បន្ទាប់ពីសារព័ត៌មាននានា បានចុះផ្សាយពីភាពអសកម្មរបស់មន្ត្រីជំនាញដែលបណ្ដោយឲ្យមានជនឆក់ឱកាសលួ.ចឈូសឆាយដីព្រៃលិចទឹកតំបន់៣
ខេត្តកំពង់ឆ្នាំង ៖ បន្ទាប់ពីសារព័ត៌មាននានា បានចុះផ្សាយពីភាពអសកម្មរបស់មន្ត្រីជំនាញដែលបណ្ដោយឲ្យមានជនឆក់ឱកាសលួ.ចឈូសឆាយដីព្រៃលិចទឹកតំបន់៣ ស្ថិតក្នុងភូមិសាស្ត្រឃុំច្រណូក ស្រុកកំពង់លែង ប្រឆាំងនឹងអនុសាសន៍របស់សម្ដេចតេជោ ហ៊ុន សែន រួចមក ក្រុមមន្ត្រីជំនាញខេត្តកំពង់ឆ្នាំង និងមន្ត្រីក្រសួង បានចុះទៅពិនិត្យផ្ទៀងផ្ទាត់នៅលើផ្ទៃដីដែលរងការខូចខាតមានចំនួនជាង១០០ហិចតា។
បើតាមលោក ងិន ហ៊ុន ប្រធានមន្ទីរកសិកម្មរុក្ខាប្រមាញ់ និងនេសាទខេត្ត បានបញ្ជាក់ឲ្យដឹងថា «ក្រោយពីមានបាតុភាពបែបនេះ ឯកឧត្តម ស៊ុន សុវណ្ណារិទ្ឋិ អភិបាលខេត្តកំពង់ឆ្នាំង បានបញ្ជាឲ្យមន្ត្រីជំនាញ សហការជាមួយនឹងសមត្ថកិច្ចចម្រុះ ដឹកនាំដោយក្រុមការងាររដ្ឋបាលជលផលថ្នាក់ជាតិ បានចុះទៅពិនិត្យផ្ទៀងផ្ទាត់ជាក់ស្ដែង ហើយរកឃើញទំហំនៃការខូចខាតដីព្រៃលិចទឹករបស់រដ្ឋអស់ចំនួន១៤៤ហិកតាពិតប្រាកដមែន»។
លោកបន្តថា «ចំពោះករណីខាងលើនេះ មន្ត្រីជំនាញរបស់លោក បានធ្វើរបាយការណ៍ជូនថ្នាក់ដឹកនាំខេត្តអស់ហើយ រង់ចាំតែចំណាត់ការពីថ្នាក់ដឹកនាំតែប៉ុណ្ណោះ។ ជាមួយគ្នានេះដែរ អ្នកដែលបានពាក់ព័ន្ធក្នុងករណីបំពា.នច្បាប់យ៉ាងងងើលនេះ មន្ត្រីជំនាញរបស់លោកក៏បានកសាងសំណុំរឿងបញ្ជូនទៅកាន់តុលាការរួចអស់ហើយដែរ»។
គួររំលឹកផងដែរថា ឱ្យតែរដូវបោះឆ្នោតចូលមកដល់ ជនឆ្លៀតឱកាសគឺតែងតែលួចឈូសឆាយដីព្រៃលិចទឹកតំបន់៣ យកធ្វើកម្មសិទ្ធិរបស់ខ្លួនជារៀងរាល់ពេល ខណៈពេលដែលមន្ត្រីជំនាញ និងអាជ្ញាធររវល់ក្នុងការរៀបចំបោះឆ្នោត។
គួររំលឹកទៀតថា ៖ មានជនឆក់ឱកាសទន្ទ្រានយកដីព្រៃលិចទឹកតំបន់៣ ជាថ្មីទៀតហើយ (វីដេអូ) ៕
ចែករំលែកព័តមាននេះ