ក្លឹបបិសាចក្រហម Man Utd ត្រៀមប្រកួតផ្តាច់ព្រ័ត្រក្នុងក្របខណ្ឌបាល់ទាត់យូហ្វាឆេម ពានលីក ដោយជួបជាមួយក្លឹបអ្នកមានបុណ្យ Barcelona របស់អេស្ប៉ាញ នៅទីលានប្រកួតវេមប្ល៊ី នាថ្ងៃទី២៨ ឧសភា ខាងមុខ និងនៅមានឱកាសខ្ពស់គ្រប់គ្រងជើងឯកប្រឺមីញេលីក ខណៈពេលកំពុងស្ថិតនៅកំពូលតារាងនាំមុខក្លឹបតោខៀវ Chelsea ចំនួន៣ពិន្ទុ និងនៅសល់ការប្រកួត៣លើក ។ ប្រសិនបើកីឡាករក្លឹប Man Utd ធ្វើបានសម្រេចជោគជ័យ ពួកគេនឹងទទួលបានប្រាក់ពិសេស ឬប្រាក់រង្វាន់លើកទឹកចិត្តប្រហែល៩លានផោន តាមអត្រាការចំណាយប្រាក់រង្វាន់លើកទឹកចិត្តដែលបញ្ជក់ក្នុងកិច្ចសន្យា។
កាសែតដឹសាន់របស់អង់គ្លេសបានឱ្យដឹងថា សម្រាប់ការប្រកួតក្នុងក្របខណ្ឌប្រឺមីញេលីក សមាជិកគ្រប់រូបក្នុងក្រុមកីឡាករ១៨នាក់បានទទួលប្រាក់ក្នុងម្នាក់១.៥០០ផោន សម្រាប់១ពិន្ទុ ឬ៤.៥០០ផោនចំពោះការឈ្នះ១លើក ។ បច្ចុប្បន្ន Man Utd មាន៧៣ពិន្ទុ ហើយនឹងបង្កើនដល់៨២ពិន្ទុ ប្រសិនបើឈ្នះចំនួន៣លើកនៃការប្រកួតដែលនៅសល់ ។ ដូច្នេះ ប្រាក់រង្វាន់លើកទឹកចិត្តនេះ មានប្រហែល២,២លានផោន ហើយក្លឹបនឹងផ្តល់ពី១ដល់១,៣លានផោន សម្រាប់ការដណ្តើមជើងឯក ហើយកីឡាករម្នាក់ៗបានទទួលការបែងចែកប៉ុនណា អាស្រ័យលើចំនួនការប្រកួតដែលបានចូលលេង ។
ចំណែកជើងឯកយូហ្វា ឆេមពានលីក កីឡាករវេន រូនី និងមិត្តភក្តិផ្សេងទៀតបានទទួលក្នុងម្នាក់ៗ១៥.០០០ផោន ពីការឈ្នះលើការប្រកួតជុំចែកពូល និងទទួលបានម្នាក់ៗ២០.០០០ផោន ពីការឈ្នះលើការប្រកួតក្នុងជុំចាញ់ចេញ។ លុះនៅពេលបូករួមដល់ការប្រកួតផ្តាច់ព្រ័ត្រគឺមានទឹកប្រាក់ប្រហែល២,៥លានផោន ហើយក្លឹបនឹងបូកបន្ថែមប្រាក់៣លានផោនទៀត ប្រសិនបើផ្តួលក្លឹបអ្នកមានបុណ្យ Barcelona ដណ្តើមជើងឯក ៕
ចែករំលែកព័តមាននេះ