រាជធានីភ្នំពេញ ៖ មន្ត្រីនគរបាលក្រសួងមហាផ្ទៃមួយរូបត្រូវបានសមត្ថកិច្ចនគរបាលប៉ុស្តិ៍ទន្លេបាសាក់ ខណ្ឌចំការមន ឃាត់ខ្លួនកាលពីយប់ថ្ងៃទី៧ ឧសភា ឆ្នាំ២០១១ នៅផ្ទះជួលរបស់ខ្លួន បន្ទាប់ពីបានធ្វើសកម្មភាពវាយបង្ករបួសស្នាមលើស្ត្រីជាភរិយាបណ្តាលឱ្យរងរបួសធ្ងន់ធ្ងរ ។ មន្ត្រីនគរបាលដែលត្រូវបានឃាត់ខ្លួនខាងលើនេះឈ្មោះគូ ដាណេ
រាជធានីភ្នំពេញ ៖ មន្ត្រីនគរបាលក្រសួងមហាផ្ទៃមួយរូបត្រូវបានសមត្ថកិច្ចនគរបាលប៉ុស្តិ៍ទន្លេបាសាក់ ខណ្ឌចំការមន ឃាត់ខ្លួនកាលពីយប់ថ្ងៃទី៧ ឧសភា ឆ្នាំ២០១១ នៅផ្ទះជួលរបស់ខ្លួន បន្ទាប់ពីបានធ្វើសកម្មភាពវាយបង្ករបួសស្នាមលើស្ត្រីជាភរិយាបណ្តាលឱ្យរងរបួសធ្ងន់ធ្ងរ ។ មន្ត្រីនគរបាលដែលត្រូវបានឃាត់ខ្លួនខាងលើនេះឈ្មោះគូ ដាណេ អាយុ៣១ឆ្នាំ ចំណែកឯស្ត្រីជាភរិយាដែលប្តឹងឱ្យសមត្ថកិច្ចចាប់ប្តីរបស់ខ្លួនឈ្មោះមិន លក្ខិណា អាយុ៣០ឆ្នាំ ។ គ្រួសារប្តី-ប្រពន្ធនេះស្នាក់នៅផ្ទះជួលលេខ១៣២ មហាវិថីព្រះនរោត្តម សង្កាត់ទន្លេបាសាក់ ។
តាមប្រភពព័ត៌មានទាក់ទិននឹងការឃាត់ខ្លួនមន្ត្រីនគរបាលខាងលើបានឱ្យដឹងថា កាលពីយប់ថ្ងៃទី៧ ឧសភា ឈ្មោះគូ ដាណេ បន្ទាប់ពីធ្វើការងាររួចបានវិលត្រឡប់ទៅផ្ទះរបស់ខ្លួន ។ ប៉ុន្តែពេលមកដល់ផ្ទះ ប្រពន្ធឈ្មោះមិន លក្ខិណា មិនបើកទ្វារឱ្យ ជាហេតុធ្វើឱ្យរូបគេខឹង ក៏ធាក់ទ្វារទម្លុះចូលទៅក្នុងផ្ទះ រួចប្រើអំពើហិង្សាវាយតប់លើស្ត្រីជាប្រពន្ធ បណ្តាលឱ្យរងរបួសបាក់ក្តោងចម្រុះ រហូតសន្លប់បាត់ស្មារតី ។ បន្ទាប់ពីមានហេតុការណ៍ហិង្សាកើតឡើង សមត្ថកិច្ចមូលដ្ឋានបានចុះទៅអន្តរាគមន៍ឃាត់ខ្លួនឈ្មោះគូ ដាណេ នាំមកកាន់អធិការដ្ឋាននគរបាលខណ្ឌចំការមន ដើម្បីចាត់ការតាមផ្លូវច្បាប់ ។
នៅមុខសមត្ថកិច្ច ឈ្មោះគូ ដាណេ និយាយថា មូលហេតុដែលខ្លួនដាច់ចិត្តវាយប្រពន្ធ គឺដោយសារប្រពន្ធរបស់ខ្លួនជាស្រីចូលចិត្តលេងល្បែងស៊ីសង មិនគិតកូនចៅនៅផ្ទះ។ ទោះជាយ៉ាងនេះក្តី ឈ្មោះគូ ដាណេ មានគំនិតចង់សុំទោសប្រពន្ធ ដើម្បីឱ្យសមត្ថកិច្ចដោះលែងទៅរកស៊ីចិញ្ចឹមកូន២នាក់បន្តទៀត ។ ដោយឡែកស្ត្រីជាប្រពន្ធឈ្មោះមិន លក្ខិណា មិនអនុគ្រោះដល់ប្តីឡើយ គឺសុំឱ្យសមត្ថកិច្ចចាត់ការតាមច្បាប់ ។ ដូច្នេះសមត្ថកិច្ចបានសម្រេចកសាងសំណុំរឿងបញ្ជូនឈ្មោះគូ ដាណេ ទៅសាលាដំបូងរាជធានីភ្នំពេញ តាមនីតិវិធី៕
ចែករំលែកព័តមាននេះ