កីឡាករសូល អាល់វ៉ារេស ដែលជាជើងឯកពិភពលោកក្នុងប្រភេទទម្ងន់ Junior Middleweight នឹងឡើងប្រកួតការពារខ្សែក្រវាត់របស់ខ្លួនប្រឆាំងកីឡាករអង់គ្លេសរីយ៉ាន រ៉ូដនៅថ្ងៃទី១៨ខែមិថុនាខាងមុខ។ ការប្រកួតនេះនឹងត្រូវរៀបចំធ្វើនៅសង្វៀនក្នុងទីក្រុងហ្គាដាឡាយ៉ារ៉ា ប្រទេសម៉ិកស៊ិក។
សម្រាប់កីឡាករអាល់វ៉ារេស នេះគឺជាការប្រកួតការពារខ្សែក្រវាត់លើកដំបូងហើយបន្ទាប់ពីគេយកឈ្នះកីឡាករអង់គ្លេសម៉ាតទូ ហាតតុនកាលពីថ្ងៃទី៥ខែមីនានៅកាលីហ្វ័រនីញ៉ាកន្លងមក។
ជាមួយនឹងជ័យជម្នះលើកនោះ បានធ្វើឲ្យអាល់វ៉ារេសដែលមានអាយុទើបតែ២០ឆ្នាំក្លាយខ្លួនជាកីឡាករវ័យក្មេងបំផុតយកឈ្នះខ្សែក្រវាត់ពិភពលោកក្នុងទម្ងន់១៥៤ផោន។ ដោយទទួលបានឱកាសប្រកួតការពារខ្សែក្រវាត់របស់ខ្លួនជាលើកដំបូងនៅលើទឹកដីកំណើតបែបនេះ ពិតជាធ្វើឲ្យកីឡាករអាល់វ៉ារេសមានក្តីរីករាយក្រៃលែង។
កីឡាករម៉ិកស៊ិករូបនេះបាននិយាយថា៖«ខ្ញុំរំភើបជាខ្លាំងដែលការប្រកួតការពារខ្សែក្រវាត់ពិភពលោកលើកទី១របស់ខ្ញុំធ្វើនៅទីក្រុងហ្គាដាឡាយ៉ារ៉ា។ ខ្ញុំសន្យាថា នឹងខិតខំហ្វឹកហាត់ឲ្យបានល្អបំផុតដើម្បីផ្តល់ជូននូវការប្រកួតយ៉ាងអស្ចារ្យមួយដល់បណ្តាអ្នកគាំទ្ររូបខ្ញុំ»។
អាល់វ៉ារេសធ្លាប់ប្រកួតឈ្នះ៣៦លើក មិនដែលចាញ់ ស្មើ១ និងធ្លាប់បានផ្តួលដៃគូឲ្យសន្លប់ចំនួន២៦លើក។ គេស្ថិតនៅក្នុងក្លឹបរបស់អូស្កាដឺឡាហូយ៉ា ។
លោកអូស្កា ដឺឡាហូយ៉ា ប្រធានក្រុមហ៊ុនរៀបចំការប្រកួតGolden Boy Promotionsបាននិយាយថា៖«រឿងមួយក្នុងចំណោមរឿងជាច្រើនដែលកីឡាករអាល់វ៉ារេសប្រាប់ខ្ញុំគឺថា ក្រោយពីបានយកឈ្នះខ្សែក្រវាត់ពិភពលោករួចមក រូបគេមិនចង់នៅអង្គុយទំនេរឡើយ។ គេចង់ឡើងសង្វៀនប្រកួត។ គេចង់ក្លាយជាជើងឯកម្នាក់ដែលសកម្ម ហើយយើងបានត្រៀមខ្លួនរួចជាស្រេចដើម្បីផ្តល់ឱកាសឲ្យគេធ្វើរឿង នោះ»។
កីឡាករអាល់វ៉ារេសពិតជាសកម្មនៅក្នុងផ្លូវឆ្ពោះទៅរកភាពជាជើងឯកពិភពលោក។ ជ័យជម្នះដ៏ត្រចះត្រចង់ក្នុងពេលថ្មីៗរបស់គេរួមមានវាយឲ្យសន្លប់កីឡាករចូស មីហ្គែល កូតូ និងបានយកឈ្នះកីឡាករកាឡូស បាល់ដូមៀ ព្រមទាំងកីឡាករឡូវេម័រ អិនឌូ។ លោកអូស្កាដឺឡាហូយ៉ាបាននិយាយទៀតថា៖«ខ្ញុំដឹងយ៉ាងច្បាស់ថា កីឡាកររីយ៉ាន រ៉ូដ នឹងខិតខំក្តាប់យកឱកាសលើកនេះឲ្យបានល្អដើម្បីយកឈ្នះខ្សែក្រវាត់ពិភពលោក។ ប៉ុន្តែខ្ញុំមានជំនឿចិត្តថា អាល់វ៉ារេសមានអ្វីមួយយ៉ាងពិសេសដែលមិនត្រឹមតែយកឈ្នះការប្រកួតនៅថ្ងៃទី១៨ខែមិថុនាប៉ុណ្ណោះទេ តែថែមទាំងអាចគ្រប់គ្រងខ្សែក្រវាត់ពិភពលោកមួយនេះបានយូរច្រើនឆ្នាំទៀតផង»។
ចំណែកកីឡាកររីយ៉ាន រ៉ូដវិញ គេធ្លាប់ប្រកួតឈ្នះ៤៥លើក ចាញ់៤ និងផ្តួលដៃគូឲ្យសន្លប់ចំនួន៣១លើក។ គេធ្លាប់បានឡើងប្រកួតផ្តាច់មុខនៅទ្វីបអឺរ៉ុបនិងបានយកឈ្នះខ្សែក្រវាត់ប្រចាំទ្វីបជាច្រើន។ ប៉ុន្តែកីឡាកររូបនេះបានបរាជ័យនៅក្នុងការប្រកួតដណ្តើមជើងឯកពិភពលោកចំនួន២លើក ដែល១លើកចាញ់កីឡាករជេសុន ម៉ាតទូ(ដណ្តើមខ្សែក្រវាត់នៅទំនេរក្នុងខែកក្កដាឆ្នាំ១៩៩៩) និង១លើកទៀតចាញ់កីឡាករអូទីស ហ្គ្រែន(ខែធ្នូឆ្នាំ១៩៩៧)។ ទោះជាយ៉ាងណា ការប្រកួតទាំង២លើកក្នុងពេលនោះគឺស្ថិតក្នុងប្រភេទទម្ងន់១៦០ផោន។
ផ្ទុយពីលើកមុន ការប្រកួតលើកនេះស្ថិតក្នុងប្រភេទទម្ងន់១៥៤ផោន គឺជាទម្ងន់ខ្លួនពីធម្មជាតិរបស់កីឡាកររីយ៉ាន រ៉ូដ។ រ៉ូដបាននិយាយថា៖«ខ្ញុំបានរង់ចាំឱកាសបែបនេះជាយូរមកហើយ។ ខ្ញុំសូមប្តេជ្ញាចិត្តទទួលយកវាដោយដៃទាំងទ្វេ។ ខ្ញុំគោរពកីឡាករអាល់វ៉ារេស តែការប្រកួតលើកនេះខ្ញុំបានតាំងចិត្តថានឹងនាំយកខ្សែក្រវាត់មកកាន់ប្រទេសអង់គ្លេសឲ្យខាងតែបាន»៕
ចែករំលែកព័តមាននេះ