មន្ត្រីនគរបាលមួយរូប នៅការិយាល័យប្រឆាំងការជួញដូរមនុស្ស និងការពារអនីតិជនខេត្ត បានស្លា.ប់បាត់បង់ជីវិតនៅពេលបញ្ជូនដល់មន្ទីរពេទ្យបង្អែកខេត្ត ក្រោយពីជួបគ្រោះថ្នាក់បើកម៉ូតូបុកគូទរថយន្តដឹកសំរាម
ខេត្តកំពត ៖ មន្ត្រីនគរបាលមួយរូប នៅការិយាល័យប្រឆាំងការជួញដូរមនុស្ស និងការពារអនីតិជនខេត្ត បានស្លា.ប់បាត់បង់ជីវិតនៅពេលបញ្ជូនដល់មន្ទីរពេទ្យបង្អែកខេត្ត ក្រោយពីជួបគ្រោះថ្នាក់បើកម៉ូតូបុកគូទរថយន្តដឹកសំរាម។
ឧប្បត្តិហេតុគ្រោះថ្នាក់ខាងលើនេះ កើតឡើងនៅផ្លូវជាតិលេខ៣ទិសដៅ កំពត-ព្រះសីហនុ ចំណុចព្រំប្រទល់រវាងក្រុងកំពតនិងក្រុងបូកគោ ចន្លោះបង្គោលគីឡូម៉ែត្រលេខ១៥១-១៥២ ស្ថិតក្នុងភូមិតាដឹប សង្កាត់អណ្តូងខ្មែរ ក្រុងកំពត កាលពីវេលាម៉ោងប្រមាណ៨និង៥០នាទីយប់ថ្ងៃទី១៩ ខែកក្កដា ឆ្នាំ២០២៣កន្លងទៅ ។
លោកវរសេនីយ៍ឯក ពុធ ស៊ឺង នាយការិយាល័យនគរបាលចរាចរណ៍ផ្លូវគោកខេត្ត បានឲ្យដឹងថា ជនរងគ្រោះឈ្មោះ ប៉ាន់ សំអឿន ភេទប្រុស អាយុ៥៥ឆ្នាំ មានទីលំនៅក្នុងភូមិចង្កោន សង្កាត់ព្រែកត្នោត ក្រុងបូកគោ ជិះម៉ូតូម៉ាក PCX ពណ៌ស ពាក់ផ្លាកលេខ កំពត ១O-៤៥១៨ ពីខាងកើតទៅខាងលិច
បើតាមប្រភពព័ត៌មានឲ្យដឹងថា មុនពេលកើតហេតុមានភ្លៀងធ្លាក់ខ្លាំង ហើយទំនងជនរងគ្រោះមើលមិនឃើញស្តុបរថយន្តដែលកំពុងចតក្បែរចិញ្ចើមផ្លូវ ដែលកម្មករកំពុងជញ្ជូនសំរាមពីផ្ទះនៅក្បែរផ្លូវដាក់ក្នុងរថយន្ត ។ លុះម៉ូតូជនរងគ្រោះទៅដល់ចំណុចខាងលើ ក៏បុកពេញទំហឹងតែម្តង ។
លោកនាយការិយាល័យឲ្យដឹងទៀតថា រថយន្តដឹកសំរាមដែលត្រូវម៉ូតូបុកពីក្រោយនេះម៉ាកហ៊ីយ៉ាន់ដាយ ពណ៌សលាយខៀវ អ្នកបើកបរឈ្មោះ ចាន់ សុខខៃ ភេទប្រុស អាយុ៣០ឆ្នាំ មានទីលំនៅក្នុងភូមិកំពង់ត្នោត ឃុំកូនសត្វ ស្រុកទឹកឈូ ។
នៅក្នុងគ្រោះថ្នាក់នេះ ម៉ូតូខូចខាតធ្ងន់ រីឯរថយន្តខូចខាតស្រាល ហើយត្រូវបានសមត្ថកិច្ចនាំយកទៅរក្សាទុកជាបណ្ដោះអាសន្ននៅអធិការដ្ឋាននគរបាលក្រុងកំពត ដើម្បីដោះស្រាយតាមនីតិវិធីនៅពេលក្រោយ ។ ចំណែកស.ពជនរងគ្រោះ ប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី ៕
ចែករំលែកព័តមាននេះ