ទីក្រុងម៉ូស្គូ៖ រុស្ស៊ីប្រកាសកាលពីយប់មិញថាខ្លួនត្រៀមវាយប្រហារជាខ្សែសង្វាក់ទៅលើគោលដៅនានានៅរដ្ឋធានីកៀវរបស់អ៊ុយក្រែនដែលគោលដៅទាំងនោះមានទំនាក់ទំនងជាមួយយោធាអ៊ុយក្រែន ហើយខ្លួនក៏ត្រៀមវាយប្រហារអគាររបស់រដ្ឋាភិបាលថែមទៀតផង។ រុស្ស៊ីអំពាវនាវឱ្យជនជាតិបរទេសចាកចេញជាប្រញាប់។ ការថ្លែងរបស់រុស្ស៊ីដូចខាងលើនេះកើតមានឡើងមួយថ្ងៃបន្ទាប់ពីខ្លួនវាយប្រហារទីក្រុងកៀវយ៉ាងខ្លាំងក្លាបំផុតមិនធ្លាប់មានចាប់តាំងពីសង្គ្រាមផ្ទុះឡើងដំបូង។
ទោះជាយ៉ាងណាក្ដី រដ្ឋមន្ត្រីការបរទេសអ៊ុយក្រែន លោកអានឌ្រី ស៊ីប៊ីហា (Andrii Sybiha) បានជំរុញឱ្យក្រុមសម្ព័ន្ធមិត្តកុំចុះចាញ់ការគំរាមកំហែងរបស់រុស្ស៊ីឱ្យសោះ។ ចំណែកប្រធានគណៈកម្មការអឺរ៉ុបថ្លែងថាសមាជិកទាំង២៧ប្រទេសនៃសហភាពអឺរ៉ុបក៏មិនទាន់ទៅណាឆ្ងាយពីអ៊ុយក្រែនដែរ។ រដ្ឋមន្ត្រីការបរទេសរុស្ស៊ី លោកសឺហ្គេ ឡាវរ៉ូស (Sergei Lavrov) ថ្លែងប្រាប់សមភាគីអាមេរិក លោករូប៊ីអូថាគម្រោងវាយប្រហាររបស់រុស្ស៊ីលើកនេះដើម្បីឆ្លើយតបទៅនឹងអ្វីដែលលោកចាត់ទុកថាជាការវាយប្រហារបែបភេរវកម្មរបស់អ៊ុយក្រែនទៅលើជនស៊ីវិលនៅរុស្ស៊ី។
សេចក្ដីថ្លែងការណ៍របស់រុស្ស៊ីសរសេររៀបរាប់ថាកងទ័ពរុស្ស៊ីត្រៀមវាយប្រហារជាខ្សែសង្វាក់ទៅលើទីតាំងនានាស្ថិតនៅក្នុងរដ្ឋធានីកៀវដែលអ៊ុយក្រែនប្រើប្រាស់សម្រាប់បម្រើឱ្យកងទ័ពនៅក្នុងករណីដែលពួកគេត្រូវការ។ ក្រៅពីនេះ រុស្ស៊ីក៏ត្រៀមវាយប្រហារមជ្ឈមណ្ឌលដែលទទួលខុសត្រូវខាងចេញសេចក្ដីសម្រេចចិត្តផងដែរ។ នៅក្នុងការចេញសេចក្ដីប្រកាសកាលពីមុននោះ រុស្ស៊ីអំពាវនាវឱ្យជនជាតិបរទេស រួមទាំងក្រុមអ្នកការទូតផងដែរ ប្រញាប់ចាកចេញពីទីក្រុងកៀវកាន់តែឆាប់កាន់តែល្អ។
រុស្ស៊ីបានលើកយកទឡ្ហីករណ៍ដែលអ៊ុយក្រែនវាយប្រហារដោយចេតនាដោយប្រើប្រាស់ដ្រូនកាលពីថ្ងៃសុក្រសប្ដាហ៍មុនទៅលើអគារស្នាក់នៅរបស់និស្សិតនៅតំបន់លូហានដែលស្ថិតក្រោមការគ្រប់គ្រងរបស់រុស្ស៊ី។ យោធាអ៊ុយក្រែនបាននិយាយបដិសេធថាខ្លួនមិនបានវាយប្រហារទីនោះដូចការចោទប្រកាន់របស់រុស្ស៊ីទេ។ អ៊ុយក្រែនអះអាងថាខ្លួនវាយប្រហារតែបញ្ជាការដ្ឋានដ្រូនរបស់រុស្ស៊ីនៅតំបន់នោះតែប៉ុណ្ណោះ។ នៅទីក្រុងកៀវ ក្រុមអ្នកជួយសង្គ្រោះនៅតែបន្តដោះស្រាយបោសសម្អាតអ្វីដែលនៅសល់ពីការវាយប្រហាររបស់រុស្ស៊ីកាលពីថ្ងៃអាទិត្យដែលសម្លាប់មនុស្ស២នាក់ និងរបួស៩១នាក់៕ ប្រភព៖ Reuters និងប្រភពដទៃទៀត
ចែករំលែកព័តមាននេះ