កីឡាករអាមេរិកលូខាស់ ក្លាវវ័របានសម្ដែងនូវក្តីរីករាយជាខ្លាំងបន្ទាប់ពីបានយកឈ្នះជើងឯកវាយកូនហ្គោលកម្មវិធីWells Fargo Championship នៅទីលានវាយកូនហ្គោលក្រុងCharlotte រដ្ឋណ័សការ៉ូលីណា សហរដ្ឋអាមេរិកកាលពីថ្ងៃអាទិត្យ ទី៨ ខែឧសភា កន្លងមកនេះ ។ ជាមួយនឹងលទ្ធផលនៅឡូបន្ថែមក្នុងវគ្គកាត់សេចក្តីផ្លេអហ្វ នាំឲ្យកីឡាករក្លាវវ័រយកឈ្នះពានជើងឯកនៃកម្មវិធីដែលមានទឹកប្រាក់រង្វាន់សរុប៦លាន៥សែនដុល្លាររបស់ក្របខណ្ឌទេសចរណ៍ភីជីអេធួមួយនេះ។ សរុបលទ្ធផលប្រកួត៤ជុំ កីឡាករក្លាវវ័រធ្វើបាន១៥អាន់ឌ័រ ២៧៣ និងទទួលបានទឹកប្រាក់រង្វាន់១លាន១៧ម៉ឺនដុល្លារអាមេរិក ។
នេះគឺជាការប្រកួតវគ្គផ្លេអហ្វលើកទី៨ហើយសម្រាប់ក្របខណ្ឌភីជីអេធួឆ្នាំនេះ។ សម្រាប់កីឡាករអាមេរិកក្លាវវ័រវិញ គឺជាការប្រកួតវគ្គផ្លេអហ្វលើកដំបូងហើយ ។ គេអាចនិយាយបានថា គឺជាជ័យជម្នះពានជើងឯកនៃកម្មវិធីដ៏សំខាន់មួយរបស់ក្របខណ្ឌភីជីអេធួនៅអាមេរិក ។
បន្ទាប់ពីទទួលបានជោគជ័យ ក្លាវវ័របាននិយាយដោយក្តីរំភើបថា៖«នេះជាថ្ងៃមួយដ៏រំភើបរីករាយបំផុត។ បរិយាកាសជ័យជម្នះរបស់ខ្ញុំពិតជាពុំគួរឲ្យជឿ »។ កីឡាកររូបនេះបានបន្តថា៖«វាធ្វើឲ្យខ្ញុំមានអារម្មណ៍រំភើបរីករាយជាខ្លាំង។ នេះជាសមិទ្ធផលដ៏ធំធេងបំផុត ។ ដូចដែលខ្ញុំធ្លាប់បាននិយាយរួចមកហើយថា នៅពេលដែលយើងឈ្នះពានជើងឯក គឺយើងពិតជាសប្បាយចិត្ត។ ទោះជាយ៉ាងណា ការប្រកួតលើកនេះមិនងាយស្រួលនោះទេ ទីលានប្រកួតពិតជាពិបាកខ្លាំង។ កីឡាករទាំងអស់ត្រូវប្រឹងប្រែងខ្លាំងទើបអាចទទួលបានលទ្ធផលល្អ។ ពិតហើយវាមិនងាយស្រួលក្នុងការផ្ចង់ស្មារតីនោះទេ» ។
ចំណែកកីឡាករអាមេរិកចូណាថាន់ បឺតម្នាក់ទៀតបញ្ចប់ការប្រកួតស្ថិតនៅចំណាត់ថ្នាក់លេខ២ បន្ទាប់ពីធ្វើបានលទ្ធផលពិន្ទុសរុប១៥អាន់ឌ័រ ២៧៣ ។ឯកីឡាករអាហ្វ្រិកខាងត្បូងរ៉ូរី សាប់បាទីនី បញ្ចប់ការប្រកួតទទួលបានចំណាត់ថ្នាក់លេខ៣ជាមួយលទ្ធផលសរុប១៤អាន់ឌ័រ២៧៤ នាំមុខ១ស្រ្តូកលើកីឡាករអាមេរិកប៊ីល អាស ដែលបញ្ចប់ការប្រកួតក្នុងលទ្ធផលសរុប១៣អាន់ឌ័រ២៧៥។
ចំណែកកីឡាករអាមេរិកហ្វ៊ីល មីកគែលសុន បញ្ចប់ការប្រកួតស្ថិតនៅចំណាត់ថ្នាក់លេខ៩ស្ទួនជាមួយកីឡាករអៀរឡង់ផេដ្រេក ហារីងតុន និងកីឡាករឥណ្ឌាវីយ៉ៃ ស៊ីញ។ ឆ្លងកាត់ការប្រកួត៤ជុំ អ្នកទាំង៣ធ្វើបានលទ្ធផលស្មើៗគ្នា១០អាន់ឌ័រ ២៧៨ ពោលគឺ១ស្រ្តូកតាមពីក្រោយកីឡាករអាមេរិកហ្សាច ចនសុន និងបប់ប៊ី ហ្គេត។ កីឡាករចន សុន និងហ្គេត ឆ្លងកាត់៤ជុំប្រកួតធ្វើបានលទ្ធផលពិន្ទុ១១អាន់ឌ័រ ២៧៧ ។
ដោយឡែកទឹកប្រាក់រង្វាន់សម្រាប់កីឡាករជ័យលាភីលេខ២និងលេខ៣មានដូចជា កីឡាករបឺត(លេខ២)ទទួលបានទឹកប្រាក់រង្វាន់៧០ម៉ឺន២ពាន់ដុល្លារ ខណៈកីឡាករសាប់បាទីនី(លេខ៣) ទទួលបាន៤៤ម៉ឺន២ពាន់ដុល្លារ ៕
ចែករំលែកព័តមាននេះ