- ភ្នំពេញ
នៅសល់តែ២ ឬ៣ថ្ងៃទៀតប៉ុណ្ណោះ ថ្ងៃបោះឆ្នោតនឹងមក។ ការបោះឆ្នោតដែលពលរដ្ឋរង់ចាំមើលថា គណបក្សណានឹងឈ្នះឆ្នោត ហើយនាយករដ្ឋមន្ត្រីអាណត្តិថ្មីជានរណា?
នៅសល់តែ២ ឬ៣ថ្ងៃទៀតប៉ុណ្ណោះ ថ្ងៃបោះឆ្នោតនឹងមក។ ការបោះឆ្នោតដែលពលរដ្ឋរង់ចាំមើលថា គណបក្សណានឹងឈ្នះឆ្នោត ហើយនាយករដ្ឋមន្ត្រីអាណត្តិថ្មីជានរណា?
នៅថ្ងៃសុក្រ ទី២១ ខែកក្កដានេះ គឺជាថ្ងៃយុទ្ធនាការឃោសនាបោះឆ្នោតចុងក្រោយ សល់ពីនោះ គឺថ្ងៃស និងថ្ងៃបោះឆ្នោតតែម្តង។ ថ្ងៃស និងថ្ងៃបោះឆ្នោត គណៈកម្មាធិការជាតិរៀបចំការបោះឆ្នោត ហាមមិនឱ្យមានសកម្មភាពនយោបាយទៀតនោះទេ។ គ្រប់គណបក្សនយោបាយទាំងអស់ ត្រូវរក្សាភាពស្ងៀមស្ងាត់ ។ ការលក់ដូរ និងទទួលទានគ្រឿងស្រវឹង ក៏ត្រូវហាមឃាត់ដែរ។
និយាយពីថ្ងៃបោះឆ្នោតវិញ។ ការបោះឆ្នោតបោះឆ្នោតនៅទូទាំងប្រទេស នឹងបើកទ្វារចាប់ពីម៉ោង៧ព្រឹក រហូតដល់ម៉ោង៣រសៀល។ ចាប់ពីម៉ោង៣រសៀលទៅ ការិយាល័យបោះឆ្នោតត្រូវក្លាយជាការិយាល័យរាប់សន្លឹកឆ្នោត។ តាមសេចក្តីជូនដំណឹងរបស់ គ.ជ.ប នៅថ្ងៃទី១៩ ខែកក្កដា ឆ្នាំ២០២៣ បានឱ្យដឹងថា គ.ជ.ប នឹងធ្វើការផ្សាយលទ្ធផលនៃការបោះឆ្នោតជ្រើសតាំងតំណាងរាស្ត្រនីតិកាលទី៧នោះ នៅល្ងាចថ្ងៃទី២៣ ខែកក្កដានោះតែម្តង រហូតដល់ម៉ោង១២អធ្រាត្រ ហើយបន្តផ្សាយទៀតនៅថ្ងៃទី២៤ ខែកក្កដា ចាប់ពីម៉ោង៨ព្រឹកទៅ។
ការផ្សាយលទ្ធផលបោះឆ្នោតបឋមនេះ មាននៅលើកញ្ចក់ទូរទស្សន៍ជាតិកម្ពុជា វិទ្យុជាតិកម្ពុជា ទីភ្នាក់ងារសារព័ត៌មាន AKP គេហទំព័រ គ.ជ.ប កម្មវិធីទូរស័ព្ទដៃរបស់ គ.ជ.ប Facebook និង You Tube របស់ គ.ជ.ប ផងដែរ។
គណៈកម្មាធិការជាតិរៀបចំការបោះឆ្នោត (គ.ជ.ប) បានដឹកជញ្ជូនសន្លឹកឆ្នោត ទឹកខ្មៅជ្រលក់ដៃ បញ្ជីបោះឆ្នោត ត្រាសម្ងាត់ រួមទាំងសម្ភារៈមួយចំនួនទៀតចេញពីឃ្លាំងទៅប្រគល់ជូនគណៈកម្មការរាជធានី-ខេត្ត រៀបចំការបោះឆ្នោតទាំង២៥ហើយ កាលពីព្រឹកថ្ងៃទី១៨ ខែកក្កដា ឆ្នាំ២០២៣នេះ។ សន្លឹកឆ្នោតជាង១៣លានសន្លឹក ត្រូវបានបោះពុម្ព ។ ចំណែកទឹកខ្មៅជ្រលក់ម្រាមដៃ គ.ជ.ប បានបញ្ជាទិញពីក្រុមហ៊ុនដដែល ក្នុងប្រទេសឥណ្ឌា មានជាង៥,២ម៉ឺនដប។
ការបោះឆ្នោតជ្រើសតាំងតំណាងរាស្ត្រនីតិកាលទី៧ នឹងប្រព្រឹត្តទៅនៅថ្ងៃទី២៣ ខែកក្កដា ឆ្នាំ២០២៣ មានគណបក្ស១៨ ចូលរួមនឹងមានពលរដ្ឋក្នុងបញ្ជឺបោះឆ្នោតប្រមាណ១០លាននាក់៕
ចែករំលែកព័តមាននេះ