ប្រជាពលរដ្ឋដែលធ្វើដំណើរទៅមកនៅលើផ្លូវច្រោះបាក់ដាច់ មានការត្អូញត្អែរ និងរអ៊ូរទាំយ៉ាងខ្លាំង ខណៈពេលទៅធ្វើស្រែចម្ការម្តងៗ គឺផ្លូវដែលបាក់ដាច់ត្រង់ចំណុចអូតាម៉ានេះ ពិតជាមានការលំបាក ទីតាំងនេះ
ខេត្តឧត្តរមានជ័យ ៖ ប្រជាពលរដ្ឋដែលធ្វើដំណើរទៅមកនៅលើផ្លូវច្រោះបាក់ដាច់ មានការត្អូញត្អែរ និងរអ៊ូរទាំយ៉ាងខ្លាំង ខណៈពេលទៅធ្វើស្រែចម្ការម្តងៗ គឺផ្លូវដែលបាក់ដាច់ត្រង់ចំណុចអូតាម៉ានេះ ពិតជាមានការលំបាក ទីតាំងនេះស្ថិតនៅក្នុងភូមិពុល សង្កាត់សំរោង ក្រុងសំរោង ខេត្តឧត្តរមានជ័យ។ ហើយផ្លូវនេះរងការខូត ដោយសារតែកត្តាធម្មជាតិគ្រោះជំនន់ទឹកភ្លៀងកាលពីឆ្នាំចាស់កន្លងទៅ ដោយខាងអាជ្ញាធរក៏ពុំទាន់ធ្វើការស្ថាបនាជួសជុលឡើងវិញនោះទេ រហូតមកដល់សព្វថ្ងៃនេះ គឺមានរយៈពេល២ឆ្នាំមកហើយ។
បើតាមប្រជាពលរដ្ឋរស់នៅក្បែរទីតាំងផ្លូវខាងលើ បានរៀបរាប់ឲ្យដឹងនៅថ្ងៃទី១១ ខែកក្កដា ឆ្នាំ២០២៣នេះថា «ផ្លូវមួយខ្សែចេញពីចំណុចអូរតាម៉ា រហូតដល់បឹងត្រពាំងវែងនេះ បើតាមការឲ្យដឹងផ្លូវនេះដែរ កន្លងមកគឺខាងមន្ទីរអភិវឌ្ឍន៍ជនបទជាអ្នកសាងសង់ ក្រោយមកក៏ត្រូវជំនន់ទឹកភ្លៀងហូរបុកមកខ្លាំង បណ្ដាលឱ្យផ្លូវនេះកាត់ផ្តាច់តែម្តង។ រហូតមកដល់សព្វថ្ងៃនេះ បានឈានចូលមកដល់រដូវវស្សាវិញហើយ គឺមានរយៈពេល២ឆ្នាំពេញ»។
ពលរដ្ឋបន្តថា «មួយវិញទៀត ក៏ពុំដែលឃើញមានមន្ត្រី អាជ្ញាធរណា មកស្ថាបនាជួសជុលផ្លូវនេះដែរ ទុកឲ្យនៅមេម៉ាយរហូតមកដល់សព្វថ្ងៃ។ ហើយចំពោះផ្លូវនេះ គឺមានសារៈសំខាន់ណាស់ចំពោះបងប្អូនប្រជាពលរដ្ឋមានដីស្រែចម្ការ ដែលត្រូវធ្វើដំណើរឆ្លងកាត់ក្នុងការដឹកជញ្ជូនកសិផល។ ពលរដ្ឋបន្តទៀតថា បើខែប្រាំង យើងអាចធ្វើដំណើរផ្លូវវាងបាន ចុះបើដល់ពេលខែវស្សាទឹកលិចវិញ ពួកគាត់នឹងខកខានក្នុងការដឹកជញ្ជូនកសិផលមិនខាន ដូចនេះហើយពួកគាត់ គឺនៅតែជួបការលំបាកដដែល»។
ជុំវិញការលើកឡើង និងការស្នើសុំពីសំណាក់បងប្អូនប្រជាពលរដ្ឋនេះផងដែរ លោក ហេង សុខអេង ប្រធានមន្ទីរអភិវឌ្ឍន៍ជនបទខេត្តឧត្តរមានជ័យ បានបញ្ជាក់ប្រាប់ឲ្យដឹងនៅល្ងាចថ្ងៃទី១១ ខែកក្កដា ឆ្នាំ២០២៣នេះថា «ផ្លូវក្រាលក្រួសក្រហមមួយខ្សែនេះ កន្លងមកខាងសង្កាត់គេស្នើឲ្យមន្ទីរជួយធ្វើបានរួចរាល់ជាស្ថាពរអស់ហើយ។ តែក្រោយមកទៀត ជំនន់ទឹកភ្លៀងក៏បានហូរបុកកាត់ផ្តាច់តែម្តង ហើយចំពោះផ្លូវត្រង់ចំណុចដែលបាក់ដាច់នេះ គឺលោកបានឲ្យក្រុមការងារធ្វើការតភ្ជាប់ម្តងជាពីរដងហើយ និងដាក់សំណើរទៅខាងថ្នាក់លើរួចហើយដែរ»។
លោកប្រធានមន្ទីរអភិវឌ្ឍន៍ជនបទដដែល បានលើកឡើងបន្ថែមថា «ដោយឡែកផ្លូវនេះ បើសិនជាតភ្ជាប់វិញក៏នៅតែបាក់ដដែល ព្រោះថា ផ្លូវចំណុចនេះ គឺស្ថិតនៅចំមុខទឹកធំ ដូច្នេះនៅពេលមានភ្លៀងមក ទឹកហូរបុកខ្លាំង នៅតែដាច់បន្តទៀតនឹង។ ហើយបញ្ហានេះ លោកក៏បានធ្វើរបាយការណ៍ដាក់ជូនទៅថ្នាក់លើ ដើម្បីស្នើសុំកញ្ចប់ថវិការធ្វើឡើងវិញនូវផ្លូវដែលបានបាក់ដាច់ចំណុចអូរតាម៉ានេះហើយ ដោយធ្វើជាទំនប់បង្ហូរទឹកវិញ ទើបបានជាប់ល្អ។ ម្យ៉ាងវិញទៀត ថវិការដែលថ្នាក់លើទម្លាក់មកឲ្យខាងមន្ទីរអភិវឌ្ឍន៍ជនបទនេះ មានកំណត់ គឺឲ្យតភ្ជាប់តែផ្លូវក្រាលក្រួសក្រហមតែប៉ុណ្ណោះទេ»៕
ចែករំលែកព័តមាននេះ