ខេត្តបាត់ដំបង ៖ សំបកកង់រថយន្តជជុះរាប់រយសំបកក្នុងមួយថ្ងៃៗត្រូវបានឈ្មូញទុច្ចរិតលួចនាំចូលពីប្រទេសថៃ តាមច្រករបៀងមួយកន្លែង ក្បែរច្រកទ្វារអន្តរជាតិ «ភ្នំដី» ស្ថិតក្នុងភូមិចាបយំ ឃុំសន្តិភាព ស្រុកសំពៅលូន ដែលគេសង្ស័យថា…
ខេត្តបាត់ដំបង ៖ សំបកកង់រថយន្តជជុះរាប់រយសំបកក្នុងមួយថ្ងៃៗត្រូវបានឈ្មូញទុច្ចរិតលួចនាំចូលពីប្រទេសថៃ តាមច្រករបៀងមួយកន្លែង ក្បែរច្រកទ្វារអន្តរជាតិ «ភ្នំដី» ស្ថិតក្នុងភូមិចាបយំ ឃុំសន្តិភាព ស្រុកសំពៅលូន ដែលគេសង្ស័យថា គ្មានច្បាប់អនុញ្ញាតយកមកលក់ចែកចាយលើដីខ្មែរច្រើនខែកន្លងមកហើយ តែពុំមានមន្ត្រីនៅអង្គភាពពាក់ព័ន្ធណាមួយឆ្លើយទទួលស្គាល់ថា បានដឹងឡើយ។ នេះបើតាមសេចក្ដីរាយការណ៍ពីកន្លែងច្រករបៀង ដែលលួចនាំចូលសំបកកង់រថយន្តជជុះខាងលើនេះ។
ប្រភពព័ត៌មានបានរាយការណ៍ថា ច្រករបៀងដែលលួចនាំចូលសំបកកង់រថយន្តជជុះពីប្រទេសថៃនេះ ត្រូវបានគេរកឃើញនៅព្រឹកថ្ងៃទី១២ កក្កដា ដែលស្ថិតនៅចម្ងាយប្រហែលជាង១០០ម៉ែត្រពីច្រកទ្វារអន្តរជាតិ«ភ្នំដី» ដែលតំបន់នេះ ស្ថិតក្នុងដែនសមត្ថកិច្ចទទួលខុសត្រូវរបស់មន្ត្រីនគរបាលអន្តោប្រវេសន៍។ ប៉ុន្តែមន្ត្រីអន្តោប្រវេសន៍បានបដិសេធថា ពួកគេមិនដែលបានដឹងថា មានឈ្មួញលួចនាំចូលសំបកកង់រថយន្តជជុះ ចូលតាមច្រករបៀងមួយនេះទេ បើទោះជាមន្ត្រីអង្គភាពនេះ បានចុះទៅពីនិត្យភ្លាមៗដល់ច្រករបៀងនោះក្ដី។
តាមការពិនិត្យជាក់ស្ដែង ច្រករបៀងមួយនេះ ត្រូវបានគេដឹកដុំថ្មយកទៅរៀបបន្តុបលើគ្នា ធ្វើជាផ្លូវសម្រាប់ដឹកជញ្ជូនទំនិញឆ្លងអូរព្រំដែន។ នៅពេលនោះ គេមិនប្រទះឃើញសកម្មភាពក្រុមជនទុច្ចរិតដឹកជញ្ជូនសំបកកង់រថយន្តជាក់ស្ដែងទេ តែគេឃើញមានសំបកកង់រថយន្តមួយទឹកៗ ជាច្រើនដាក់គរលើគ្នានៅត្រើយម្ខាងនៃទឹកដីថៃ និង មានច្រើនគ្រាប់ទៀតដាក់គរលើគ្នានៅខាងទឹក ដីខ្មែរ ។ អ្នកប្រទះឃើញច្រកនាំចូលសំបកកង់រថយន្តជជុះនេះ បានរាយការណ៍ថា ដំបូងឡើយ ពុំមាននរណាបានដឹងរឿងនេះទេ តែគេសង្ស័យច្រើនខែហើយ ក្រោយពីគេតែងឃើញកម្មករដឹកជញ្ជូនសំបកកង់នេះចេញពីក្នុងព្រៃព្រំដែននៅទីនោះ ។
នៅព្រឹកថ្ងៃទី ១២ កក្កដា គេបានប្រទះឃើញកម្មករដើរចេញចូលទីនោះ ហើយគេបានសួរនាំ ពួកគេក៏បានទម្លាយពីការដឹកជញ្ជូនសំបកកង់រថយន្តឆ្លងអូរព្រំដែន។ លុះគេចូលទៅពិនិត្យទើបរកឃើញសំបកកង់រថយន្តជជុះ ជាច្រើនគរនៅខាងដីថៃផង និងនៅខាងដីខ្មែរផង ដែលឈ្មូញទុច្ចរិតដឹកយកចេញមិនទាន់អស់ ។
ប្រភពព័ត៌មាន ដែលកោះសន្តិភាពទទួលបានបានបង្ហើបឲ្យដឹងថា ឈ្មូញរត់ពន្ធសំបកកង់រថយន្តជជុះពីថៃ ចូលស្រុកខ្មែរនេះ គឺជាមន្ត្រីយោធាម្នាក់ នៅស្រុកសំពៅលូន តែគេមិនស្គាល់អត្ត សញ្ញាណឈ្មួញម្នាក់នេះពិតប្រាកដទេ ។ ប្រភពបានឲ្យដឹងទៀតថា គេសង្ស័យឈ្មួញលួចនាំចូលសំបកកង់ឡានជជុះនេះ ដឹកចេញពីច្រករបៀងខាងលើ យកទៅស្ដុកទុកនៅឃ្លាំងមួយកន្លែងម្ដុំផ្សារ «តាឡន» ក្នុងស្រុកសំពៅលូន ព្រោះទីតាំងស្ដុកសំបកកង់រថយន្តជជុះនេះ គេតែងឃើញលក់ចែកចាយបន្តនៅលើទីផ្សារនានា ក្នុងខេត្តបាត់ដំបង ។
កោះសន្តិភាពមិនអាចទំនាក់ទំនងសុំការបំភ្លឺពីមន្ត្រីយោធា ដែលគេអះអាងថា ជាមេឈ្មូញលួចនាំចូលសំបកកង់ឡានជជុះប្រចាំស្រុកសំពៅលូននេះបាននៅឡើយទេ រហូតមកដល់រសៀលថ្ងៃទី ១៣ កក្កដា នេះ ។ រីឯមន្ត្រីអន្តោប្រវេសន៍ក៏មិនអាចស្វែងរកការបំភ្លឺបន្ថែមបានដែរ ។ ប៉ុន្តែបើតាមក្រុមអ្នកសារព័ត៌មានដែលបានចុះទៅកាន់ច្រករបៀងនេះ ហើយបានជួបនឹងមន្ត្រីអន្តោប្រវេសន៍ ដែលចុះពិនិត្យសំបកកង់រថយន្តជជុះនៅច្រករបៀងបានបញ្ជាក់ថា មន្ត្រីអន្តោប្រវេសន៍ហាក់មិននិយាយពីវិធានការបែបណាទេ ទៅលើឈ្មូញរត់ពន្ធកង់ឡានជជុះនេះ ក្រៅតែពីពិនិត្យហើយគ្រវី ក្បាលដើរចេញ ៕
ចែករំលែកព័តមាននេះ