ភ្នំពេញ៖ កីឡាករ សៀង ចន្ធា អតីតយុវជនសាលាបាល់ទាត់ជាតិបាទី ដែលបានចាប់ផ្ដើមអាជីពរបស់ខ្លួន នៅទីនោះ កាលពីឆ្នាំ២០១៤ មានឱកាសចេញទៅប្រកបអាជីព នៅលីគទី២របស់ប្រទេសកាតា។…
ភ្នំពេញ៖ កីឡាករ សៀង ចន្ធា អតីតយុវជនសាលាបាល់ទាត់ជាតិបាទី ដែលបានចាប់ផ្ដើមអាជីពរបស់ខ្លួន នៅទីនោះ កាលពីឆ្នាំ២០១៤ មានឱកាសចេញទៅប្រកបអាជីព នៅលីគទី២របស់ប្រទេសកាតា។ សៀង ចន្ធា ជាកីឡាករទី១ ក្នុងប្រវត្តិសាស្រ្តកម្ពុជា ដែលបានទៅប្រកបអាជីពនៅលីគនៃប្រទេសកាតា។
សហព័ន្ធកីឡាបាល់ទាត់កម្ពុជា បានប្រកាសនៅថ្ងៃទី២១កក្កដានេះថា លោកនាយឧត្តមសេនីយ៍ សៅ សុខា ប្រធានសហព័ន្ធកីឡាបាល់ទាត់កម្ពុជា បានជួបសំណេះសំណាល និងផ្តាំផ្ញើទៅកាន់កីឡាករ សៀង ចន្ធា ដែលត្រៀមចេញទៅប្រកបអាជីព នៅលីគទី២ នៅប្រទេសកាតា។
លោកនាយឧត្តមសេនីយ៍ សៅ សុខា ជូនពរ ឲ្យកីឡាករ សៀង ចន្ធា ទទួលបានជោគជ័យ សម្រាប់ខ្លួនផ្ទាល់ ក្រុមគ្រួសារ និងប្រទេសជាតិ។ ក្នុងពេលប្រកបអាជីព នៅប្រទេសកាតា គឺត្រូវពង្រឹងគុណភាពខ្លួនឯង បង្កើនសមត្ថភាពនៃការលេង ដើម្បីមកជួយក្រុមជម្រើសជាតិកម្ពុជា នាពានរង្វាន់ផ្សេងៗ នៅពេលខាងមុខ។
ក្លឹបបាល់ទាត់បឹងកេត បានប្រកាសថា ក្លឹបបាល់ទាត់បឹងកេត បានឈានដល់កិច្ចព្រមព្រៀង ក្នុងការផ្ទេរកីឡាករ សៀង ចន្ធា ទៅកាន់ក្លិបមួយ នៃលីគប្រទេសកាតា ក្នុងលក្ខខណ្ឌខ្ចីជើង។ សៀង ចន្ធា អាយុ ២១ឆ្នាំ នឹងធ្វើការហោះហើរ ទៅកាន់ប្រទេសកាតា នៅថ្ងៃទី២២ កក្កដា ដើម្បីឱ្យទាន់ការបោះជំរុំ Pre-season របស់ក្លិបថ្មី៕
ចែករំលែកព័តមាននេះ