ក្រុមហ៊ុនអចលនទ្រព្យយក្សចិន ប្រកាសពីការខាតបង់ជាង៨០ពាន់លានដុល្លារ
ចិន ៖ ក្រុមហ៊ុនអចលនទ្រព្យយក្សរបស់ប្រទេសចិន Evergrande ដែលបានរងគ្រោះដោយវិបត្តិ បាន
ចិន ៖ ក្រុមហ៊ុនអចលនទ្រព្យយក្សរបស់ប្រទេសចិន Evergrande ដែលបានរងគ្រោះដោយវិបត្តិ បានលាតត្រដាងរបាយការណ៍ក្នុងឆ្នាំ ២០២១ និង ២០២២ របស់ខ្លួន ដែលខាតបង់ប្រាក់សរុបចំនួន ៨១.១ពាន់លានដុល្លារអាមេរិក។
ក្រុមហ៊ុន Evergrande បានជួបបញ្ហាជាមួយនឹងបំណុលប្រមាណ ៣០០ពាន់លានដុល្លារ ដែលការខាតបង់ដ៏ធំនេះ បង្ហាញពីចំនួនអ្នកអភិវឌ្ឍន៍ជួបបញ្ហានៅក្នុងប៉ុន្មានឆ្នាំថ្មីៗនេះ ដោយសារតែព្យុះភ្លៀងនៃវិបត្តិទីផ្សារអចលនទ្រព្យនៅចិន ដែលជាប្រទេសសេដ្ឋកិច្ចធំលំដាប់ទី២ពិភពលោក បន្ទាប់ពីសហរដ្ឋអាមេរិក។
ការផ្សាយពាណិជ្ជកម្ម នៅក្នុងការដាក់ពាក្យទៅកាន់ផ្សារហ៊ុនហុងកុង កាលពីល្ងាចថ្ងៃទី១៧ ខែកក្កដា ឆ្នាំ២០២៣ ក្រុមហ៊ុន Evergrande បានប្រកាសថា ខ្លួនបានខាតបង់ប្រាក់ប្រមាណ ៦៦ពាន់លានដុល្លារ នៅក្នុងឆ្នាំ ២០២១ និងប្រមាណ ១៥ពាន់លានដុល្លារ កាលពីឆ្នាំមុន ដោយប្រាក់ចំណូលបានធ្លាក់ចុះជាងពាក់កណ្តាលក្នុងរយៈពេល២ឆ្នាំ។
ក្រុមហ៊ុនបានបន្តថា ការខាតបង់នេះ គឺដោយសារតែហេតុផលមួយចំនួន រួមទាំងការធ្លាក់ចុះតម្លៃអចលនទ្រព្យ និងទ្រព្យសម្បត្តិផ្សេងទៀត ក៏ដូចជាការចំណាយលើការខ្ចីប្រាក់ខ្ពស់ពេក។ ភាគហ៊ុននៅក្នុងក្រុមហ៊ុន Evergrande ដែលធ្លាប់ជាក្រុមហ៊ុនអភិវឌ្ឍន៍អចលនទ្រព្យលក់ដាច់បំផុតរបស់ប្រទេសចិន ត្រូវបានផ្អាកពីការជួញដូរ ចាប់តាំងពីខែមីនា ឆ្នាំមុន។
ឧស្សាហកម្មអចលនទ្រព្យរបស់ប្រទេសចិន បានរង្គោះរង្គើយ៉ាងខ្លាំង នៅពេលដែលច្បាប់ថ្មី ដើម្បីគ្រប់គ្រងចំនួនក្រុមហ៊ុនអចលនទ្រព្យធំៗ អាចខ្ចីប្រាក់ ត្រូវបានណែនាំនៅក្នុងឆ្នាំ ២០២០។ នៅឆ្នាំបន្ទាប់ ក្រុមហ៊ុន Evergrande បានខកខានពេលវេលាកំណត់ដ៏សំខាន់ ហើយមិនបានសងការប្រាក់លើប្រាក់កម្ចីអន្តរជាតិប្រហែល ១.២ពាន់លានដុល្លារ។ បញ្ហាហិរញ្ញវត្ថុរបស់ក្រុមហ៊ុន Evergrande បានពុះកញ្ជ្រោលពេញឧស្សាហកម្មអចលនទ្រព្យរបស់ចិន ដោយមានអ្នកអភិវឌ្ឍន៍មួយចំនួនទៀត បានជំពាក់បំណុលគេ ហើយបានចាកចេញពីគម្រោងសាងសង់ ដែលមិនទាន់រួចរាល់នៅទូទាំងប្រទេស។
កាលពីដើមឆ្នាំនេះ Evergrande បានដាក់ចេញនូវផែនការ ដើម្បីរៀបចំរចនាសម្ព័ន្ធឡើងវិញ នូវបំណុលក្រៅប្រទេសប្រហែល ២០ពាន់លានដុល្លារ។ ក្រុមហ៊ុន ដែលកំពុងជាប់បំណុល ៣០០ពាន់លានដុល្លារមួយនេះ បានព្យាយាមពង្រីកសកម្មភាពរបស់ខ្លួនយ៉ាងខ្លាំងក្លា ដើម្បីក្លាយជាក្រុមហ៊ុនដ៏ធំបំផុតរបស់ចិន។ នៅក្នុងរយៈពេលជាងមួយទសវត្សចុងក្រោយនេះ ការពង្រីកបានគ្របដណ្ដប់លើឧស្សាហកម្មជាច្រើន ដែលរួមមានទាំងកីឡា ការកម្សាន្ត និងការផលិតរថយន្តអគ្គិសនី។
ជាក់ស្តែង នៅក្នុងឆ្នាំ ២០១០ ក្រុមហ៊ុន Evergrande បានកាន់កាប់ក្លិបបាល់ទាត់ Guangzhou FC ហើយបានសម្រេចប្តូរឈ្មោះទៅជា Guangzhou Evergrande Taobao FC ។ ជាមួយនឹងការបោះទុនថ្មី ក្រុមនេះ ត្រូវបានពង្រឹង ហើយភ្លាមៗនោះ បានឈានដល់កម្រិតកំពូលនៃបាល់ទាត់ចិន ដោយចាប់ពីឆ្នាំ ២០១១ ពួកគេបានឈ្នះជើងឯកលីគកំពូលចិន CSL ៨សម័យកាល ។
យ៉ាងណាមិញ កាលពីឆ្នាំមុន ក្លឹបនេះ បានធ្លាក់ទៅលីគលំដាប់ទី២ចិន ខណៈដែលផែនការរបស់ក្រុមហ៊ុន Evergrande សង់កីឡដ្ឋានតម្លៃ ១.៨ពាន់លានដុល្លារ ក៏ត្រូវបានលុបចោល ហើយក្លិបក៏បានប្ដូរទៅប្រើឈ្មោះចាស់របស់ខ្លួនវិញ៕ (ប្រភពពី BBC)
ចែករំលែកព័តមាននេះ