ខេត្តស្វាយរៀង ៖ កម្លាំងកងរាជអាវុធហត្ថខេត្តបានចាប់ខ្លួនជនសង្ស័យជាជនជាតិវៀតណាមចំនួន៧នាក់ បញ្ជូនទៅសាលាដំបូងខេត្ត ពីបទក្លែងបន្លំឯកសារសាធារណៈ ។ យោងតាមកងរាជអាវុធហត្ថខេត្តបានឱ្យដឹងថា នៅវេលាម៉ោងប្រមាណ១២និង១០នាទីថ្ងៃទី៤ ខែកក្កដា ឆ្នាំ២០២៥កន្លងទៅ…
ខេត្តស្វាយរៀង ៖ កម្លាំងកងរាជអាវុធហត្ថខេត្តបានចាប់ខ្លួនជនសង្ស័យជាជនជាតិវៀតណាមចំនួន៧នាក់ បញ្ជូនទៅសាលាដំបូងខេត្ត ពីបទក្លែងបន្លំឯកសារសាធារណៈ ។
យោងតាមកងរាជអាវុធហត្ថខេត្តបានឱ្យដឹងថា នៅវេលាម៉ោងប្រមាណ១២និង១០នាទីថ្ងៃទី៤ ខែកក្កដា ឆ្នាំ២០២៥កន្លងទៅ ដោយមានការចង្អុលបង្ហាញពីលោកឧត្តមសេនីយ៍ត្រី សុខា រ៉ានាថ មេបញ្ជាការកងរាជអាវុធហត្ថខេត្តកម្លាំងមន្ទីរស្រាវជ្រាវ និងបង្ក្រាបបទល្មើស សហការជាមួយកម្លាំងមូលដ្ឋានកងរាជអាវុធហត្ថក្រុងបាវិត ដឹកនាំដោយលោកវរសេនីយ៍ឯក ស្រី វុត្ថា មេបញ្ជាការរងកងរាជអាវុធហត្ថខេត្ត និងមានការដឹកនាំសម្របសម្រួលនីតិវិធីពីលោក ដូរ៉ាអង្គប្រទាន ព្រះរាជ អាជ្ញារងនៃអយ្យការអមសាលាដំបូងខេត្ត បានបង្ក្រាបករណីក្លែងបន្លំឯកសារសាធារណៈ នៅផ្ទះល្វែងលេខ K១២ ភូមិបាវិតកណ្តាល សង្កាត់បាវិត ក្រុងបាវិត ដោយឃាត់ខ្លួនជនសង្ស័យចំនួន៧នាក់ ។
ជាមួយនឹងការចាប់ឃាត់ខ្លួននេះ សមត្ថកិច្ចក៏បានរឹបអូស ម៉ាស៊ីនភ្លើង១គ្រឿង ម៉ាស៊ីនព្រីន៩គ្រឿង ម៉ាស៊ីនអ៊ុត២គ្រឿង ត្រាចំនួន៩(ត្រាការិយាល័យទទួលស្គាល់រដ្ឋធានីហាណូយ១ ត្រាការិយាល័យទទួលស្គាល់ទីក្រុងហូជីមិញ១ និងត្រាវាយលើឯកសារថតចម្លង៧) កុំព្យូទ័រយួរដៃ៣គ្រឿង ទូរស័ព្ទ១៦គ្រឿង លិខិតឆ្លងដែន៣ក្បាល អត្តសញ្ញាណប័ណ្ណច្បាប់ដើម៣សន្លឹក កុំព្យូទ័រលើតុ១៣គ្រឿង ត្រាផុស៣ ម៉ាស៊ីនវាយលេខ និងអក្សរផុស១គ្រឿង ឧបករណ៍កាត់តម្រឹម១គ្រឿង អត្តសញ្ញាណប័ណ្ណ ប័ណ្ណបើកបរ ប័ណ្ណបញ្ជាក់ការរៀនបើកបរ សញ្ញាបត្រអនុបណ្ឌិត សញ្ញាបត្រទុតិយភូមិ ប័ណ្ណបណ្ដុះបណ្ដាល សញ្ញាបត្រអង់គ្លេស សញ្ញាបត្របច្ចេកវិទ្យា(វៀតណាម)ក្លែងក្លាយមួយចំនួន និងជញ្ជីងសម្រាប់ថ្លឹងគ្រឿងញៀន១គ្រឿង ៕
ចែករំលែកព័តមាននេះ