តាមអំណាចសាលក្រមរបស់សាលាដំបូងរាជធានីភ្នំពេញ លេខ១៨៣២ ចុះថ្ងៃទី១៧ ខែកក្កដា ឆ្នាំ២០២៣ បានប្រកាសសម្រេចផ្ដន្ទាទោសលោកមេធាវី ផេង ស៊ីដេត ដាក់ពន្ធនាគារកំណត់២ឆ្នាំ តែទោសនេះត្រូវព្យួរទាំងអស់ ក្រោមការចោទប្រកាន់ពីបទ
រាជធានីភ្នំពេញ ៖ តាមអំណាចសាលក្រមរបស់សាលាដំបូងរាជធានីភ្នំពេញ លេខ១៨៣២ ចុះថ្ងៃទី១៧ ខែកក្កដា ឆ្នាំ២០២៣ បានប្រកាសសម្រេចផ្ដន្ទាទោសលោកមេធាវី ផេង ស៊ីដេត ដាក់ពន្ធនាគារកំណត់២ឆ្នាំ តែទោសនេះត្រូវព្យួរទាំងអស់ ក្រោមការចោទប្រកាន់ពីបទ «ផ្ដល់សក្ខីកម្មក្លែង» និងបង្គាប់ឲ្យសងជំងឺចិត្តទៅដើមបណ្ដឹងចំនួន៤លានរៀល។ ចំណែកបទចោទពីបទ «ប.រិហា.របង្កាច់កេរ្តិ៍» ត្រូវបានតុលាការសម្រេចលើកលែងចោទ និងបើកផ្លូវប្ដឹងឧទ្ធរណ៍តាមកំណត់ច្បាប់ ។
សូមរម្លឹកថា កាលពីរសៀលថ្ងៃទី១២ ខែកក្កដា ឆ្នាំ២០២៣ លោក លិ សុខា ចៅក្រមជំនុំជម្រះសាលាដំបូងរាជធានីភ្នំពេញ បានលើកយកសំណុំរឿងព្រហ្មទណ្ឌលេខ៣២៥៧ ចុះថ្ងៃទី៥ ខែកក្កដា ឆ្នាំ២០២២ មកបើកសវការជាសាធារណៈដែលមានជនជាប់ចោទឈ្មោះ ផេង ស៊ីដេត ភេទប្រុស អាយុ៤៨ឆ្នាំ ជនជាតិខ្មែរ មុខរបរមេធាវី ជាប់ចោទពីបទ.ផ្តល់សក្ខីកម្មក្លែងក្លាយ និងបទបរិ.ហា.របង្កាច់កេរ្តិ៍ ដែលប្រព្រឹត្តនៅរាជធានីភ្នំពេញ កាលពីថ្ងៃទី១៣ ខែមិថុនា ឆ្នាំ២០២២ តាមច្បាប់បញ្ញាត្តិមាត្រា៣១១ និងមាត្រា ៥៤៥ នៃក្រមព្រហ្មទណ្ឌ ។
ដើមបណ្តឹងក្នុងសំណុំរឿងខាងលើនេះ គឺលោកស្រី ឃី ជឺ ជាអ្នកសារព័ត៌មានអនឡាញឈ្មោះ «ស្រឡាញ់យុត្តិធម៍» ផ្តើមចេញពីរឿងដីវត្តគោកបញ្ជាន់ ដែលអ្នកលក់យកលុយចែកគ្នាចាយហ្មត់ហើយ បើមិនជឿទៅសួរព្រះចៅអធិការ និងគណៈកម្មការវត្តដឹងទាំងអស់។
នៅក្នុងបន្ទប់សវនាការជនជាប់ចោទ ឈ្មោះ ផេង ស៊ីដេត បានឈរក្នុងរង្វង់ក្រចកសេះ ដើម្បីផ្តល់ចម្លើយក្នុងការសួរដេញដោលលើអង្គហេតុ បណ្ដាលឲ្យមានការចោទប្រកាន់ពីសំណាក់តំណាងអយ្យការអមសាលាដំបូងរាជធានីភ្នំពេញ។ ប៉ុន្តែជនជាប់ចោទហាក់បីដូចជា មិនឆ្លើយត្រូវទៅនឹងសំណួររបស់រចៅក្រមជំនុំជម្រះ និងតំណាងអយ្យការ ឲ្យបានពេញលេញនោះទេ ពោលគឺជនជាប់ចោទបានលើកយកសំណុំរឿងផ្សេងៗមកអំណះអំណាងទៅវិញ។ ដូចត្រង់ចំណុចដែលតុលាការសួរថា តើអ្នកណាជាអ្នកធ្វើលិខិតចុះថ្ងៃទី១៣ ខែមិថុនា ឆ្នាំ២០២២ បានឆ្លើយបំភ្លឺមកតុលាការ ពេលដែលលោកស្រី ឃី ជឺ ប្ដឹងព្រះតេជគុណ សេង ថង រឿងលក់ដីវត្តគោកបញ្ជាន់? ដោយលិខិតនោះ បានសរសេរចោទប្រកាន់លោកស្រី ឃី ជឺ ថា ជាអ្នកលោ.ភលន់ចង់បានដីវត្ត និងចោទថា ឈ្មោះ ឃី ជឺ ជាអ្នកស្នើសុំចុះបញ្ជីយកដីវត្តជាកម្មសិទ្ធិផ្ទាល់ខ្លួន។
លោកមេធាវី ផេង ស៊ីដេត បានឆ្លើយថា «ខ្លឹមសារលិខិតបំភ្លឺនោះ ជាឆន្ទៈរបស់លោកសង្ឃ សេង ថង ទៅវិញ» ដូច្នោះគឺផ្ទុយពីខ្លឹមសារក្នុងលិខិតបំភ្លឺដាក់ជូនតុលាការទាំងស្រុង ។ ចុងបញ្ចប់ ចៅក្រមជំនុំជំរះក្នុងរឿងក្ដីនេះ បានលើកឡើងថា ភាពខុសឆ្គង និងការចោទប្រកាន់គេដោយពុំមានមូលដ្ឋានត្រឹមត្រូវ នេះហើយទើបលោកស្រី ឃី ជឿ ប្ដឹង ព្រោះជនដែលស្នើសុំចុះបញ្ជីដីវត្តគោកបញ្ជាន់ មិនមែនលោកស្រីឃី ជឺ ដូចក្នុងលិខិតបំភ្លឺរបស់លោកមេធាវីទេ។
ចំណែកលោកស្រី ឃី ជឺ បានស្នើសុំឲ្យតុលាការវិនិច្ឆ័យលើសំណុំរឿងនេះទៅតាមច្បាប់ បានជាចៅក្រមជំនុំជំរះប្រកាសសាលក្រមផ្ដន្ទាទោសលោកមេធាវី ផេង ស៊ីដេត ដាក់ពន្ធនាគារកំណត់២ឆ្នាំ តែទោសត្រូវព្យួរ និងបង្គាប់សងជំងឺចិត្តដល់ដើមបណ្ដឹងរដ្ឋប្បវេណីចំនួន៤លានរៀល ក្រោមការចោទប្រកាន់ពីបទ «ផ្ដល់សក្ខីកម្មក្លែង»៕
ចែករំលែកព័តមាននេះ