ខេត្តកំពង់ធំ ៖ អភិបាលរងស្រុកមួយរូប និងប្រជាពលរដ្ឋម្នាក់ បានត្រូវសមត្ថកិច្ចស្រុកប្រាសាទសំបូរឃាត់ខ្លួន តាមបញ្ជារបស់លោកព្រះរាជអាជ្ញា បញ្ជូនទៅសាលាដំបូងខេត្ត បន្ទាប់ពីសមត្ថកិច្ចស្រាវជ្រាវរកឃើញថា មានជាប់ពាក់ព័ន្ធនឹងករណីជ្រើសរើសកងទ័ពដោយខុសច្បាប់ នៅស្រុកប្រាសាទសំបូរ កាលពីខែមេសាកន្លងមក
ខេត្តកំពង់ធំ ៖ អភិបាលរងស្រុកមួយរូប និងប្រជាពលរដ្ឋម្នាក់ បានត្រូវសមត្ថកិច្ចស្រុកប្រាសាទសំបូរឃាត់ខ្លួន តាមបញ្ជារបស់លោកព្រះរាជអាជ្ញា បញ្ជូនទៅសាលាដំបូងខេត្ត បន្ទាប់ពីសមត្ថកិច្ចស្រាវជ្រាវរកឃើញថា មានជាប់ពាក់ព័ន្ធនឹងករណីជ្រើសរើសកងទ័ពដោយខុសច្បាប់ នៅស្រុកប្រាសាទសំបូរ កាលពីខែមេសាកន្លងមក ។
ពាក់ព័ន្ធនឹងករណីខាងលើនេះសមត្ថកិច្ចស្រុកប្រាសាទសំបូរបានឱ្យដឹងថា ដោយមានបញ្ជាពីលោកព្រះរាជអាជ្ញាអមសាលាដំបូងខេត្ត និងប្រធានគណៈបញ្ជាការឯកភាពខេត្តកាលពីថ្ងៃទី៦ ខែឧសភា ឆ្នាំ២០១១ នគរបាលបានឃាត់ខ្លួនមនុស្សពីរនាក់ គឺឈ្មោះធន់ សារ៉ន ភេទប្រុស អាយុ៤២ឆ្នាំ ជាអភិបាលរងស្រុកប្រាសាទសំបូរ និងឈ្មោះធន ធី ភេទប្រុស អាយុ២៩ឆ្នាំ ជាប្រជាពលរដ្ឋនៅភូមិអូរគ្រូកែ ឃុំសំបូរ ស្រុកប្រាសាទសំបូរ ។ ការឃាត់ខ្លួននេះគឺធ្វើឡើងបន្ទាប់សមត្ថកិច្ចស្រាវជ្រាវរកឃើញថា អ្នកទាំងពីរមានជាប់ពាក់ព័ន្ធនឹងករណីជ្រើសរើសកងទ័ពអាកាសដោយខុសច្បាប់ចំនួន៧នាក់ នៅក្នុងស្រុកកាលពីខែមេសាកន្លងមក ។
ការឈានដល់ការឃាត់ខ្លួនអភិបាលរងស្រុករូបនេះតាមប្រភពព័ត៌មានបានឱ្យដឹងថា កាលពីថ្ងៃទី៣ មេសា ឆ្នាំ២០១១ មានឈ្មោះតុង ពៅ ដែលអះអាងថា មានឋានៈជាមេបញ្ជាការទ័ពឆត្រយោងនៅកំបូល បានមកជួបទាក់ទងជាមួយលោកធន់ សារ៉ន ជាអភិបាលរងស្រុក និងឈ្មោះធន ធី នៅភូមិអូរគ្រូកែឱ្យជួយជ្រើសរើសកងទ័ពក្នុងរយៈពេលមួយសប្ដាហ៍ ហើយបើសិនជាជ្រើសរើសបានអភិបាលរងរូបនេះអាចទទួលបានកម្រៃច្រើន ហើយចំពោះអ្នកដែលចង់ចូលធ្វើទាហាន និងមានឋានៈស្រាប់ត្រូវបង់ប្រាក់ចំនួន១០០ដុល្លារ ។ បន្ទាប់ពីទទួលបានផែនការរួចហើយ អភិបាលរងស្រុករូបនេះក៏ចាត់ចែងធ្វើការជ្រើសរើសទាហានបានចំនួន៧នាក់ គឺមកពីឃុំឈូកចំនួន៣នាក់ និងឃុំសំបូរចំនួន៤នាក់។
បើតាមបុរសម្នាក់ក្នុងចំណោម៧នាក់បាននិយាយថា កាលពីថ្ងៃទី៦ ខែឧសភា អ្នកដែលបានជ្រើសរើសទាំងអស់ត្រូវបានឈ្មោះតុង ពៅ ហៅឱ្យទៅធ្វើការពិនិត្យសុខភាពនៅភ្នំពេញ។ ដោយឃើញដូច្នេះ សមត្ថកិច្ចមានការសង្ស័យក៏បានហៅមកធ្វើការសាកសួរ គឺពិនិត្យឃើញថាការជ្រើសរើសកងទ័ពនេះពុំមានលិខិតស្នាម ឬគោលការណ៍អ្វីស្របច្បាប់នោះឡើយ ទើបសមត្ថកិច្ចសុំបញ្ជាពីលោកព្រះរាជអាជ្ញាដើម្បីឃាត់ខ្លួនអ្នកពាក់ព័ន្ធ។ ដោយឡែកទាហានបំរុងទាំង៧នាក់ត្រូវបានឱ្យវិលត្រឡប់ទៅផ្ទះវិញ ។ បើតាមព័ត៌មានពីប្រជាពលរដ្ឋនៅក្នុងស្រុកបានឱ្យដឹងថា កន្លងមកមានប្រជាពលរដ្ឋជាច្រើនបាននាំគ្នាចាកចេញពីស្រុកតាមការសន្យារបស់មេខ្យល់នាំយកទៅធ្វើការនៅប្រទេសផ្សេងៗ ព្រោះប្រជាពលរដ្ឋនៅជនបទទំាងនោះមានការជឿជាក់លើមេខ្យល់ខ្លាំងណាស់ ។
នៅរសៀលថ្ងៃទី៦ ខែឧសភា ឆ្នាំ២០១១ ឈ្មោះធន់ សារ៉ន និងឈ្មោះធន ធី ត្រូវបាននគរបាលបញ្ជូនទៅសាលាដំបូងខេត្តហើយបន្ទាប់ពីគេឃើញមានមេធាវីម្នាក់ និងសមាជិកសកម្មក្នុងជួរក្រុមប្រឹក្សាខេត្តម្នាក់កំពុងរត់ការជាមួយលោកព្រះរាជអាជ្ញា ។ សូមបញ្ជាក់ថា អភិបាលរងស្រុកប្រាសាទសំបូររូបនេះមកពីគណបក្សហ្វ៊ីនស៊ិនប៉ិច ៕
ចែករំលែកព័តមាននេះ