បុគ្គលិកប្រចាំការចាក់សោ រួចចេញក្រៅ ស្រាប់តែផ្អើលឆេះកាប៊ីនភ្លើងក្នុងបរិវេណបុរីមួយកន្លែង
- សៀមរាប
ខេត្តសៀមរាប ៖ មានករណីឆេះកាប៊ីនភ្លើង ក្នុងបរិវេណបុរីអចលនទ្រព្យអង្គរ បង្កការភ្ញាក់ផ្អើលដល់
ខេត្តសៀមរាប ៖ មានករណីឆេះកាប៊ីនភ្លើង ក្នុងបរិវេណបុរីអចលនទ្រព្យអង្គរ បង្កការភ្ញាក់ផ្អើលដល់ប្រជាពលរដ្ឋនាំគ្នាទាញសំលៀកបំពាក់ ទូខោអាវរត់ប្រសាច ទាំងក្បាលព្រលប់ ខណៈកាប៊ីនភ្លើងកំពុងឆាបឆេះយ៉ាងសន្ធោសន្ធៅ ក៏មានប្រជាពលរដ្ឋ និងប្រជាការពារជួយពន្លត់ទាន់ពេល មិនបណ្តាលឱ្យឆេះរាលដាលដល់ផ្ទះប្រជាពលរដ្ឋឡើយ។
ហេតុការណ៍ខាងលើនេះបានបង្កការភ្ញាក់ផ្អើលកើតឡើងកាលពីថ្ងៃទី១៨ ខែកក្កដា ឆ្នាំ២០២៣ វេលាម៉ោង៦និង៣០នាទីយប់ ត្រង់ចំណុចកាប៊ីនភ្លើង ស្ថិតក្នុងបរិវេណបុរីអចលនទ្រព្យអង្គរ នៅភូមិគោកត្នោត ឃុំកណ្តែក ស្រុកប្រាសាទបាគង ខេត្តសៀមរាប ហើយភ្លើងបានរលត់ទៅវិញនៅវេលាម៉ោង៦និង៥២នាទីយប់ថ្ងៃដដែល ។
បើតាមប្រសាសន៍របស់លោកឧត្តមសេនីយ៍ត្រី ឌុត ខុន ស្នងការរងទទួលការិយាល័យបង្ការពន្លត់អគ្គិភ័យនិងសង្គ្រោះ បានប្រាប់ភ្នាក់ងារកោះសន្តិភាព នៅវេលាម៉ោង៨និង៤០នាទីព្រឹកថ្ងៃទី១៩ ខែកក្កដា ឆ្នាំ២០២៣ នេះថា មានករណីទុស្សេកាប៊ីនភ្លើង នៅក្នុងបុរីអចលនទ្រព្យអង្គរ ស្ថិតនៅចំណុចភូមិគោកត្នោត ឃុំកណ្ដែក ស្រុកប្រាសាទបាគង ខេត្តសៀមរាប តាមបណ្ដោយផ្លូវជាតិលេខ៦ ចុះពីផ្លូវជាតិ២គីឡូម៉េត្រ ចម្ងាយពីអធិការដ្ឋាន១០គីឡូម៉ែត្រ បណ្តាលឱ្យរងការខូចខាតកាប៊ីនចែកចាយភ្លើងក្នុងបុរី១បន្ទប់ ។ ករណីឆេះនេះមិនបណ្ដាលឱ្យប៉ះពាល់ដល់ផ្ទះបងប្អូនប្រជាពលរដ្ឋដែលនៅជុំវិញក្នុងបុរីនោះទេ ដោយសារប្រជាពលរដ្ឋនិងប្រជាការពារជួយពន្លត់ទាន់ពេល។
លោកបានបញ្ជាក់ថា ក្នុងពេលកំពុងកើតហេតុខាងលើ រថយន្ដពន្លត់អគ្គីភ័យរបស់ស្រុកប្រាសាទបាគង បានចេញជួយអន្តរាគមន៍១គ្រឿង ដោយពុំបានប្រើប្រាស់ទឹកនោះទេ ដោយសារក្រុមការងារគ្រប់គ្រងបុរី និងនគរបាលប៉ុស្ដិ៍ ប្រជាការពារ បានប្រើប្រាស់បំពង់ពន្លត់អគ្គីភ័យអស់ចំនួន២ បំពង់ ហើយគ្រប់គ្រងបានទាន់ពេលវេលាផងដែរ។
លោកបានបញ្ជាក់ថា មូលហេតុ គឺនៅពេលបុគ្គលិកអគ្គិសនីដែលនៅចាំកាប៊ីនភ្លើងចាក់សោរចោល ចេញទៅក្រៅ ស្រាប់តែមានករណីទុស្សេកាប៊ីនភ្លើងឆេះផ្អើល ។ លោកបញ្ជាក់ទៀតថា ក្នុងករណីឆេះកាប៊ីនភ្លើងនោះ ត្រូវបានក្រុមការងារអគ្គិសនីកំពុងចុះពិនិត្យ និងរាយការណ៍ដល់ថ្នាក់លើភ្លាមៗទាំងល្ងាចថ្ងៃទី១៨ ខែកក្កដា ឆ្នាំ២០២៣ ផងដែរ៕
ចែករំលែកព័តមាននេះ