ឯកឧត្តម ស៊ុន សុវណ្ណារិទ្ធិ អភិបាលនៃគណៈអភិបាលខេត្តកំពង់ឆ្នាំង ផ្ដល់កិច្ចសម្ភាសន៍បែបនេះ ខណៈដែលឯកឧត្តមអញ្ជើញទៅបោះឆ្នោតនៅការិយាល័យលេខ ១៦៨ នៅវត្តខ្សាម ស្ថិតក្នុងសង្កាត់ខ្សាម ក្រុងកំពង់ឆ្នាំង
ខេត្តកំពង់ឆ្នាំង ៖ ឯកឧត្តម ស៊ុន សុវណ្ណារិទ្ធិ អភិបាលនៃគណៈអភិបាលខេត្តកំពង់ឆ្នាំង ផ្ដល់កិច្ចសម្ភាសន៍បែបនេះ ខណៈដែលឯកឧត្តមអញ្ជើញទៅបោះឆ្នោតនៅការិយាល័យលេខ ១៦៨ នៅវត្តខ្សាម ស្ថិតក្នុងសង្កាត់ខ្សាម ក្រុងកំពង់ឆ្នាំង នាព្រឹកថ្ងៃទី២៣ ខែកក្កដា ឆ្នាំ ២០២៣។
ឯកឧត្តមអភិបាលខេត្តកំពង់ឆ្នាំង បានបន្តថា គិតត្រឹមម៉ោង៨និង៣០នាទីព្រឹក ថ្ងៃទី២៣ ខែកក្កដានេះ ប្រជាពលរដ្ឋបានអញ្ជើញទៅបោះឆ្នោតប្រមាណ៣០% បើទោះបីមានភ្លៀងធ្លាក់ស្ទើរគ្រប់កន្លែងក្តី។ ហើយសម្រាប់ការបោះឆ្នោតជ្រើសរើសតំណាងរាស្ត្រអាណត្តិនេះ ចាប់តាំងពីថ្ងៃបើកយុទ្ធនាការឃោសនាបោះឆ្នោតថ្ងៃទី១ ខែកក្កដា រហូតដល់ថ្ងៃបិទ ការឃោសនា និងថ្ងៃបោះឆ្នោត នៅថ្ងៃនេះពុំមានបាតុភាពអ្វីកើតឡើងទេ គឺសន្តិសុខសណ្ដាប់ធ្នាប់បានល្អ ប្រជាពលរដ្ឋបាននិងកំពុងទៅបោះឆ្នោតនៅគ្រប់ការិយាល័យ។
ហើយការបោះឆ្នោតជ្រើសរើសតំណាងរាស្ត្រអាណត្តិនេះ ខេត្តកំពង់ឆ្នាំងមានគណបក្សចូលរួមឈរឈ្មោះបោះឆ្នោតមានចំនួន១៤គណបក្ស ប្រជាពលរដ្ឋគ្រប់អាយុបោះឆ្នោតចំនួន៣៥៩ ៦៨៩នាក់ ដោយបានចែកចេញជា ៨១៨ ការិយាល័យ។
ចំណែកប្រជាពលរដ្ឋដែលមកបោះឆ្នោតនៅក្នុងមណ្ឌលបោះឆ្នោតសាលាបឋមសិក្សាអារញ្ញ ក្រុងកំពង់ឆ្នាំង បានឱ្យដឹងថា ទោះបីមានភ្លៀងធ្លាក់ក៏ដោយ ទាំងប្រជាពលរដ្ឋ ទាំងខ្ញុំក៏មកបោះឆ្នោតដែរ ដើម្បីបំពេញកាតព្វកិច្ចជាពលរដ្ឋហ្នឹង ដើម្បីជ្រើសរើសថ្នាក់ដឹកនាំប្រទេសឲ្យមានការអភិវឌ្ឍន៍លើគ្រប់វិស័យ និងមានសុខសន្តិភាព។
ជាក់ស្ដែងពិនិត្យមើលទិដ្ឋភាពនៃការបោះឆ្នោត ជ្រើសរើសតំណាងរាស្ត្រអាណត្តិទី៧នេះ គឺមានសណ្តាប់ធ្នាប់ និងសន្តិសុខល្អ ពុំមានអ្វីកើតឡើងនោះឡើយ។
សូមបញ្ជាក់ផងដែរថា យោងតាមការជូនដំណឹងរបស់គណៈកម្មការជាតិរៀបចំការបោះឆ្នោតខេត្តកំពង់ឆ្នាំង បានឱ្យដឹងថា គិតត្រឹមម៉ោង១រសៀលថ្ងៃនេះ ប្រជាពលរដ្ឋបានទៅបោះឆ្នោតមានចំនួន 287 517 នាក់ បើប្រៀបធៀបប្រជាពលរដ្ឋមានអាយុឈ្មោះទៅបោះឆ្នោតមានចំនួន 359 698 នាក់ គឺថ្មើនឹង 79,93%៕
ចែករំលែកព័តមាននេះ