែម្តង ។ លោកអធិការបន្តទៀតថា ផ្អែកតាមចម្លើយសារភាពរបស់ពួកគេនិងដកហូតបានវត្ថុតាង ជាក់ស្តែង ជនទាំង២នាក់ត្រូវបានកសាងសំណុំរឿងបញ្ជូនទៅស្នងការដ្ឋាននគរបាលខេត្តដើម្បីមានវិធានការបន្តតាមនីតិវិធីច្បាប់ ៕
ចែករំលែកព័តមាននេះ